Jehovamut neriorsuut

Israalikkut Egypteni qaammatit marluk missaat qaangiummata qimareeraat qaqqamut Siinaajimut pipput tassanilu tuperlutik. Jehovap Moorsisi qaqqamut majuarsimasoq ima oqarfigaa: ‘Israalikkut aniguisippakka. Naalallungalu inatsisikka maleruarpatigit innuttarilis­savakka immikkuul­larissut.’ Moorsisi qaqqamiit aterpoq Jehovallu qanoq oqarsimaneranik Israalikkut oqaluttuullugit. Tamanna qanoq isumaqarfigaat? Akipput: ‘Jehovap oqaasii tamaasa malillugit iliorumavugut.’

Moorsisi qaqqamut majuaqqippoq. Jehovallu oqarfigaa: ‘Aqaguagu oqaluffigis­savassi. Israalikkut mianersoqqukkit qaqqamut Siinaajimut majuaqqunagit.’ Moorsisi aterami Israalikkunnut oqarpoq Jehovamut tusarnaar­nissaminnut piareersassasut.

Ullut pingajuanni Israalikkut takuaat qaqqaq nuiamillu taartuinnarmik qallerneqarsimasoq innaallat­toqartarlunilu. Aamma kallerpalun­nerujus­suarmik qarlortaatillu nipaanik tusaapput. Taava Jehovap innermiilluni qaqqaq aqqarfigaa. Israalikkut annilaangangaaramik sajuttuin­nanngorput. Qaqqaq tamarmi sajulerpoq putsumillu poorluni. Qarlortaatip nipaa nipittoralut­tuinnarpoq. Taavalu Guuti oqarpoq: ‘Uanga tassa Jehova. Allanik guuteqas­sanngilatit uangaan­ngitsunik.’

Moorsisi qaqqamut majuaqqippoq. Jehovallu inatsisinik tunivaa. Taakku aqqutigalugit Israalikkut paasitippai qanoq guutisius­sanersut qanorlu pissusilersus­sanersut. Moorsisip inatsisit allattoriarlugit Israalikkut taakkuninnga atuffappai. Kingorna oqarput: ‘Jehovap iliuusereqqusai tamaasa iliuuseris­savagut.’ Aap, Jehovamut naalanniarlutik neriorsuipput. Neriorsuutertilli eqquutis­sanerpaat?