Imminut naalakkersinnaanerup inerititaa ineriartortiguk
Anersaap inerititai tassa asanninneq, tipaatsunneq, eqqissineq, kamaginninneq, avaaginninneq, ajunngissuseq, upperneq, saamaneq, imminut naalakkersinnaaneq. Taamaattunut inatsisit assortuinngillat. — Galâsiamiut 5:22, 23, NV.
1. Imminut naalakkersinnaanermik maligassaalluartut pingaarnerpaartaat kikkuuppat, allassimaffinnilu suni tamanna uppernarsarneqarpa?
JEHOVA Guuti Jesus Kristusilu imminut naalakkersinnaanermik maligassaalluartut pingaarnerpaartaaraat. Inuit Edenip naatsiiviani naalanngitsuliorneranniilli Jehova imminut naalakkersinnaassuseqartuarsimavoq. (Naleqqiuguk Jesaja 42:14.) Taanna Allakkat Hebriiarisuut-ni quleriarluni eqqartorneqarpoq ’kamajasuunngitsoq’. (2 Moses 34:6) Taamaattuussaguni Guuti imminut naalakkersinnaasariaqarpoq. Guutip ernerattaaq nunusinnaassutsimik takutitsisarsimavoq. ’Taanna oqagaagami oqarninngilaq,’ allassimavoq. (1 Pîtruse 2:23) Ilaannilu Ataatani qinnuigisinnaagaluarlugu ’inngilinik aqqaneq-marlunnik legionilinnit amerlanerusunik’ aallartitsivigeqqulluni taamaaliunngilaq. — Matîuse 26:53.
2. Bibeli naapertorlugu inuit naammalluinnanngitsut kikkut maluginiarnartumik imminut naalakkersinnaassuseqarsimappat?
2 Bibelimi oqaluttuarineqarputtaaq inuit naammalluinnanngitsut maluginiarnartumik imminut naalakkersinnaassusillit. Assersuutigalugu Josef, ataataanerpaap Jakobip ernera, Potifarip nuliata kanngunartuliorfiginiaraluarmani pissuseq tamanna ersersissimavaa. (1 Moses 39:7-9) Maligassaalluartut allat tassaapput hebriiarit inuusuttut sisamat Mosesip inatsisaani maleruaqqusat naalallugit Babylonimiut kunngiata nerisassaatai pitsaalluartut neriumannginnamikkik imminut naalakkersinnaassutsimik ersersitsisimasut. — Daniel 1:8-17.
3. Kikkut ileqqorinnertik tusaamasaassutigaat, tamatumunngalu sunik uppernarsaatissaqarpa?
3 Ullumikkut tikkuarsinnaavavut uppeqatigiit Jehovap Nalunaajaasui imminut naalakkersinnaanissaminnik ilungersuutiginnittut. Pissutissaqarluartumik New Catholic Encyclopedia-mi taakku taaneqarsimapput „silarsuarmi immikkooqatigiit perorsarluarsimanerpaat ilaat“. Filippinerini ilisimatusarfimmi ilinniartitsisoq oqarsimavoq „Nalunaajaasut Guutimik mianerinnillutik Bibelimi ilinniakkatik maleruartaraat“. 1989-imi Warszawami Jehovap Nalunaajaasuisa ataatsimeersuarnerat pillugu aviisiliortoq Polenimiu ima allassimavoq: „Ullut pingasut ingerlanerini inuit 55.000-it ataasiinnarmilluunniit pujortartoqanngillat! . . . Peqqussutinik malinneqqissaarsinnaassuseq tupinnaannartoq tamanna takullugu nersorlugillu ataqqinninnermik misigeqaanga.“
Guutimik mianerinninneq ajortumullu uumiginninneq
4. Suna ikiortigalugu imminut naalakkersinnaaneq ineriartortissinnaavarput?
4 Imminut naalakkersinnaassuseqarniarnitsinni ikiuutiginerpaasinnaasatta ilagaat Guutimik mianerinninneq, tassa Ataatatta asannittup qilammiusup iluarinngisaanik iliortoornissamut siooraneq iluaqutaasoq. Jehovamik ataqqinnilluni mianerinninneq qanoq pingaartitsigisariaqaripput Bibelip ersersippaa qasseeriaqaluni eqqartoramiuk. Abrahamip ernini Isak pilliutiginialermagu Guutip oqarfigaa: „Nukappiaraq pinerleqinagu; maannami paasivara uanga mianerigimma, ernituannilluunniit erliguukkumananga.“ (1 Moses 22:12) Qularnanngitsumik Abraham misigissutsikkut artorsarsimassaqaaq imminut naalakkersinnaanermik annertuumik pisariaqartitsisimassaqaluni Guuti naalallugu allaat ernini asangaakkani Isak toqunniarlugu savimmik silugukkamiuk. Ilumut Guutimik mianerinninneq ikiortigalugu imminut naalakkersinnaassuseqarsinnaavugut.
5. Ajortumik uumiginninneq imminut naalakkersinnaanissatsinnut qanoq pingaaruteqartigaa?
5 Ajortumik uumiginninneq Guutimik mianerinninnermut attuumassuteqarluinnarpoq. Ussatit 8:13-imi ima allassimavoq: „[Jehova] mianerigaanni ajortoq uumigisassaavoq.“ Ajortoq uumigigutsigu aammattaaq nunusinnaassuseqarnerussaagut. Ajortumik uumiginninnissarput — aap, maajuginninnissarput — Bibelimi peqqussutigineqartuartarpoq. (Tussiaat 97:10; Amos 5:14, 15; Rûmamiut 12:9) Amerlanertigut ajortoq ima iluarusunnartigisarmat, kajungernartigisarmat pilerinartigalunilu ussiinerit akiorsinnaassagutsigik allaat uumigisariaqarparput. Ajortumik uumiginninnerput imminut naalakkersinnaanissatsinnut nakussatsissutigissavarput, taamaalillutalu sernissuutigissavarput.
Imminut naalakkersinnaaneq — pissuseq iluaqutaasoq
6. Sooq namminissarsiortumik ilioriataartarnitta nununissaa imminullu naalakkersinnaanissaq iluaqutaappat?
6 Aammattaaq imminut naalakkersinnaassuseqarnerussaagut pissutsip tamatuma qanoq iluaqutaatiginera paasilluarutsigu. Jehovap imminut naalakkersinnaaqquaatigut iluaqutaammat. (Naleqqiuguk Jesaja 48:17, 18.) Oqaasiani arlaleriarluni erserpoq namminissarsiortumik ilioriataartarnitta nununissaa imminullu naalakkersinnaanissarput qanoq iluaqutaatigisut. Allatut ajornartumik Guutip inatsisai allanngortussaanngitsut sumiginnarsinnaanngilavut. Oqaasiani ima oqarfigineqarpugut: ’Inuk siaruartikkani naapertorlugit katersuiumaarmat. Uinimmiummi siaruarterisoq uinimmit aserujassummik katersuiumaarpoq; anersaamulli siaruarterisoq anersaamit inuunermik naassaanngitsumik katersuiumaarpoq.’ (Galâsiamiut 6:7, 8) Tamatumunnga assersuutit nassuitsut tassaapput nappaaterpassuit nerivallaarnerup imerajunnerullu kingunerissaat. Namminissarsiorneq taamatut artorsarfigigaanni imminut ataqqineq katanneqartarpoq. Aamma ajornerusumik, allanut attaveqarneq pinngitsoorani ajornartorsiortinneqassaaq. Ajornerpaarlu tassa imminut nangarsinnaannginnerup Ataatatsinnut qilammiusumut attaveqarnerput ajoqusissavaa.
7. Ussatit-ni tamatigut ersersinneqartartoq sunaava, allassimaffiillu suut tamanna takutippaat?
7 Taamaattumik imminut eqqaasittuartariaqarpugut namminissarsiorneq aserorsaataasoq. Ussatit-ni, imminut naalakkersinnaanerup pingaaruteqarneranik ersersitsisuni, tamatigut ersersinneqartartoq tassavoq namminissarsiorneq imminut akilersinnaanngitsoq imminullu nangarneq silatusaarnerusoq. (Ussatit 14:29; 16:32) Malugisariaqarparpullu imminut naalakkersinnaaneq tassaannaanngitsoq ajortumik ingalassimanninneq. Eqqortuliorniaraangattattaaq imminut naalakkersinnaaneq imaluunniit nangarsinnaaneq pisariaqarpoq, ajortuliortooqqajaasarnerpullu pissutigalugu tamanna artornarsinnaavoq.
8. Misigisimasap suup takutippaa imminut naalakkersinnaanerup pingaaruteqassusia?
8 Imminut naalakkersinnaanerup iluaqutaassusianik assersuut tassa Jehovamut nalunaajaasuusup aningaaserivimmi utaqqisup misigisimasaa angut alla qerlertoruulluni imminit siullinngormat. Nalunaajaasoq kamaammeraluarluni nunuinnarpoq. Ulloq taanna ingeniøri aalajangersimasoq naapinniarpaa rigssaliliassap titartagartaanut akuersissummik piniarluni. Ingeniørilu taanna kinaasoraajuk? Angut aningaaserivimmi qerlertoruulluni imminit siullinngortoq! Ingeniøri inussiarnissaartorujussuuvoq, akuersissummullu akiliutaasartuugaluap qulerarterutaa inorluguluunniit akiliisillugu. Nalunaajaasoq nuannaarpoq ullumiummat kamaammernini nunusimagamiuk.
9. Oqaluussinitsinni oqalorujuffigineqarutta mitaatigineqaruttalu qanoq pissuseqartariaqarpugut?
9 Illumiit illumut Guutip naalagaaffianik tusagassaq nuannersoq oqaluussissutigigaangatsigu imaluunniit inuit angallaffiini qeqarluta saneqquttut tusarliussassatsinnut soqutiginnilersinniaraangatsigik ilaannikkut mitaatigineqartarpugut oqalorujuffigineqarlutaluunniit. Taava suna silatusaarnerussava? Ussatit 15:1-imi silatuumik allassimasoqarpoq: „Akissut sallaatsoq kamakkunnaarsitsisarpoq.“ Allatut oqaatigalugu imminut naalakkersinnaasariaqarpugut. Tamannalu Jehovap nalunaajaasuisaannaanngitsoq misigisimavaat. Nakorsaatigitigut ilisimatuut paasiartuinnarpaat imminut naalakkersinnaaneq peqqinnartuusoq.
Namminissarsiunngitsumik asanninneq iluaqutaasoq
10, 11. Sooq asanninnerup imminut naalakkersinnaanissatsinnut ikiorsinnaalluarpaatigut?
10 Paulusip Korintumiunut agdlagkat sujugdlît 13:4-8-mi asanninnermik allaatiginninnerata takutippaa asanninneq ikiuutaasoq imminut naalakkersinnaaneq ineriartortissagaanni. ’Asannittoq kamajuilluni.’ Tamatumani imminut naalakkersinnaaneq pisariaqarpoq. ’Asannittoq sinngasarinngilaq; asannittoq usorsitsaartuunanilu annerujumatuusarinngilaq.’ Aap, asanninneq ikiortigalugu eqqarsaativut misigissutsivullu aqussinnaasarpavut aammalu sinnganeq, usorsitsaarneq pingaakujunnerlu pinngitsoortittarlugit. Asanninnerup ikiussavaatigut Jesusitut maniguussinnaanissatsinnut. — Matîuse 11:28-30.
11 Nangilluni Paulus allassimavoq asannittoq ’ippinnartumik iliortarinngitsoq’. Tamatigut ippinnanngitsumik iliortassagaanni imminut naalakkersinnaasariaqarpoq. Asannikkutta piumatunavianngilagut, ’namminissatsinnik piniartarnaviarata’. Asannittorlu ’narrutsattarinngilaq’. Allat oqaasiinut iliuusiinullu narrutsajasinnaagaluarpugut, asannikkuttali nunusinnaavugut kingornalu peqqissimissutigisassatsinnik oqaaseqarnata iliuuseqarnataluunniit. Asannittoq ’eqqunngitsumik iliorfigisaanernik tamanik naatsorsuutiginnittarinngilaq’ (NV). Puttarsisaqaqqajaasarpugut, asanninnerli ikiortigalugu eqqarsaatipiluit anisissinnaavavut. Asannittup ’iluannginneq tipaatsuutigisarinngilaa’. Iluanngitsut, soorlu atuakkiat kanngunartuliornermik imallit TV-kkullu nangeqattaartut ajortunngorsaataasut, tipaatsuutigisassanngikkutsigik imminut naalakkersinnaasariaqarpugut. Aammattaaq asannittoq ’tamatigut kamaginnittaraaq, tamatigut ilalaararaaq’. Nikallornani, taamaaqataanik akisinani imaluunniiit Jehovamut kiffartorunnaarnissaq isumaliutigilernagu nuanninngitsut artornartullu kamagittarfigissagaanni nunusinnaasariaqarpoq.
12. Qanoq ililluta takutissinnaavarput Jehova Guutip Jesus Kristusillu uagut pilluta iliuuserisimasaat tamaasa pingaartillutigik?
12 Ataatarput qilammiusoq ilumut asagutsigu taassumalu pissusii nuanningaartut uatsinnullu iliuuserisimasai tamaasa pingaartikkutsigik, Guutimut iluarinartinniartariaqarpugut tamatigut imminut naalakkersinnaaniartarluta. Aamma naalagarput Ajoqersuisorpullu, Jesus Kristus, asagutsigu uagullu pilluta iliuuserisimasai tamaasa pingaartikkutsigik, peqqussutaa naalallugu ’[nappagaq naalliutsitaaffipput, NV] ersullugu malissavarput’. (Mákorse 8:34) Tamatumani imminut naalakkersinnaaneq pisariaqarluinnarpoq. Aammalu qatanngutivut kristumiuusut asagutsigik ajuallassutigisaannik namminissarsiortumik iliuuseqarniassanngilagut.
Upperneq qanilaarnerlu iluaqutigaavut
13. Sooq uppernerup imminut nangarnissatsinnut ikiortarpaatigut?
13 Guutimut taassumalu neriorsuutaanut uppernitta aamma imminut naalakkersinnaanissatsinnut kajumissisissavaatigut. Upperutta Jehova tatigissavarput taassumalu naapertuilluassusiata naammassineqarnissaa utaqqisinnaallutigu. Rûmamiut 12:19-imi apustili Paulusip tamanna eqqartorpaa: ’Nammineq akiniaaqinasi, asasakka, . . . allassimammat: „Akiniut uanga pigaara, uanga akiliiumaarpunga, oqarpoq Jehova.“’ Maniguunnertaaq iluaqutigisinnaavarput. Maniguukkutta ajuallatsitsinerit, piviusut imaluunniit pisorisat, narrutsaatiginasuartassanngilavut. Tuaviorpallaartumik namminersorluta eqqartuussiniassanngilagut, nunullutali naammagittarlutalu Jehova utaqqissallutigu. — Naleqqiuguk Tussiaat 37:1, 8.
14. Misigisap suup takutippaa imminut naalakkersinnaaneq ineriartortinneqarsinnaasoq?
14 Imminut naalakkersinnaanerup ineriartortinneqarsinnaaneranik ersarissumik assersuuteqarpoq, tassa angut kamajasuusimagaluartoq. Ima kamajatigisimavoq ilaanni ataatanilu perulluliortillutik politiit kalerrinneqarlutik takkummata suli sapersinngikkaanni pingasut orlutippai. Kingornali Jehovap nalunaajaasui ilisarisimalerpai imminullu naalakkersinnaaneq, Guutip anersaavata inerititaasa ilaat, ilikkarlugu. (Galâsiamiut 5:22, 23) Maanna, ukiut 30-t tamatuma kingorna, angut taanna suli Jehovamut kiffaavoq aalajaatsoq.
Ilaquttariinni imminut naalakkersinnaaneq
15, 16. (a) Suna ikiortigalugu uiusoq imminut naalakkersinnaassuseqarsinnaava? (b) Ingammik sukkut imminut naalakkersinnaaneq pisariaqarpa, misigisimasallu suup tamanna takutippaa? (c) Sooq nuliaasoq imminut naalakkersinnaassuseqartariaqarpa?
15 Ilaqutariinni imminut naalakkersinnaaneq pisariaqavippoq. Uiusup nuliani immisut asassaguniuk eqqarsaatini, oqaatsini iliuutsinilu aqussinnaasariaqarpai. (Evfisumiut 5:28, 29) Aap, apustili Peterip oqaasii Pîtrusip agdlagai sujugdlît 3:7-miittut maleruassagunikkik uiusut imminut naalakkersinnaasariaqarput: ’Taamattaaq angutaasusi nuliasi silalimmik inooqatigisigik.’ Ingammik qatanngut uppinngitsumik nuliaqaruni imminut naalakkersinnaassuseqartariaqarpoq.
16 Assersuutigalugu: Utoqqaanertaq kamajasuumik nuliaqarpoq. Nulianili nunuffigisarpaa, tamannalu ima iluaqutigitigaa nakorsaata ima oqarfigalugu: „John, inunnguuseralugu kamagittarsimassaqaatit, imaluunniit pissaaneqangaartumik upperisaqarputit.“ Aap, pissaaneqangaartumik upperisaqarpugut, tassami ’Guutip anersaamik nangaassutaasumik tuninngilaatigut, kisianni sapiissutaasumik asannissutaasumillu silatusaarutaasumillu’, taamaattumillu imminut naalakkersinnaassuseqarpugut. (2 Timûtiuse 1:7) Aammattaaq nuliaasoq naalassaguni imminut naalakkersinnaasariaqarpoq, ingammik uppinngitsumik ueqaruni. — 1 Pîtruse 3:1-4.
17. Sooq angajoqqaat meeqqallu akornanni imminut naalakkersinnaaneq pisariaqarpa?
17 Aamma angajoqqaat meeqqallu akornanni imminut naalakkersinnaaneq pisariaqarpoq. Angajoqqaat meeqqamik imminut naalakkersinnaanermik ilikkarnissaat kissaatigigunikku, namminneq maligassiuisariaqarput. Meeqqat perorsaatissinneqartariaqaraangata angajoqqaat tamatigut eqqissisimasumik asannittumillu iliuuseqartariaqarput, taamaaliorniarunillu imminut naalakkersinnaassuseqarluartariaqarput. (Evfisumiut 6:4; Kulorsamiut 3:21) Aammalu meeqqat angajoqqaatik asagunikkik, naalattariaqarput aatsaallu imminut naalakkersinnaassuseqaraanni naalattoqarsinnaavoq. — Evfisumiut 6:1-3; naleqqiuguk 1 Juánase 5:3.
Guutip ikiuutai iluaqutigikkit
18-20. Ikiuutissat anersaakkut ittut pingasut suut iluaqutigisariaqarpavut pissutsit imminut naalakkersinnaanissatsinnut pisariaqartut ineriartortissagutsigik?
18 Ajortoq uumigissagaanni Guutimillu mianerinninnikkut, namminissarsiunngitsumik asanninnikkut, uppernikkut imminullu naalakkersinnaassutsikkut ineriartussagaanni, ikiuutissat Jehova Guutip pilersitai tamaasa iluaqutigilluarniartariaqarput. Imminut naalakkersinnaaleriartornissamut ikiuutissat anersaakkut ittut pingasut misissorneroriartigik. Siullermik immikkut pisinnaatitaaffik erlinnartoq, qinuneq, taaneqarsinnaavoq. Qinunissatsinnut ulapippallaarnaveersarta. Aap, ’kipisuitsumik’ ’qasusuillutalu’ qinuniartariaqarpugut. (1 Tásalûníkamiut 5:17; Rûmamiut 12:12) Imminut naalakkersinnaanerup ineriartortinnissaa qinnussutiginiartigu. Nununngitsoorsimagaangatta, maniguulluta Ataatarput qilammiusoq isumakkeerfigeqqulluta qinnuigisartigu.
19 Aappassaanik imminut naalakkersinnaaneq ineriartortissinnaavarput Guutip oqaasia atuagassiallu Bibelimik paasinninnissatsinnut maleruaanissatsinnullu ikiuutaasut anersaakkut inuussutissatsinnik aallerfigisarnerisigut. Kiffartuussinitta illernartup ilaa tamanna sumiginnaqqajaanarsinnaavoq. Taamaattumik imminut naalakkersinnaassutsimik ersersitsisariaqarpugut tamatigullu imminut eqqaasittarluta Bibelimit aamma ’inussiaq aalajaallunilu silatuup’ pilersitaanit pingaarnerusunik atuagassiaqanngitsoq. Tamakku pingaartilluinnartariaqarpavut. (Matîuse 24:45-47) Ilumoorpoq suut tamaasa pisinnaanngikkivut, qinersisariaqarlutali. Ilumoorluta oqarsinnaassagutta anersaakkut pisariaqartitsinerput miserratiginagu, imminut naalakkersinnaassutsimik pisariaqartumik ersersitsiumassaagut fjernsynilu qamillugu ataatsimiinnernut piareersarumassalluta imaluunniit Napasuliaq Alapernaarsuiffik nutaaq atuarumassallugu.
20 Pingajussaanik ilagiinni ataatsimiinnerit ataatsimeersuarnerillu iluaqutigisariaqarpavut. Pinngitsuunngivilluta ataatsimiinnerit tamakku najuuffigerusuttarpavut? Piareersartarpugut, periarfissaqaraangattalu peqataasarluta? Ataatsimiinnernik nammineq iluaqutiginninnitsitut annertutigisumik imminut naalakkersinnaanissatsinnut aalajangernitsinni nakussatsinneqartarpugut.
21. Anersaap inerititaa, imminut naalakkersinnaaneq, ineriartortikkutsigu sunik akissarsissaagut?
21 Tamatigut imminut naalakkersinnaaniarluta tamaviaarutta sumik akissarsissaagut? Siullermik namminissarsiornerup kingunipilui misigissanngilavut. Imminut ataqqineq ilerasuuteqannginnerlu angussavavut. Ajornartorsiuterpassuarnut imminut illersussaagut inuunerullu aqqutaaniittuarsinnaalluta. Aammattaaq allat ajunnginnerpaamik tunisinnaavavut. Pingaarnerpaamillu kajumissaarut Ussatit 27:11-miittoq maleruassavarput: „Ernera, silatuujuniarit taamalu uummatiga nuannaartillugu, mitallersikka uannut akisinnaaqqullugit.“ Tamannalu tassaavoq akissarsiaq annerpaaq — Ataatatta qilammiusup asannittup, Jehova Guutip, uummataanik nuannaartitsineq. (wD 15/11 91)
Eqqaamavigit?
□ Guutimik mianerinninnerup qanoq ililluni imminut naalakkersinnaanissatsinnut ikiortarpaatigut?
□ Sooq asanninnerup imminut naalakkersinnaanissatsinnut ikiussavaatigut?
□ Imminut naalakkersinnaaneq qanoq ililluni ilaquttariinni iluaqutaava?
□ Imminut naalakkersinnaaneq ineriartortissagutsigu suut atorluarniartariaqarpavut?
[Qupp. 19-mi assiliartaq]
Josef usserniarneqarami imminut naalakkersinnaassutsimik ersersitsivoq
[Qupp. 21-mi assiliartaq]
Meeqqat eqqissisimasu- mik asannittumillu peror- saatississagaanni immi- nut naalakkersinnaaneq pisariaqarpoq