مۇسانىڭ 4-جازباسى
31 سوسىن ەحوبا مۇساعا بىلاي دەدى: 2 «يسرايلدىكتەر ٷشىن مادياندىقتاردان+ ٶش ال+. بۇدان كەيىن سەن كوز جۇمىپ، اتا-بابالارىڭا قوسىلاسىڭ+».
3 ٴسۇيتىپ، مۇسا حالىققا: «ارالارىڭداعى ەر ادامداردى مادياندىقتارمەن شايقاسىپ، ەحوبانىڭ ٶشىن الۋ ٷشىن قارۋلاندىرىڭدار. 4 جاساققا يسرايلدىڭ ٵربىر رۋىنان 1000 ادامنان شىعارىڭدار»،— دەدى. 5 سوندا مىڭداپ سانالعان يسرايلدىكتەردىڭ+ ٵر رۋى وزدەرىنەن 1000 ادامنان شىعاردى. شايقاسقا بارلىعى 12000 سارباز دايىن بولدى.
6 مۇسا ٵر رۋدان مىڭ-مىڭنان جينالعان وسى جاساقتى شايقاسقا جىبەردى. جاساقپەن بىرگە ٴدىني قىزمەتكەر ەلازار ۇلى پىنەحەستى+ جىبەردى. ونىڭ قولىنا كيەلى زاتتار مەن بەلگى بەرەتىن كەرنەيلەردى+ تاپسىردى. 7 ەحوبا مۇساعا بۇيىرعانداي، ولار مادياندىقتارمەن شايقاسىپ، ەر ادامدارىنىڭ ٴبارىن ٶلتىردى. 8 ولگەندەردىڭ اراسىندا ەبي، رەكەم، سۋر، حۇر، رەبا دەگەن مادياننىڭ بەس پاتشاسى بولدى. سونداي-اق ولار بەعور ۇلى بالاعامدى+ دا سەمسەردىڭ جۇزىمەن ٶلتىردى. 9 ال مادياندىقتاردىڭ ايەلدەرى مەن بالالارىن تۇتقىنعا الدى. بۇعان قوسا، كۇللى تابىن-وتارى مەن دۇنيە-مۇلكىن ولجالادى. 10 قالالارى مەن قوستارىن* تۇگەل ورتەپ جىبەردى. 11 ولار توناعان نە ولجا ەتكەننىڭ ٴبارىن — ادامداردى دا، مالداردى دا — وزدەرىمەن الىپ كەتتى. 12 ٴسۇيتىپ، ونىڭ ٴبارىن مۇسا مەن ٴدىني قىزمەتكەر ەلازارعا جانە بۇكىل يسرايل قاۋىمىنا — يەريحونعا قاراما-قارسى، يوردان وزەنىنىڭ بويىنداعى مواب ٴشول دالاسىنداعى قوستىڭ+ قاسىنا — اكەلدى.
13 مۇسا مەن ٴدىني قىزمەتكەر ەلازار جانە بارلىق قاۋىم باسشىلارى ولاردى قارسى الۋ ٷشىن قوستىڭ سىرتىنا شىقتى. 14 سوندا مۇسا شايقاستان قايتىپ كەلگەن جاساق باسشىلارىنا، مىڭباسىلارى مەن ٴجۇزباسىلارعا، قاتتى اشۋلانىپ، 15 بىلاي دەدى: «ايەلدەردى نەگە ٴتىرى قالدىردىڭدار؟ 16 بالاعامنىڭ ايتۋىمەن يسرايلدىكتەردى ەحوباعا وپاسىزدىق جاساۋعا ازعىرعان وسىلار ەمەس پە ەدى+؟! سول كەزدە پەعوردىڭ ماڭىندا+ ەحوبانىڭ قاۋىمى قىرىلىپ ەدى عوي+. 17 سوندىقتان قازىر ولاردىڭ اراسىنداعى ەر بالالاردى جانە ەركەكپەن جاقىنداسقان ايەلدەردى تۇگەل ولتىرىڭدەر. 18 ال ەركەكپەن جاقىنداسپاعان جاس قىزداردى الىپ قالىڭدار+. 19 وزدەرىڭ بولسا جەتى كۇن قوستىڭ سىرتىندا بولىڭدار. ارالارىڭداعى كىسى ولتىرگەن نە مايىتكە تيگەن اركىم+ ٷشىنشى جانە جەتىنشى كۇنى تازارۋ راسىمىنەن ٶتسىن+. وزدەرىڭ دە، تۇتقىندارىڭ دا وسىلاي ەتىڭدەر. 20 كيىمدەرىڭدى جانە بىلعارىدان، ەشكى تۇبىتىنەن، اعاشتان جاسالعان نارسەلەردىڭ ٴبارىن تازارتىڭدار».
21 ٴدىني قىزمەتكەر ەلازار شايقاستان ورالعان ساربازدارعا بىلاي دەدى: «ەحوبانىڭ مۇساعا بەرگەن زاڭى مىناداي: 22 —التىن، كۇمىس، قولا، تەمىر، قالايى مەن قورعاسىن زاتتاردى، 23 ياعني وتقا ٴتوزىمدى زاتتاردىڭ ٴبارىن، وتقا سالىپ تازارتىڭدار. كەيىن تازارۋ راسىمىنە ارنالعان سۋعا+ باتىرىپ الىڭدار. ال وتتا جانىپ كەتەتىن زاتتاردى سۋمەن جۋىڭدار. 24 جەتىنشى كۇنى كيىمدەرىڭدى جۋىڭدار، سوندا تازا بولاسىڭدار. سودان كەيىن عانا قوسقا كىرە الاسىڭدار+».
25 كەيىن ەحوبا مۇساعا مىنانى ايتتى: 26 «قاسىڭا ٴدىني قىزمەتكەر ەلازاردى جانە اۋلەت باسشىلارىن الىپ، تۇتقىنعا تۇسكەن ادامدار مەن ولجالانعان مالدى ساناپ شىق. 27 سوسىن بار ولجانى ەكىگە ٴبولىپ، شايقاسقا بارعاندارعا جانە قوستا قالعان جۇرتقا بەر+. 28 ساربازداردىڭ ولجاسىنان ەحوباعا ۇلەس ەتىپ ٵربىر 500 ادامنان، ٸرى قارادان، ەسەكتەن، ۇساق مالدان ٴبىر-بىرەۋدەن* بەر. 29 وسىلاي ساربازدارعا تيگەن جارتى ولجادان ۇلەس الىپ، ەحوباعا ارنالعان سي-تارتۋ رەتىندە ٴدىني قىزمەتكەر ەلازارعا تابىستا+. 30 ال يسرايلدىكتەرگە بەرىلگەن جارتى ولجانىڭ — ادامنىڭ، ٸرى قارانىڭ، ەسەكتىڭ، ۇساق مالدىڭ، ياعني بارلىق مالدىڭ — ٵربىر 50-ىنەن ٴبىر-بىرەۋدەن الىپ، ەحوبانىڭ كيەلى شاتىرىندا ٶز مىندەتىن اتقارىپ جۇرگەن+ لەۋىلىكتەرگە بەر+».
31 ٴسۇيتىپ، مۇسا مەن ٴدىني قىزمەتكەر ەلازار ەحوبانىڭ مۇساعا بۇيىرعاندارىن ورىندادى. 32 جورىققا بارعانداردىڭ اكەلگەن ولجاسىنان قالعانىن ەسەپتەگەندە، 675000 ۇساق مال، 33 72000 ٸرى قارا، 34 61000 ەسەك، 35 ال ەركەكپەن جاقىنداسپاعان قىزداردىڭ+ سانى 32000 بولدى. 36 وسى ولجادان شايقاسقا بارعاندارعا تيگەن جارتىسى 337500 ۇساق مال بولدى. 37 ودان ەحوباعا ۇلەس ەتىپ 675 باس بەرىلدى. 38 ٸرى قارانىڭ سانى 36000 بولدى، ودان ەحوباعا ۇلەس ەتىپ 72 باس بەرىلدى. 39 ەسەكتىڭ سانى 30500 بولدى، ودان ەحوباعا ۇلەس ەتىپ 61 باس بەرىلدى. 40 ادام سانى 16000 بولدى، ودان ەحوباعا ۇلەس ەتىپ 32 جان بەرىلدى. 41 وسىلايشا مۇسا بۇلاردى ەحوباعا ارنالعان سي-تارتۋ رەتىندە ٴدىني قىزمەتكەر ەلازارعا تابىستاپ+، ەحوبانىڭ وزىنە بۇيىرعانىن ورىندادى.
42 مۇسا شايقاسقا بارعانداردىڭ اكەلگەن ولجاسىنان ٴبولىپ الىپ، يسرايلدىكتەرگە بەرگەن ەكىنشى جارتىسى كەلەسىدەي بولدى: 43 ۇساق مالدىڭ سانى 337500، 44 ٸرى قارانىڭ سانى 36000، 45 ەسەكتىڭ سانى 30500، 46 ادام سانى 16000. 47 سودان مۇسا يسرايلدىكتەرگە تيگەن وسى جارتى ولجانىڭ — مالدىڭ دا، ادامنىڭ دا — ٵربىر ەلۋىنەن بىرەۋىن الىپ، ەحوبانىڭ كيەلى شاتىرىندا مىندەتتەرىن اتقارىپ جاتقان+ لەۋىلىكتەرگە بەردى+. وسىلاي مۇسا ەحوبانىڭ بۇيىرعانىن ورىندادى.
48 سودان مىڭداپ سانالعان جاساقتىڭ باسشىلارى+، ياعني مىڭباسىلارى مەن ٴجۇزباسىلارى، مۇساعا كەلىپ، 49 بىلاي دەدى: «قىزمەتشىلەرىڭىز قول استىنداعى ساربازدارىن ساناپ شىقتى. ەشقانداي ادام شىعىنى بولماپتى+. 50 سوندىقتان ٴارقايسىسىمىز ولجالاعان التىن زاتتاردان، اياققا جانە قولعا تاعاتىن بىلەزىكتەردەن، ٴمورلى ساقينالاردان، سىرعالار مەن باسقا دا اشەكەي بۇيىمداردان ەحوباعا سي-تارتۋ بەرەيىك. وسىلايشا ەحوبانىڭ الدىندا جانىمىزدىڭ قۇنىن وتەسەك دەپ ەدىك».
51 مۇسا مەن ٴدىني قىزمەتكەر ەلازار ولاردىڭ اكەلگەن التىندارىن جانە بارلىق اشەكەي بۇيىمدارىن قابىل الدى. 52 مىڭباسىلارى مەن ٴجۇزباسىلارى ەحوباعا سي-تارتۋ رەتىندە اكەلگەن التىننىڭ سالماعى 16750 شەكەل* بولدى. 53 ساربازداردىڭ ٴارقايسىسى وزدەرى ٷشىن ولجا العان ەدى. 54 سودان مۇسا مەن ٴدىني قىزمەتكەر ەلازار مىڭباسىلار جانە ٴجۇزباسىلار ۇسىنعان التىندى الىپ، ونى يسرايل حالقى ٷشىن ەحوبانىڭ الدىندا ەستەلىك رەتىندە كەزدەسۋ شاتىرىنا اپاردى.