Самуилдің 1-жазбасы
22 Бұдан кейін Дәуіт ол жерден+ Адоллам үңгіріне барып жасырынды+. Бауырлары мен әкесінің үй іші мұны естігенде, бәрі оның қасына ылдилап барды. 2 Барлық қысымшылық көрген, қарызға батқан, ашынған адамдар да оның қасына шоғырланып, Дәуіт олардың басшысына айналды. Осылай оның қарамағында 400-дей адам болды.
3 Біраз уақыт өте Дәуіт ол жерден Моаб жеріндегі Миспаға барып, Моаб патшасынан+: “Құдайдың маған деген ниетін біліп алғанша, әке-шешем сіздің қарамағыңызда болсыншы”,— деп өтінді. 4 Осылай әке-шешесін Моаб патшасының қарамағына қалдырды. Дәуіт таулы жерлерде жасырынып жүрген кездің бәрінде олар сонда тұрды+.
5 Біраз уақыт өткен соң Ғад+ пайғамбар Дәуітке: “Таулы жерлерде жасырынып жүре бермей, Яһуда жеріне бар+”,— деді. Сондықтан ол Херет орманына келді.
6 Саул Дәуіт пен адамдарының қайда жүргені туралы естіді. Бұл кезде ол Гибеядағы+ төбе басында жыңғыл ағашының түбінде қолына найза ұстап отырған болатын. Ал қызметшілері айнала қоршап тұрды. 7 Сонда Саул оларға былай деді: “Бенияминдіктер, сөзіме құлақ салыңдаршы. Есей ұлы+ да мен сияқты барлығыңа егіндік пен жүзімдік бере ме? Әлде бәріңді мыңбасы, жүзбасы етіп тағайындай ма+? 8 Барлығың маған қарсы сөз байласып алғансыңдар: баламның Есей ұлымен серт байласқаны+ жөнінде бірде-біреуің айтпадыңдар. Ешқайсысың маған жандарың ашып, туған баламның құлымды маған қарсы қойғанын хабарламадыңдар. Енді, міне, ол менің ізімді торып жүр”.
9 Сонда Саулдың қызметшілерінің үстінен қарауға қойылған едомдық Дойық+: “Мен Есей ұлының Ноб қаласына, Ахитұп ұлы Ахимәлікке+ келгенін көрдім+. 10 Ол Дәуіт үшін Ехобадан басшылық сұрады, оған азық-түлік, тіпті філістір Ғолияттың семсерін де берді+”,— деді. 11 Мұны ести сала, патша Ахитұптың ұлы діни қызметкер Ахимәлік пен оның әкесінің әулетін түгел шақыртуға кісі жіберді. Сөйтіп, Нобтағы діни қызметкерлердің бәрі оның алдына келді.
12 Сонда Саул: “Сөзіме құлақ салшы, Ахитұп ұлы”,— деді. Ол: “Тыңдап тұрмын, тақсыр”,— деп жауап берді. 13 Саул мынаны айтты: “Есей ұлы екеуің неге маған қарсы сөз байластыңдар? Сен оған нан мен семсер беріп, ол үшін Құдайдан басшылық сұрапсың. Енді, міне, ол маған қарсы шығып, ізімді торып жүр”. 14 Ахимәлік бұған: “Дәуіттей сенімді қызметшіңіз бар ма+?! Ол — күйеубалаңыз+, әрі оққағарлар басшысы. Сіздің үй ішіңіз де оны құрметтейді+. 15 Мен Дәуіт үшін бүгін бірінші рет Құдайдан басшылық сұрады дейсіз бе+? Сізге қарсы сөз байласу ойымда да болған жоқ! Патшам, құлыңыз бен оның әкесінің бүкіл әулетін айыптай көрмеңіз. Өйткені құлыңыз бұл жайлы ештеңе білген жоқ+”,— деп жауап берді.
16 Бірақ патша: “Ахимәлік, өзің де, әкеңнің әулеті де түгел өлесіңдер!”+— деді. 17 Сосын қасындағы сақшыларға былай деп бұйырды: “Барыңдар, Ехобаның діни қызметкерлерін өлтіріңдер! Бұлар да Дәуіттің жағында: оның қашып бара жатқанын біле тұра, маған хабарламады”. Алайда қызметшілері Ехобаның діни қызметкерлеріне қол көтергілері келмеді. 18 Сонда патша Дойыққа+: “Бар, оларды сен өлтір!”— деп бұйырды. Сол-ақ екен едомдық+ Дойық барды да, діни қызметкерлерді қырып салды. Сол күні ол зығыр ефод киген 85 кісіні өлтірді+. 19 Дойық тіпті діни қызметкерлердің қаласы Нобқа+ барып, ондағыларды еркек-әйел демей, жас бала, нәресте демей — бәрін семсермен шауып өлтірді. Ірілі-ұсақты малы мен есектерін де аман қалдырмады.
20 Ахитұп ұлы Ахимәліктің Әбиятар+ деген ұлы ғана аман қалып, бассауғалап Дәуітке қашып барды. 21 Ол Дәуітке Ехобаның діни қызметкерлерін Саулдың қырып тастағанын айтып берді. 22 Сонда Дәуіт оған: “Сол күні едомдық Дойықты көргенде, Саулға бәрін жеткізетінін біліп едім+. Әкеңнің бүкіл әулетінің өліп кеткеніне мен кінәлімін. 23 Қасымда қал. Еш қорықпа. Менің жанымды алғысы келгендер, сенің де жаныңды алғысы келеді. Мен саған пана болайын+”,— деді.