Jakob Karaniliartoq

ANGUTIT Jakobip oqaloqatigisai kikkuusut nalunngiligit? Ullorpassuit ingerlareerluni Jakobip puilasuliap eqqaani taakku naapippai. Savaatiminnik paarsipput. Jakobip aperai: ’Suminngaanneerpisi?’

’Karanimeersuuvugut,’ oqarput.

’Laban nalunngilisiuk?’ Jakobip aperai.

’Aap,’ akivaat. ’Takuuk, aajuna pania Rakel savaataanik aggiussivoq.’ Rakel aggersoq takusinnaaviuk?

Rakelip angummi savaatai aggiukkai takuleramiuk Jakobip ujarak puilasuliap paavanit illikartikkiartorpaa savat imersinnaaqqullugit. Taava Jakobip Rakel kunippaa nalunaarfigalugulu kinaassutsiminik. Rakel nuannaartorujussuanngorpoq angerlarlunilu ataatani Laban oqaluttuullugu.

Labanip nuannaarutigeqaa Jakob illusisimasorisinnaagamiuk. Jakobilu oqarmat Rakel nuliartaariumallugu Laban suli nuannaarnerulerpoq. Jakobili oqarfigaa narsaatimini ukiut arfineq-marluk suleqqaarluni aatsaat Rakel nuliartaarissagaa. Rakel asaqigamiuk Jakob akuersivoq. Katilermatali qanoq pisoqartoq nalunngiliuk?

Labanip panini angajulleq Lea Rakelimut taarsiullugu Jakobimut tunniuppaa. Jakob akuersivoq Laban suli ukiut arfineq-marluk kiffartorfigiumallugu, kiisamilu Rakel aamma nuliartaaraa. Taamani Guutip angutit ataasiinnaanngitsumik nuliaqarsinnaatippai. Ullumikkulli, soorlu Biibilip takutikkaa, angut ataasiinnarmik nuliaqarsinnaavoq.