Мұсаның 1-жазбасы
34 Жақыптың Лиядан туылған қызы Дина+ сол жердің қыздарына барып, араласып тұратын+. 2 Оған сол өлкенің әкімі хевтік+ Хамордың ұлы Сихемнің көзі түсті. Бір күні ол қызды әкетіп, зорлады. 3 Жігіттің Динаға көңілі кетіп, ғашық болып қалды, сөйтіп, оған сезімін білдіре бастады. 4 Кейін ол әкесі Хаморға+: “Бұл қызды маған әйелдікке алып беріңіз”,— деді.
5 Жақып Сихемнің Динаны абыройынан айырғанын естігенде, ұлдары далада мал бағып жүрген болатын. Сондықтан олар келгенше, әкелері үндемеді. 6 Кейінірек Сихемнің әкесі Хамор Жақыппен сөйлесуге келді. 7 Далада жүрген Жақыптың ұлдары бұны естігенде, дереу үйлеріне оралды. Жақыптың қызын зорлап, Исраилді масқаралағаны олардың жанына қатты батып, ашуға булықты+. Өйткені бұл сорақы іс еді+.
8 Хамор оларға былай деді: “Ұлым Сихемнің қыздарыңызға қатты көңілі кетіпті. Оны ұлыма берсеңіздер екен. 9 Қыз алысып, қыз берісіп, құдандалы болайық+. 10 Бізбен бірге тұра беріңіздер, біздің жеріміз сіздің жеріңіз болсын. Осында қалып, сауда-саттық жасап, қоныс тебіңіздер”. 11 Кейін Сихем Динаның әкесі мен бауырларына былай деді: “Не қаласаңыздар, соны беремін, тек көңілдеріңізден шықсам болғаны. 12 Қыз үшін қалың мал мен сыйлықтарды мейлінше көп сұрай беріңіздер, беруге дайынмын+. Тек қыздарыңызды маған қоссаңыздар екен”.
13 Қарындастары Динаны зорлағандықтан, Жақыптың ұлдары Сихем мен әкесі Хаморды алдамақ болып, 14 былай деді: “Қарындасымызды сүндеттелмеген жігітке қоса алмаймыз+. Бұл біз үшін масқара болады. 15 Біздің келесідей шартымыз бар: араларыңыздағы еркек кіндіктінің бәрі біз сияқты сүндеттелсін+. 16 Сонда ғана қыз алысып, қыз берісеміз, әрі осы жерге қоныс теуіп, сіздермен бір ел боламыз. 17 Ал егер шартымызға көнбей, сүндетке отырмасаңыздар, қызымызды алып, бұл жерден кетеміз”.
18 Бұл сөздер Хаморға+ да, ұлы Сихемге+ де ұнады. 19 Жас жігіт қойылған шартты орындауға бірден кірісті+, өйткені Жақыптың қызын қатты ұнатып қалған еді. Мұның үстіне, ол әкесінің үйінде ең беделді адам болатын.
20 Сонымен, Хамор мен оның ұлы Сихем қала қақпасының алдына барып, сондағы жұртқа+ былай деді: 21 “Бұл адамдар бізбен тату болғысы келеді екен. Олар сауда-саттық жасап, бізбен бірге тұра берсін, жер бәрімізге жетеді. Олардың қыздарын өзімізге алып, өз қыздарымызды оларға берейік+. 22 Осы жерге қоныс теуіп, бізбен бір ел болғанын қаласақ, тек бір шарттарын орындасақ болғаны: арамыздағы еркек кіндіктінің бәрі олар сияқты сүндеттелу керек+. 23 Сонда олардың дүние-мүлкі, отар-табындары мен жиған-тергендері біздікі болмай ма?! Ендеше, олар бізбен бірге тұрсын десек, шарттарын қабыл алайық”. 24 Жұрт Хамор мен ұлы Сихемнің сөзіне құлақ асып, қаладағы еркектердің бәрі сүндеттелді.
25 Үшінші күні, қаладағы адамдар әлі ауырып жатқан кезде, Жақыптың екі ұлы Шимон мен Леуі, яғни Динаның ағалары+, қолдарына семсер алып, ешкімге күдік туғызбай қалаға кіріп, еркек кіндіктінің бәрін қырып салды+. 26 Олар Хаморды да, ұлы Сихемді де семсермен шауып өлтірді. Сөйтіп, қарындастары Динаны Сихемнің үйінен алып кетті. 27 Осы қалада қарындастары масқараланғандықтан+, Жақыптың басқа ұлдары да келіп, ер адамдары қырылып жатқан қаланы талан-тараж етті. 28 Олардың ірілі-ұсақты малдарын, есектерін, қаланың іші-сыртындағының бәрін, 29 сондай-ақ бар мүлкін алып, әйелдер мен балаларды тұтқындап, үйлерін тонап кетті.
30 Сонда Жақып Шимон мен Леуіге+: “Сендер мені осы жерде тұратын қанахандықтар мен перездіктерге жеккөрінішті етіп, басымды үлкен пәлеге қалдырдыңдар. Менің адамдарым азғана. Әлгілер жиналып келіп шабуылдаса, мені үй ішіммен қоса қырып тастайды”,— деді. 31 Бұған олар: “Ал қарындасымызға жезөкшеге қарағандай қарауға бола ма екен?!”— деп жауап қатты.