Jesusip ajoqersueriaasia

ULLUT ilaanni Jesusip angut oqarfigaa tullini asassagaa. Angut aperivoq: ’Kina tulleraara?’ Jesusip nalunngilluinnarpaa angutip taassuma suna eqqarsaatigigaa. Angut isumaqarpoq naggueqatigisani uppeqatigisaniluunniit kisiisa tullerminik taasinnaagini. Jesusip qanoq oqarfigigaa tusariartigu.

Ilaatigut Jesus oqaluttuat atorlugit ajoqersuisarpoq. Soorlu maanna taamaaliortoq. Juuti Samariamiulu oqaluttuarai. Tusareerpat juutit amerlanersaasa Samariamiut nuannarinngikkaat. Aajuna oqaluttuaq Jesusip oqaluttuarisaa:

Ullut ilaanni juuti qaqqami aqqusinikkut Jerikomut ingerlavoq. Piiaasulli saassuppaat. Aningaasaatai tiguaat unatarlugulu toqungajallugu.

Kingornagut palasi juutiusoq aqqusinikkut saneqquppoq. Angut unatarneqarsimasoq takuaa. Qanoq iliorsoraajuk? Sanioqqutiinnarlugu ingerlaqqippoq. Taava angut alla upperisarsiortuusoq aggerpoq. Levikkuuvoq. Unippa? Naagga, angut unatarneqarsimasoq ikiunngilaaluunniit. Assilissami takusinnaavatit palasi Levikkuusorlu qimaguttut.

Ataguli takuuk kia angut ikioraa. Samariamiup. Juuti ikiorpaa. Ikiinut nipaallisaaserpaa. Qasuersaarfissaanullu peqqissivissaanullu ingerlappaa.

Oqaluttuareerami Jesusip angut apeqquteqarsimasoq oqarfigaa: ’Qanoq isumaqarpit: Taakkua pingasut ilaat kina piiaasut saassutaata tulleraa? Palasi, Levikkuusoq imaluunniit Samariamiu?’

Angut akivoq: ’Samariamiu. Taassuma unatarneqarsimasoq ajunngitsuliorfigaa.’

Jesus oqarpoq: ’Ilumoorputit. Illittaaq taamaalioriartorit.’

Jesusip ajoqersueriaasia torrak, ilaa? Pingaartut amerlasoorpassuit ilinniarsinnaavavut Jesusip oqaasii Biibilimiittut tusarnaarutsigik.