Anaanap inoorlaajutiminut asanninnera

PINEQARTOQ tassaavoq qitsuk pigineqanngitsoq, naatsunik meqqulik ateqanngitsoq tallimanik piaralik New Yorkip ilaani aqqusinipalaani uumaannarniarluni ilungersorsimasoq. Biilit inikuanni nakkaateqqajaasumi ikuallatseriarneqakulaqisumi inissarsisimavoq. Piaqqani inuussutissaqartikkumallugit eqqaaviit eqqaminniittut nerisakusiorfigisariaqartarpai.

1996-imili marsip 29-ani ullaakkut nalunaaqutaq 6.06 inuuneranik allanngortitsilluinnartumik pisoqarpoq. Qitsuup angerlarsimaffia ikuallalerpoq. Inneq biilit inikuannut siaruaatipallappoq. Qatserisartut takkupput, erniinnarlu inneq qamikkiartulerpoq. David Giannellip, qatserisartut ilaata, piaqqat kappialarpaluat tusalerpaa. Ikuallattup silatinnguani pingasut nassaarai, sisamaat aqqusernup akiatungingajaani, tallimaallu pisuinnaat aqqusernanni. Piaqqat taama mikitigalutik namminneq anisimanavianngillat. Giannellip malugaa piaqqat ilaat ilaminnit uutiternerusimasut, tassa anaanamik ataasiakkaarlutik annissormatik ilaat sivisunerusumik utaqqisimagamik.

Oqaluttuami aviisimi Daily News-imi 7. apriili 1996-imoortumi saqqummiunneqartumi anaanap uutitersimanera isumassuineralu ima oqaatigineqarput: „Anaanaq sanaartorfikumi qanittumiittumi anniarnermit aqullaaginnarsimasoq Giannellip nassaarisimavaa. Nalligiummertorujussuusimavaa. Qitsuup isai putsumit pullangaaramik mamissimapput. Alumigut uutitersimasorujussuuvoq. Kiinnamigut, siutimigut nissumigullu kusanaatsunik uutiterneqarpoq. Giannellip anaanaq piaraalu papkassimut qajassuartumik ikisimavai. ’Anaanaat uissinnaanngilarluunniit,’ Giannelli oqarpoq. ’Taamaakkaluartorli piaqqani kisinniarlugit ataasiakkaarlugit isikkaminik attoqattaarpai.’“

Qitsuit inuunerup toqullu akornanniittut uumasunik paaqqinnittarfimmut North Shore Animal Leaguemukaanneqarput. Oqaluttuaq nangippoq: „Sukumiisumik nakorsarneqalerput. Qitsuk anaanaq sapiitsoq antibiotikamik kapineqarpoq, ikiilu tarnummik antibiotiskiusumik qajassuartumik taninneqarput. Sulisut tamarmik pissanngateqaat anersaartorneranik ikiorniarlugu karsimut iltilersuutitut atortumut ikineqarmat . . . Nalunaaquttap-akunneri 48-t qaangiuttut sapiitsuliorsimasoq massippoq. Isai pullattut uisapput, ajoqutaanillu allanik nakorsat nassaanngillat.“

Eqqarsaatigeriassagit! Takorlooriassagit anaanaq sapiitsoq taanna innermut qunugaluarluni ikuallattumut putsumik ulikkaartumut isertoq piaqqani kappialasut annaanniarlugit. Piarannguakkuluni anninniarlugit ataasiaannarluniluunniit iseraluarpat tupinnassagaluarpoq; tallimariarlunili taamaaliormat, pinerit tamaasa isikkamigut kiinnamigullu uutiternerminik anniaraluaqaluni, paasissaanngingajappoq. Qitsuk sapiitsoq taanna Scarlettimik (aappallorissoq) atserneqarpoq uutiternerisa amia aappaluttunngortissimammassuk.

Anaanap inoorlaajutiminut asanninneranik oqaluttuaq killitsinnartoq tamanna North Shore Animal Leaguep tamanut saqqummiummagu inuit siarnguttorsuupput. Inuit 6000-einit amerlanerusut, ilaatigut Japanimit, Hollandimit aamma Afrika–Kujallermit, Scarlett apersuutigalugu sianerput. 1500-t missingi Scarlettimik piaraanillu ’meerarsiartaarinninnissaminnik’ neqerooruteqarput. Piaqqat ilaat ataaseq kingusinnerusukkut toquvoq.

Scarlettimik oqaluttuaq nunarsuarmi tamarmi inunnit killitsissutigineqaqaaq. Imaassinnaavoq nunarsuarmi arnarpassuit naartuersittartut tamanna eqqarsalissutigileraat. gE 22/9 96

[Qupp. 18-mi suminngaanneernera]

North Shore Animal League