Inussiaq Guutimut naalattoq

Juuserfi Jaakup ernerisa nukarliit ilagaat. Angajuisa malugaat Juuserfi ataataminit qujagisaasoq. Qanoq misigisimas­sasoraagit? Juuserfi sinngagalugulu kamaappaat. Taava eqqumiitsunik sinnattorpoq, qatanngutiminullu oqaluttuarai. Sinnattuni oqaluttuarimmagu paasivaat ullut ilaanni seeqqum­merfigiumaarlugu. Taamaat­tumillu uumiginerulerpaat!

Ullut ilaanni Juuserfip qatanngutai illoqarfiup Siikemmip eqqaani savanik paarsipput. Jaakup Juuserfi alakkaatippaa. Ungasianiit Juuserfi takugamikku oqarput: ‘Takuuk, aana sinnattullammak aggerpoq. Toqoqitigu!’ Taava tigoriarlugu itersamut nakkartippaat. Qatanngutaasali ilaat Juuda, oqarpoq: ‘Toqoqinagu, inussiaatitut tuniinnartigu!’ Taava sølvinik 20-nik akilersillugu niuertunut Midjanik­kuusunut Egypteniliartunut tunivaat.

Taava qatanngutaasa Juuserfip ilupaava, tassa atisaasa ilaat, savaasap aavanut misuppaat ataatamin­nukaatsillugulu oqarlutik: ‘Una ernerpit ilupaarivaa?’ Taava Jaaku isumaqalerpoq Juuserfi uumasumit qaasuttumit toqunneqarsimasoq. Aliasut­torujus­suanngorpoq, tuppallersar­neqarsin­naajunnaarluni.

Egyptenimi Juuserfi angummut nuimasumut Potifarimik atilimmut inussiatut tunineqarpoq. Jehovalli Juuserfi najorpaa. Potifarip takuaa Juuserfi sullaris­suullunilu tatiginartuusoq. Sivitsun­ngitsoq Potifarip pigisai tamaasa Juuserfip akisussaaf­figilerpai.

Potifarip nuliata maluginiarpaa Juuserfi kusanarlunilu nukittuujusoq. Ullut tamaasa Juuserfi tutikkumasarpaa. Juuserfi qanoq iliorpa? Itigartippaa oqarlunilu: ‘Naamik! Eqqunngitsulior­neruvoq. Naalakkama tatigivaanga, illillu nuliaraatit. Tutikkaluarukkit Guutimut ajortuliussaanga!’

Ullut ilaanni Potifarip nuliata Juuserfi tutikkumallugu uteriiserfigaa. Atisaatigut tigugaluarpaa Juuserfili qimaavoq. Potifari angerlarmat nulia sallulluni oqaluttuarpoq Juuserfip pinngitsaaleriaraluarsimagaani. Potifari kamattorujussuuvoq Juuserfilu parnaarus­saatillugu. Juuserfili Jehovamit puiorneqanngilaq.