Jaaku Esauilu kammagiileqqipput

Jehovap Jaaku neriorsorpaa Aaperaamik Iisaamillu illersuisimanermisut illersor­niarlugu. Jaaku Kaarannimut nuuppoq, tassanilu katippoq, ilaqutariis­suanngorlunilu pisoorsuan­ngorpoq.

Taamaalluni Jehova Jaakumut oqarpoq: ‘Nunavigisannut uterniarit.’ Taava Jaaku ilaquttanilu ungasis­sorujus­suarmukarlutik aallarput. Aqqutaani Jaakup kiffaasa ilaat aggerput oqarlutillu: ‘Angajuppit, Esauip, angutinik 400-nik ilaqarluni naapikkiar­tulerpaatit!’ Jaakup ilaquttanilu Esauimit saassun­neqassasoralutik annilaan­ngatigaa. Jehovamut ima qinuvoq: ‘Angajunnit annaanniannga!’ Aqaguani uumasorpas­suarnik assigiin­ngitsunik – savanik, savaasanik, nersussuarnik, qatigattuunik siutituunillu – tunissutissanik angajuminut nassiussivoq.

Unnuami kisimiitsilluni Jaaku inngilimik takuvoq! Ullaap tungaanut Jaaku inngililu akiuullutik iperarnaveersaarput, inngililu peerniarsarigaluarpoq. Naak Jaaku ajoquser­neqaraluarluni tunniutiin­narumanngilaq. Inngili oqarpoq: ‘Iperannga!’ Jaakulli akivaa: ‘Pilluaq­qoqqaarlunga.’

Naggataatigullu inngilip Jaaku pilluaqquaa. Maanna Jaakup paasilerpaa Esauimit ajortumik pineqar­naviarnani, Jehovap tamanna isumagis­sammagu.

Ullaakkut Jaakup Esaui angutillu 400-t ungasianiit takuai. Jaaku ilaquttaminit siulliulluni ingerlavoq, angajunilu arfineq-marloriarluni nunamut pallorfigisarlugu. Esaui Jaakumut arpappoq tikikkamiullu eqitaarlugu. Qatanngutigiit qialerput eqqisseqatigeeq­qilerlutillu. Jaakup iliuusaa Jehovap takugamiuk qanoq misigisimas­sasoraajuk?

Kingusin­nerusukkut Esaui angerlaqqippoq Jaakulu ingerlaq­qilluni. Jaaku aqqaneq-marlunnik ernertaarpoq, taakkulu ima ateqarput: Ruubeni, Simmiuut, Levi, Juuda, Dani, Naftali, Gaadi, Aasari, Issakaari, Zeebulonni, Juuserfi kiisalu Biinia. Taakkualu ilaat – Juuserfi – aqqutigalugu Jehovap innuttani ikiorpai. Nalunngiliuk qanoq iliornersoq? Takoriartigu.