Қорынттықтарға 2-хат
13 Мен үшінші рет өздеріңе бармақпын. “Әрбір іс екі не үш куәгердің сөзімен дәлелденуі тиіс”+. 2 Қазір қастарыңда болмасам да, сөздерімді екінші рет араларыңда жүріп айтқандай қабылдаңдар. Бұрын күнә жасағандарға да, қалғандарыңа да алдын ала ескертемін, егер тағы келер болсам, мұндайларды аямаймын. 3 Осылайша Мәсіх шынымен мен арқылы сөйлейтінін дәлелдеймін. Ол сендерге қатысты әлсіздік танытып жатқан жоқ, қайта, құдіретпен әрекет етуде. 4 Рас, ол әлсіз болғандықтан, бағанаға ілінді, бірақ қазір Құдайдың құдіретінің арқасында тірі+. Оның әлсіз болғаны сияқты біздің де қазір әлсіз екеніміз рас, бірақ өмірлеріңде әрекет етіп жатқан Құдайдың құдіретінің арқасында онымен бірге өмір сүреміз+.
5 Сенім жолындасыңдар ма, жоқ па — соны тексеріп тұрыңдар, әрі кім екендеріңе көз жеткізу үшін өздеріңді үнемі тексеріп отырыңдар+. Әлде Иса Мәсіхпен бірлікте екендеріңді білмейсіңдер ме? Құдайдың ықыласынан айырылып қалмасаңдар ғана, онымен бірліктесіңдер. 6 Ал біздің Құдай ықыласынан айырылмағанымызға көз жеткізесіңдер деп үміттенемін.
7 Сендер еш жамандық жасамасын деп Құдайға дұға етеміз. Ондағы мақсатымыз — өзімізді ықыласқа ие болғандай етіп көрсету емес, қайта, ықыластан айырылып қалғандай болып көрінсек те, сендердің игі істер жасағандарың. 8 Себебі біз шындыққа қарсы ештеңе істей алмаймыз, тек шындық үшін істейміз. 9 Біз әлсіз, ал сендер күшті болған кездің бәрінде қуанамыз. Сондай-ақ сендер түзелсе екен деп дұға етудеміз. 10 Сондықтан Иеміз маған күйретуге емес, нығайтуға берген билікті қастарыңда болғанда қатаң қолдануға мәжбүр болмауым үшін+, бұларды өздеріңнен алыста жүргенде жазып отырмын.
11 Сонымен, бауырластар, қуана беріңдер, түзеле беріңдер, жігер ала беріңдер+, әрдайым ойларың бір жерден шықсын+, тату өмір сүріңдер+. Сонда сүйіспеншілік пен тыныштықтың Құдайы+ сендермен бірге болады. 12 Бір-біріңді бауырластық сүйіспеншілікпен сүйіп амандасыңдар. 13 Қасиеттілердің бәрі сендерге сәлем жолдауда.
14 Барлығың да Иеміз Иса Мәсіхтің рақымы мен Құдайдың сүйіспеншілігіне кенеліңдер, киелі рухқа үлестес болыңдар.