Oqaluussinermit nutaarsiassat
Boliviami mattuttoq arnaq sallusuissutip Biibilimeersup inussiaajunnaarsikkaa
INUPPASSUIT peqqusersuitsut upperisarsiornermit ilumuunngitsumit qimarrapput, sallusuissut Biibilimeersoq ilinniarlugu Guutilu ilumoortoq, Jehova, pallorfigilerlugu. Boliviami inuit 7600-init amerlanerusut, ilaatigut mattuttoq arnaq, taamaaliorsimapput.
Qulingiluanilli ukioqarluni M—— Jehovap Nalunaajaasuisa ilaannit attaveqarfigineqareersimavoq. Oqaluussisartoq matukkut sianermat M——ip mappiussimavaa, siullermeerlunilu Guutip aqqa, Jehova, tusarsimallugu. Ateq taanna puiunngisaannarsimavaa.
Ilaqutariinni niviarsiarartatuaammat aalajangerneqarsimavoq mattuttunngussasoq. „Inuunera Guutimut kiffartornermut atorsinnaalerakku assorsuaq nuannaarsimavunga — tassa mattuttunngornera taamatorpiaq isigisimavara,“ M—— oqaluttuarpoq. Nuannaarnerali tamanna erniinnaq pakatsininngorpoq. Tassami mattuffimmi naapertuilluanngissuseq kinaassusersiornerlu annertuut takusarpai. Ima oqarpoq: „Taavaniinninni nikallorujussuartarsimanikka aammalu timikkut anersaakkullu anniarujussuartarsimanikka puiunngisaannassagunarpakka. Takorloorsinnaajunnaaraluarpara Guuti asannittuusoq, Guutiusorli naakkinnissuseqarani pillaasartoq.“
Nangippoq: „Piffissap ingerlanerani mattuttuinngorpunga. Aterli Jehova Biibilimi nassaarinngitsuuippara. Taamaallaat ateq ’Yahweh’ nanisinnaavara, tamannalu paatsiveerussutigaara. Allaat ullut ilaanni anivunga inuit Jehovamik eqqartuisartut ujarniarlugit, iluatsitsinangali.
Piffissaq ingerlavoq, ullullu ilaanni angajoqqaannut pulaarniarlunga ingerlatillunga allagartaq takulerpara: ’Jehovap Nalunaajaasuisa ataatsimiittarfiat.’ Iserpunga oqarfiginiarlugit pruffiitioqqusersuusut, inoqanngilarli. Sapaammi uteqqippunga. Tamatumuunakkut ataatsimiinneq aallartereersimavoq, mattuttutullu atisaqarlunga iserama arlallit tupaallakkunartorujussuupput. Ataatsimiinneq naammat aniartupallaleraluartunga Jehovap Nalunaajaasuisa ilaata arnap ilassimmanga aperaara sooq atermik Jehovamik atuinermikkut Illernartoq mitaatigineraat. Apeqqutiga Biibili pillugu oqaloqatigiinnermik kinguneqarpoq, isumaqatigiippugullu ilaquttama angerlarsimaffiannut pulaassagaanga. Angajoqqaamali anisippaat. Qaammatilli marluk qaangiummata naapeqqippugut, imminullu qaaqquaanga Biibili atuaqqissaaqatigiissutiginiassagatsigu. Paasissutissat saqqummiussai tupigusuutigisorujussuuakka, paasissutissat kristumiut Guutip aqqanik atuisariaqarnerannik ersersitsisut. Tamanna nakussatsissutigalugu mattuttuuninni ilikkagarisimasakka naleqanngitsut tamaasa sussakkeerpakka.
Mattuffimmiinninni pisimasorpassuit eqqaamavakka. Assersuutigalugu, piffissap ilaani nerisartakkakka annikippallaarmata angajoqqaannut allappunga nerisassannik nassilaaqqullunga. Nalulluinnarpara allakkakka ingerlateqqinneqannginnerminni mattuffimmit atuarneqartarsimasut. Tulliani nerileratta iffiapiluunersuq mamalaarlu saannut ilineqarput, pinngitsaalineqarpungalu tamaat nerissagiga. Maanna ingasattumik nerisassinneqartalerpunga. Niviarsiaqatinnut tamanna oqaluttuaraara, ilaatalu siunnersorpaanga iffiap sinnera nerisinnaanngisara aserorterlugu natermut nakkalatsertassagiga. Taamaalioramali mattuttut ilaata tiguaanga natermullu uppitillunga. Sukannersorujussuarmik peqquneqarpunga nateq tamaat aluttorlugu asassagiga. Ini angisoorujussuuvoq. Peqqussut naalallugu naqqup aluttornerani illarpaluk illakuluppalullu tusaasinnaavakka — naakkinninnermik sumilluunniit ersersitsisoqanngilaq.
Maanna takusinnaalersimavara tamakkunannga tamanit aniguisitaasimanera qanoq nuannertigisoq. Soorlu naatsorsuutigineqarsinnaasoq kiffaanngissuseqalernera tamanna pilliuterpassuarnik akeqarsimavoq. Assersuutigalugu, ataatama angerlarfimaffimminnit anisippaanga. Immikkulli pisinnaatitaaffittut isigaara mattuffimmit aninnginninni mattuttunik inuusuttunik allanik sallusuissummik ilinniartitsisimanera. Nuannaarutigeqaara arlaliulluta inuunerput Jehova Guutimut tunniulluinnarsimagatsigu!
Mattuffimmit anigama ataatama paasiuminaatsittorujussuuaa sooq akissarsiorluarnartumik piffissaajarnartumilli suliffittaarusunngitsunga. Pissutaasorli tassa Guutimut kiffartorninnut piffissamik annerusumik atuerusunnera. Maanna nalinginnaasumik pioneriuvunga (piffissaq tamaat oqaluussisartoq) pilimanngitsumillu, pisuumilli, inuuneqarlunga. Nuannaarutigisorujussuuara anaanama qatanngutimalu angutit Jehovamut kiffartoqatigilersimammannga.“
Aap, sallusuissut Biibilimeersoq silap matuma upperisarsiornerinit ilumuunngitsunit aniguisitsisarpoq nuannaarnermillu pilluarnermillu ataavartumik tunisisarluni. — Juánase 8:32. (wD 1/5 92)