Neriusaaq siulleq

ILAQUTANILU umiarsuarmit niugamik Noa siullermik qanoq iliortoq nalunngiliuk? Guutimut pilliivoq. Assilissami matuma ataaniittumi taamaaliornera takusinnaavat. Noa uumasunik pilliivoq Guuti qutsavigiumallugu ilaquttanilu ulersuarmit annaammatik.

Isumaqarpit Jehovap pilliut taanna nuannarigaa? Aap, nuannaraa. Taava Noa neriorsorpaa silarsuaq ulersuakkut aseroqqikkumanagu.

Erniinnaq nuna panerluinnarpoq, taavalu Noap ilaqutaasalu umiarsuup silataani inuuneq aallartippaat. Guutip pilluaqquai oqarfigalugillu: ’Amerlasuunik qitornartaartassaasi. Amerliartussaasi nunarsuup tamarmi inoqalernisaata tungaanut.’

Kingornali, inuit ulersuaq tusaraangamikku, immaqa ulersuup nalliuteqqinnissaa siooragisassavaat. Taamaattumik Guuti iliuuseqarpoq inuit neriorsuutiminik eqqaasikkumallugit ulersuaq nunamut tamarmut nalliutiteqqikkumaarnagu. Eqqaasissallugit sumik iliuuseqartoq nalunngiliuk? Neriusaaliorpoq.

Siallereernerani seqinneraangat neriusaaq qilammi takussaasarpoq. Neriusaat qalipaatigissaartarput. Neriusaamik takunikuuit? Assilissami takusinnaaviuk?

Guuti ima oqarpoq: ’Neriorsuivunga inuit uumasullu tamaasa ulersuarmi nungutitaaqqinngisaannassasut. Neriusaaq nuissanut pisippara. Neriusaarlu takkukkaangat, takusassavara neriorsuutigalu eqqaasarlugu.’

Taava neriusaaq takugaangakku suna eqqaasassaviuk? Guutip neriorsuutaa, silarsuaq ulersuakkut nungutitaaqqinngisaannassasoq.