ٴبىر-ٴبىرىمىزدى «بۇرىنعىدان دا كوبىرەك» جىگەرلەندىرەيىك!
«ٴبىر-بىرىمىزگە كوڭىل بولەيىك... ٴبىر-ٴبىرىمىزدى جىگەرلەندىرە بەرەيىك. سول كۇننىڭ جاقىن قالعانىن بىلگەندىكتەن، بۇلاردى بۇرىنعىدان دا كوبىرەك ىستەيىك» (ەۆرەيلەرگە 10:24، 25).
اندەر: 121، 119
1. نەگە پاۋىل ەۆرەي ماسىحشىلەردى ٴبىر-ٴبىرىن «بۇرىنعىدان دا كوبىرەك» جىگەرلەندىرۋگە تالپىندىرعان؟
ٴبىرىنشى عاسىردا ەلشى پاۋىل ەۆرەي ماسىحشىلەرگە بىلاي دەپ كەڭەس بەرگەن: «سۇيىسپەنشىلىككە جانە يگى ىستەرگە تالپىندىرۋ ٷشىن، ٴبىر-بىرىمىزگە كوڭىل بولەيىك. كەيبىرەۋلەر سياقتى جينالىستارعا بارماي قالۋدى ادەتكە اينالدىرمايىق، قايتا، ٴبىر-ٴبىرىمىزدى جىگەرلەندىرە بەرەيىك. سول كۇننىڭ جاقىن قالعانىن بىلگەندىكتەن، بۇلاردى بۇرىنعىدان دا كوبىرەك ىستەيىك» (ەۆرەيلەرگە 10:24، 25). بالكىم، باۋىرلاستار پاۋىلدىڭ نەگە «ٴبىر-ٴبىرىڭدى بۇرىنعىدان دا كوبىرەك جىگەرلەندىرىڭدەر» دەگەنىن تۇسىنبەگەن شىعار. بەس جىلعا جۋىق ۋاقىتتان كەيىن مۇنىڭ ٴبىر سەبەبى انىق بولدى. باۋىرلاستار ەحوبانىڭ يەرۋساليمدى سوتتايتىن كۇنى جاقىن ەكەنىن كوردى. ولار يسانىڭ ايتىپ كەتكەن باسشىلىعى بويىنشا قالادان شىعىپ، قاشۋلارى كەرەكتىگىن ٴتۇسىندى (لۇقا 21:20—22؛ ەلشىلەردىڭ ىستەرى 2:19، 20). 70-جىلى ەحوبانىڭ كۇنى كەلدى. سول جىلى ريمدىكتەر يەرۋساليمدى جەرمەن-جەكسەن ەتتى.
2. بۇگىندە ٴبىز باۋىرلاستاردى جىگەرلەندىرۋ جايلى نەگە بۇرىنعىدان دا كوبىرەك ويلاۋىمىز كەرەك؟
2 بۇگىندە ٴبىز دە تۋرا سونداي جاعدايدامىز. ەحوبانىڭ «ۇلى دا عالامات» كۇنى جاقىنداپ كەلەدى (جوەل 2:11). سافونيا پايعامباردىڭ كەلەسى سوزدەرى ٴبىزدىڭ كۇنىمىزگە دە قاتىستى ايتىلعان: «ەحوبانىڭ ۇلى كۇنى جاقىن! ول كۇن جاقىن، تەز جاقىنداپ كەلەدى!» (سافونيا 1:14). سول سەبەپتەن دە ٴبىز «سۇيىسپەنشىلىككە جانە يگى ىستەرگە تالپىندىرۋ ٷشىن، ٴبىر-بىرىمىزگە كوڭىل ٴبولۋىمىز» كەرەك (ەۆرەيلەرگە 10:24). باۋىرلاستارعا بۇرىنعىدان دا كوبىرەك كوڭىل ٴبولۋدى ۇيرەنۋىمىز قاجەت، سوندا ولارعا مۇقتاج كەزدەرىندە جىگەر بەرە الامىز.
كىمدەر جىگەرگە مۇقتاج؟
3. ەلشى پاۋىل جىگەرلەندىرۋ تۋرالى نە ايتقان؟ (ماقالانىڭ باسىنداعى سۋرەتتى قاراڭىز.)
3 «سارىۋايىم جۇرەكتى كۇيزەلتەدى، جاقسى ٴسوز ونى شاتتىققا تولتىرادى» (ناقىل سوزدەر 12:25). ارا-تۇرا ٴبارىمىز دە جىگەرگە مۇقتاج بولامىز. پاۋىلدىڭ سوزدەرىنەن انىق كورىنەتىندەي، وزگەلەردى جىگەرلەندىرۋگە جاۋاپتى باۋىرلاستاردىڭ وزىنە دە جىگەر كەرەك. پاۋىل ريمدەگى باۋىرلاستارعا بىلاي دەپ جازعان: «سەندەردى كورۋگە قۇشتارمىن: رۋحاني سىيمەن ٴبولىسىپ، وزدەرىڭدى نىعايتسام، دالىرەك ايتقاندا، ٴبىر-بىرىمىزدىڭ سەنىمىمىزدى كورىپ، ٶزارا جىگەرلەنسەك ەكەن دەيمىن» (ريمدىكتەرگە 1:11، 12). كورگەنىمىزدەي، ٴتىپتى پاۋىلدىڭ ٶزى كەي كەزدەرى جىگەردى قاجەت ەتكەن (ريمدىكتەرگە 15:30—32 وقىڭىز).
4، 5. بۇگىندە كىمدەر جىگەرگە مۇقتاج جانە نەگە؟
4 قازىرگى تاڭدا ٴبىز ەحوباعا تولىق ۋاقىت قىزمەت ەتەتىن باۋىرلاستاردى، مىسالى قىزمەتتەرىن ادال اتقارىپ جۇرگەن ٸزاشارلاردى، جىگەرلەندىرە الامىز. ولاردىڭ كوبىسى ٸزاشار بولۋ ٷشىن وزدەرىنە ۇنايتىن نارسەلەردەن باس تارتقان. ميسسيونەرلەر، اۋداندىق باقىلاۋشىلار مەن ولاردىڭ ايەلدەرى، سونداي-اق فيليالداردا نە قاشىقتاعى اۋدارما كەڭسەلەرىندە قىزمەت ەتەتىن باۋىرلاستار دا سولاي ەتكەن. ولاردىڭ ٴبارى ەحوباعا كوبىرەك ۋاقىت قىزمەت ەتۋ ٷشىن قۇرباندىقتارعا بارۋدا. سوندىقتان ولار ٴبىزدىڭ جىگەرلەندىرۋىمىزگە ابدەن لايىق. بۇدان بولەك، تولىق ۋاقىتتى قىزمەتتەرىن ارى قاراي دا اتقارعىسى كەلەتىن، ٴبىراق ەندى اتقارا المايتىن باۋىرلاستار دا از ەمەس. ولاردى دا جىگەرلەندىرسەك، ٴبىر مارقايىپ قالادى.
5 ٴبىزدىڭ جىگەرلەندىرۋىمىزگە تاعى كىمدەر لايىق؟ «تەك يەمىزدىڭ ٸزباسارىنا شىعۋ كەرەك» دەگەن قۇدايدىڭ تالابىنا مويىنسۇنۋدى قالاپ، سالتباستى بولىپ جۇرگەن كوپتەگەن ەر-قىز باۋىرلاستاردى جىگەرلەندىرە الامىز (قورىنتتىقتارعا 1-حات 7:39). ەگەر كۇيەۋلەر ايەلدەرىنە جاقسى كورەتىندەرىن ايتىپ، جاساعان بارلىق ىستەرى ٷشىن ريزاشىلىق بىلدىرسە، ايەلدەرى جىگەرلەنىپ قالادى (ناقىل سوزدەر 31:28، 31). قۋعىن-سۇرگىنگە نە دەرتكە تاباندىلىقپەن ٴتوزىپ جۇرگەن باۋىرلاستارىمىز دا كۇش-جىگەرگە مۇقتاج (سالونيكالىقتارعا 2-حات 1:3—5). ەحوبا مەن يسا وسى ادال جانداردىڭ ٴبارىن جۇباتادى (سالونيكالىقتارعا 2-حات 2:16، 17 وقىڭىز).
اقساقالدار ٴبىزدى جىگەرلەندىرە الادى
6. يشايا 32:1، 2 دەن اقساقالداردىڭ قىزمەتى جايلى نە بىلەمىز؟
6 يشايا 32:1، 2 وقىڭىز. ٴبىز قيىن ۋاقىتتا ٶمىر ٴسۇرىپ جاتقاندىقتان، مۇڭ مەن كۇيزەلىسكە بوي الدىرۋىمىز وپ-وڭاي. يسا ٴماسىح «امىرشىلەر»، ياعني مايلانعان باۋىرلاستاردىڭ جانە باسقا قويلاردىڭ اراسىنداعى اقساقالدار ارقىلى ٴبىزدى جىگەرلەندىرەدى. قاۋىمداعى بۇل اقساقالدار «سەنىمىمىزگە ۇستەمدىك ەتپەيدى»، قايتا، قۋانىشتى بولۋىمىز ٷشىن بىزبەن «قىزمەتتەسەدى». ولار بىزگە باقىتتى بولۋعا جانە ادال بولىپ قالۋعا كومەكتەسكىلەرى كەلەدى (قورىنتتىقتارعا 2-حات 1:24).
7، 8. اقساقالدار وزگەلەردى سوزدەرىمەن جانە ىستەرىمەن قالاي جىگەرلەندىرە الادى؟
7 اقساقالدار پاۋىلدان ۇلگى السا بولادى. ول باۋىرلاستارىن ۇنەمى جىگەرلەندىرۋگە تىرىسقان. سالونيكاداعى قۋعىنعا ۇشىراعان ماسىحشىلەرگە ول بىلاي دەپ جازعان: «وزدەرىڭە اياۋلى سەزىمىمىز بولعاندىقتان، قۇدايدىڭ ىزگى حابارىن جەتكىزىپ قانا قويماي، جانىمىزدى بەرۋگە دايىن بولدىق، ويتكەنى وزدەرىڭدى جاقسى كورىپ كەتتىك» (سالونيكالىقتارعا 1-حات 2:8).
8 اقساقالدار وزدەرىنىڭ سوزدەرىمەن كەرەمەت جىگەرلەندىرە الادى. ٴبىراق بۇل كەيدە جەتكىلىكتى بولا بەرمەيدى. پاۋىل ەفەستەگى اقساقالدارعا بىلاي دەگەن: «السىزدەرگە جاردەم بەرۋ كەرەكتىگىن جانە يەمىز يسانىڭ «العاننان گورى بەرگەن باقىتتى» دەگەن سوزدەرىن ۇمىتپاۋ قاجەت» (ەلشىلەردىڭ ىستەرى 20:35). پاۋىل باۋىرلاستار ٷشىن «ٴبارىن قۋانا بەرىپ، ٶزىن دە ەش اياماعان». ولار ٷشىن بار جاقسىسىن ايامايتىنىن ىسىمەن كورسەتكەن (قورىنتتىقتارعا 2-حات 12:15). تۋرا سول سياقتى، اقساقالدار دا وزگەلەرگە سوزدەرىمەن عانا ەمەس، ىستەرىمەن دە جىگەر مەن جۇبانىش بەرۋلەرى كەرەك. وسىلاي ولار شىنىمەن قامىمىزدى ويلايتىندارىن كورسەتەدى (قورىنتتىقتارعا 1-حات 14:3).
9. اقساقالدار قالاي جىگەرلەندىرەتىندەي ەتىپ كەڭەس بەرە الادى؟
9 اقساقالدارعا كەيدە باۋىرلاستاردى نىعايتۋ ٷشىن كەڭەس بەرۋ قاجەت بولىپ جاتادى. ولار كەڭەستى قالاي جىگەرلەندىرەتىندەي ەتىپ بەرۋگە بولاتىنىن كيەلى كىتاپتان بىلە الادى. يسا ٶلىپ، قايتا تىرىلگەننەن كەيىن كىشى ازياداعى قاۋىمدارعا حابار جىبەرگەن كەزدە، كەڭەس بەرۋگە قاتىستى تاماشا ۇلگى كورسەتتى. ول ەفەستەگى، پەرگام مەن تياتيراداعى قاۋىمدارعا بىرنەشە قاتاڭ كەڭەس بەرگىسى كەلدى. ٴبىراق ول الدىمەن ولاردى جاساپ جۇرگەن بار يگى ىستەرى ٷشىن ماقتاپ الدى (ايان 2:1—5، 12، 13، 18، 19). يسا لاۋديكيدەگى قاۋىمعا بىلاي دەگەن: «كىمدى جاقسى كورسەم، سونى اشكەرەلەپ، جونگە سالامىن. سول سەبەپتى ىنتالى بول جانە وكىن» (ايان 3:19). اقساقالدارىمىز كەڭەس بەرگەندە، يساعا ەلىكتەۋگە تىرىسادى.
وزگەلەردى جىگەرلەندىرۋ اقساقالداردىڭ عانا مىندەتى ەمەس
اتا-انالار، بالالارىڭىزعا وزگەلەردى جىگەرلەندىرۋدى ۇيرەتىپ ٴجۇرسىز بە؟ (10-ابزاستى قاراڭىز)
10. ٴبارىمىز دە ٴبىر-ٴبىرىمىزدى قالاي نىعايتا الامىز؟
10 وزگەلەردى جىگەرلەندىرۋ اقساقالداردىڭ عانا مىندەتى ەمەس. ەلشى پاۋىل بارلىق ماسىحشىلەردى «جاقسى سوزدەر» ايتۋعا تالپىندىرعان. بۇل سوزدەر وزگەلەردى «قاجەت كەزىندە نىعايتىپ، پايدالارىنا اسپاق» ەدى (ەفەستىكتەرگە 4:29). باسقالارعا قول ۇشىن بەرە الۋ ٷشىن، ولاردىڭ نە نارسەگە مۇقتاج ەكەنىن ٵرقايسىسىمىز اڭعارا ٴبىلۋىمىز كەرەك. پاۋىل ەۆرەي ماسىحشىلەرگە بىلاي دەپ جازعان: «السىرەگەن قولدار مەن تىزەلەردى نىعايتىڭدار. اقساپ جۇرگەندەر ودان بەتەر جاراقاتتانىپ قالماي، قايتا، ساۋىعۋ ٷشىن، اياقتارىڭنىڭ استىنا ٴتۇزۋ جول سالىڭدار» (ەۆرەيلەرگە 12:12، 13). ٴبارىمىز دە، ٴتىپتى جاسى كىشىلەر دە، ٴبىر-ٴبىرىمىزدى سوزىمىزبەن جىگەرلەندىرىپ، نىعايتا الامىز.
11. جان كۇيزەلىسىندە جۇرگەن كەزدە اليناعا نە كومەكتەستى؟
11 اليناa ەسىمدى باۋىرلاس ٴبىراز ۋاقىت جان كۇيزەلىسىندە جۇرگەن. ول بىلاي دەپ جازدى: «ٴبىر كۇنى قۇدايدان جىگەر سۇراپ دۇعا ەتكەننەن كەيىن، جاسى ۇلكەن ٴبىر ايەل باۋىرلاستى كەزدەستىردىم. ول ماعان كوڭىل ٴبولىپ، جاناشىرلىق تانىتتى. سول ۋاقىتتا بۇعان اسىرەسە مۇقتاج بولىپ جۇرگەن ەدىم. سوسىن ول مەنىكىندەي سىناقتى باستان كەشكەنىن ايتىپ بەردى. سوندا ٶزىمنىڭ جالعىز ەمەس ەكەنىمدى ٴتۇسىندىم». ايتقان سوزدەرى اليناعا قانشالىقتى كومەكتەسكەنىن بۇل باۋىرلاس ٴتىپتى بىلمەگەن دە شىعار!
12، 13. فىلىپىلىكتەرگە 2:1—4 تارماقتارداعى كەڭەستى قالاي قولدانا الامىز؟
12 پاۋىل فىلىپىدەگى باۋىرلاستارعا بىلاي دەپ جازعان: «ماسىحپەن بايلانىستاعى سەندەر ٴبىر-ٴبىرىڭدى جىگەرلەندىرسەڭدەر، سۇيىسپەنشىلىكپەن جۇباتساڭدار، ٴبىر-بىرىڭنىڭ قامدارىڭدى ويلاساڭدار، بار كوڭىلمەن جاقسى كورىپ، جاناشىرلىق تانىتساڭدار، مەنىڭ قۋانىشىمدى ارتتىراسىڭدار. سوندىقتان نيەتتەس بولىڭدار، ٴبىر-ٴبىرىڭدى سۇيىڭدەر، ٶزارا بىرلىكتە ٵرى پىكىرلەس بولىڭدار. كۇنشىل نە اتاققۇمار بولماي، قايتا، كىشىپەيىلدىلىكپەن باسقالاردى وزدەرىڭنەن جوعارى قويىڭدار. تەك ٶز مۇددەلەرىڭدى ەمەس، باسقالاردىڭ دا مۇددەسىن ويلاڭدار» (فىلىپىلىكتەرگە 2:1—4).
13 بارلىعىمىز دا ٴبىر-بىرىمىزگە كومەكتەسۋدىڭ جولدارىن ىزدەپ ٴجۇرۋىمىز كەرەك. باۋىرلاستارىمىزدى «سۇيىسپەنشىلىكپەن جۇباتۋ» ارقىلى، «قامدارىن ويلاۋ» ارقىلى، «بار كوڭىلمەن جاقسى كورىپ، جاناشىرلىق تانىتۋ» ارقىلى جىگەرلەندىرە الامىز.
جىگەرلەندىرۋدىڭ كەيبىر جولدارى
14. جىگەر بەرۋدىڭ ٴبىر جولى قانداي؟
14 كەزىندە ٴبىز كومەكتەسكەن قانداي دا ٴبىر ادامنىڭ ادالدىق ساقتاپ كەلە جاتقانىن ەستىسەك، قاتتى قۋانىپ قالامىز. ەلشى جوحان: «مەن ٷشىن بالالارىمنىڭ شىندىق جولىندا جۇرگەنىن ەستۋدەن ارتىق قۋانىش جوق!»— دەپ جازعان (جوحاننىڭ 3-حاتى 4). كوپتەگەن ٸزاشارلار بۇرىن وزدەرى شىندىقتى بىلۋگە كومەكتەسكەن ادامنىڭ ەحوباعا ادالدىقپەن قىزمەت ەتىپ كەلە جاتقانىن، ٴتىپتى ٸزاشار بولىپ جۇرگەنىن بىلسە، ٴماز-مەيرام بولادى. ەندەشە، ٸزاشارلاردىڭ ەڭسەسى ٴتۇسىپ جۇرسە، ولاردىڭ وزگەلەر ٷشىن جاساعان بار يگى ىستەرىن ەستەرىنە سالساق بولادى.
15. ەحوباعا ادال قىزمەت ەتىپ جۇرگەندەردى جىگەرلەندىرۋ ٷشىن نە ىستەي الامىز؟
15 كوپ اۋداندىق باقىلاۋشىلاردىڭ ايتۋىنشا، قانداي دا ٴبىر قاۋىمعا ساپار جاساعاننان كەيىن قىسقاشا العىس حات العاندا، وزدەرى دە، ايەلدەرى دە جىگەرلەنىپ قالادى ەكەن. ەحوباعا ادال قىزمەت ەتىپ جۇرگەن اقساقالدار، ميسسيونەرلەر، ٸزاشارلار مەن بەتەلدىكتەر جايلى دا سولاي دەۋگە بولادى. العىسىمىزدى ٴبىلدىرۋ ارقىلى ولارعا ٶزىمىز ويلاعاننان دا زور جىگەر سىيلاي الامىز.
قالاي بارلىعىمىز ٴبىر-بىرىمىزگە جىگەر بەرە الامىز؟
16. بىرەۋدى جىگەرلەندىرۋدىڭ قانداي قاراپايىم جولدارى بار؟
16 وزگەلەرگە دەگەن سەزىمىڭىزدى اشىق ايتۋعا قىسىلاسىز با؟ نەگىزى، وزگەلەردى جىگەرلەندىرۋ سونشالىقتى قيىن ەمەس. بىرەۋگە كۇلىمسىرەپ قاراۋعا تىرىسىپ كورىڭىز. ەگەر ول ادام سىزگە كۇلىمدەمەسە، بالكىم ول ٴبىر قيىندىققا كەزىگىپ، شەر تارقاتاتىن ادامعا مۇقتاج بولىپ جۇرگەن شىعار. ولاردى جاي قۇلاق سالىپ تىڭداۋ ارقىلى كوڭىلدەرىنە مەدەت بولا الاسىز (جاقىپ 1:19).
17. ٴبىر جاس باۋىرلاستى نە جىگەرلەندىردى؟
17 اندرەي ەسىمدى جاس باۋىرلاستىڭ بىرنەشە جاقىن تۋىسى ەحوباعا قىزمەت ەتۋدى دوعارعاندا، ول قاتتى جابىرقايدى. ولاردىڭ ىشىندە اقساقال بولىپ قىزمەت ەتكەن اكەسى دە بار ەدى. اندرەيدىڭ كوڭىلسىز جۇرگەنىن بايقاعان اۋداندىق باقىلاۋشى ونى بىرگە كوفە ٸشىپ قايتۋعا شاقىرادى. ول اندرەيدىڭ مۇڭ-شەرىن مۇقيات تىڭدايدى. سوندا اندرەي ٶزى ادال بولىپ قالسا عانا، وتباسىنا شىندىققا ورالۋعا كومەكتەسە الاتىنىن تۇسىنەدى. ٴزابۇر 46-تاراۋداعى، سافونيا 3:17 مەن مارقا 10:29، 30 داعى سوزدەر دە وعان زور جۇبانىش بەرەدى.
وزگەلەردى جىگەرلەندىرۋ بارلىعىمىزدىڭ قولىمىزدان كەلەدى (18-ابزاستى قاراڭىز)
18. ا) سۇلەيمەن پاتشا جىگەرلەندىرۋگە قاتىستى نە دەگەن؟ ٵ) ەلشى پاۋىل قانداي كەڭەس بەرگەن؟
18 الينا مەن اندرەيدىڭ جاعدايىنان قانداي ساباق الامىز؟ كەز كەلگەنىمىز جىگەرگە مۇقتاج بولىپ جۇرگەن باۋىرلاستىڭ رۋحىن كوتەرە الامىز. سۇلەيمەن پاتشا بىلاي دەگەن: «ۋاقىتىندا ايتىلعان ٴسوز قانداي جاقسى! جايناعان كوز [نەمەسە «كۇلىمدەگەن كوزبەن قاراۋ»] جۇرەكتى قۋانتار، جاقسى حابار سۇيەككە كۇش-قۋات دارىتار» (ناقىل سوزدەر 15:23، 30). الدە بىرەۋدىڭ جىگەرى قۇم بولىپ نە مۇڭايىپ جۇرگەنىن بايقاعانسىز با؟ نەلىكتەن وعان «كۇزەت مۇناراسى» جۋرنالىنان نە تور بەكەتىمىزدەن بىردەڭە وقىپ بەرۋ سياقتى قاراپايىم نارسە جاساماسقا؟ پاۋىل پاتشالىق اندەرىن قوسىلىپ شىرقاۋدىڭ دا كوڭىلگە جاي بەرەتىنىن ايتقان. ول: «ٴزابۇر جىرلارى، ماداقتاۋ ولەڭدەرى جانە ريزاشىلىققا تولى رۋحاني اندەرمەن ۇنەمى ٴبىر-بىرىڭە ٴتالىم بەرىپ، جىگەرلەندىرىڭدەر. ەحوباعا شىن جۇرەكتەن ٵن ايتىڭدار»،— دەپ جازعان (قولوستىقتارعا 3:16؛ ەلشىلەردىڭ ىستەرى 16:25).
19. نەگە جاقىندا جىگەرلەندىرۋدىڭ ماڭىزدىلىعى بارعان سايىن ارتا بەرمەك جانە ٴبىز نە ىستەۋىمىز قاجەت؟
19 ەحوبانىڭ كۇنى جاقىنداعان سايىن، ٴبىر-ٴبىرىمىزدى جىگەرلەندىرۋ بۇرىنعىدان بەتەر ماڭىزدى بولا تۇسپەك (ەۆرەيلەرگە 10:25). پاۋىلدىڭ: «ٴبىر-ٴبىرىڭدى جۇباتىپ، نىعايتىپ جۇرگەندەرىڭدەي، ارى قاراي دا سولاي ەتە بەرىڭدەر»،— دەگەن كەڭەسىنە قۇلاق اسساق، قۋانىشقا كەنەلەمىز (سالونيكالىقتارعا 1-حات 5:11).
a ەسىمدەر وزگەرتىلگەن.