Guutip angut arnarlu siulliit pinngortippai

Jehova Edenimi naatsiiviliorpoq. Naatsiivik naasunik, orpinnik uumasunillu ulikkaarpoq. Taava Guutip inuk siulleq, Adami, pinngortippaa. Issumit pinngortippaa sorluisigullu sulluarlugu. Taava susoqartoq nalunngiliuk? Adami pinngor­titanngorpoq uumassuseqartoq! Jehovap naatsiivimmik paarsisus­sanngortippaa uumasullu tamaasa qanoq taagorneqar­nissaannik suliassillugu.

Jehovap Adami pingaarutilerujus­suarmik ima oqarfigaa: ‘Naatitat orpinniittut tamaasa nerisin­naavatit. Orpilli ataaseq immikkut ittoq neriffigis­sanngilat. Neriffigigaluarukku toqussaatit.’

Kingusin­nerusukkut Jehova oqarpoq: ‘Adamip ikiortissaanik pinngor­titsissaanga.’ Taava Adami itisuumik sinitsippaa, najungasuisalu ilaat atorlugu nuliassaanik pinngor­titsivoq. Arnarlu taanna Evamik atserneqarpoq. Adami Evalu ilaqutariin­ngorput siulliit. Adamip nuliartaani qanoq isumaqarfigaa? Nuannaangaarami oqarpoq: ‘Takuuk Jehovap najungasunnik pinngortitaa. Kiisami kisimiik­kunnaarlunga inoqateqalerpunga!’

Jehovap Adami Evalu oqarfigai meeqqiussasut nunarsuaq inoqaler­niassammat. Kissaatigaa nuannaarlutik suleqatigiissasut nunarsuarlu tamaat naatsiivittut Edenitut kusanar­tigisumik paratiisin­ngortissagaat. Allatulli pisoqarpoq. Sooruna? Tamanna kapitalip tulliani paasissavarput.