Neriorsuutertik unioqqutippaat

Jehovap Moorsisi oqarfigaa: ‘Qaqqamut majuarit ornillunga. Taava allaffissiat ujaraasut uanga inatsisinnik allattuif­figeriarlugit ilinnut tunniutis­savakka.’ Moorsisi qaqqamut majuarpoq, qaqqamiipporlu ullut unnuallu 40-t. Taakaniitillugu Jehovap inassutit qulit allaffissianut marlunnut ujaraasunut allappai Moorsisimullu tunniullugit.

Sivitsormat Israalikkut isumaqalerput Moorsisip qimassimagaatik. Aaronnimut oqarput: ‘Siulersor­neqarnissarput pisariaqar­tipparput. Guutiliuutsigut!’ Aaronnip akivai: ‘Kuultiutisi qaassigit.’ Taava kuultiutaat aatsippai nersuteeraasaliaralugillu. Inuillu oqarput: ‘Nersuteeraq taanna Guutigaarput Egyptenimiit aniguisitsisorput!’ Nersuteeraasaliaq kuultiusoq guutisiorfigilerpaat nuannatilerlutillu. Taamaalioramik ajortuliorpat? Aap, Jehovami neriorsoreeraluarpaat taanna kisiat guutisiorfiginiarlugu. Maannali neriorsuutertik unioqqutippaat.

Jehovap susoqarnersoq takuaa Moorsisilu oqarfigalugu: ‘Ammukariarit. Inuimmi naalakkuman­ngilaannga eqqunngitsumillu guutisiorusullutik.’ Moorsisi qaqqamiit ammukarpoq allaffissiat ujaraasut marluk nassarlugit.

Moorsisi ammut apuukkami inuit erinarsorpaluttut tusaavai. Taava takuai qittattut nersuteeraasaliarlu pallorfigalugu. Moorsisi kamangaarami allaffissiat ujaraasut nunamut igippai aserorlugit. Ingerlaannarlu nersuteeraasaliaq aserorterpaa. Taava Aaronni aperivaa: ‘Qanoruna isillutik taama ajortigisumik iliortik­kaatsit?’ Aaronni akivoq: ‘Kamannak. Nalunngilat qanoq ittuusut. Guutimik amigaateqalermata kuultiutaat innermut igikkakkit nersuteeraq nueriasaarpoq!’ Aaronni taamaaliorsimasus­saanngik­kaluarpoq. Moorsisi qaqqamut qummukaqqippoq qamanngalu pisumik Jehova qinnuigalugu inuit isumakkeerfigeq­qullugit.

Jehovap imminut naalakkusuttut isumakkeerfigai. Israalikkut Moorsisip siulersuineranik malinnin­nissaat qanoq pingaaruteqar­tigisoq takusin­naaviuk?