Angut arnarlu siulliit

ASSILIAQ una siuliminit sukkut allaassuteqarpa? Inoqarpoq. Tassaapput angut arnarlu siulliit. Kia pinngortippai? Guutip. Taassuma aqqa nalunngiliuk? Tassaavoq Jehova. Angullu ateqarpoq Adam arnarlu Eva.

Jehova Guutip imaaliorluni Adam pinngortippaa. Issoq nunap ilaa tiguaa timiliorlunilu naammalluinnartumik, angutip timaanik. Taava angutip sorluisigut sulluarpoq. Adamilu uummarpoq.

Jehova Guutip Adam suliassaqartippaa. Adam peqquaa uumasut atsersoqqullugit. Adamip uumasut sivisuumik isigisimassavai eqqortumik atserumallugit. Adamip uumasut atsersortillugit, malugisaqalerpoq. Suna malugileraa nalunngiliuk?

Uumasut tamarmik aappaqarput. Nagguaatsut angutiviaapput arnaviaallutillu, liivillu angutiviaapput arnaviaallutillu. Adamili aappaqanngilaq. Taava Jehovap Adam itisuumik sinitsippaa najungasuisalu ilaat peerlugu. Najungasoq taanna atorlugu Jehova arnaliorpoq Adamip nuliassaanik.

Adam nuannaaqaaq. Takorlooriarullu Eva qanoq nuannaartigisoq naatsiivimmut taama alianaatsigisumut inissinneqarami! Qitorniorsinnaalerput pilluarlutillu inooqatigiissinnaalerlutik.

Jehovap kissaatigaa Adam Evalu naassaanngitsumik inuussasut. Nuna tamaat Edenip naatsiiviatut kusanartigisunngorteqquaa. Tamanna naammassissallugu eqqarsaatigigaangamikku Adam Evalu nuannaartassaqaat! Suleqataajumassagaluarpit nuna naatsiivinngortissallugu kusanartoq? Adamilli Evallu pilluarnerat sivisunngilaq. Suna pissutaasoq paasiniariartigu.