Toqup kingorna allami inooqqilertarneq upperaajuk?
„SANILITTA pania maani Indiami alliartorninni asanniffigerujussuarnikuusat eqqaamaviuk? Sapaatit-akunnerpaalui qaangiuppata katinniarpoq. Tamatuminngaana ilisimatinniaannarlutit.“ Mukundbhai ernerminut USA-mi universitetimi ilinniartumut taama allassimavoq.
Sooruna Mukundbhaip ernini tamatuminnga nalunaarfigigaa? Nammineerlunimi ukiorpassuit tamatuma siorna inuusuttuaqqat imminnut samminerat aalajangersimalluinnarluni unitsissimavaa. Aammalu ernera ukiuni kingullerni arfinilinni qutsinnerusumik ilinniagaqarluni USA-miissimavoq. Ukiuni taakkunani tamani niviarsissamut taassumunnga attaveqarsimanngilaq, tamannalu Mukundbhaip nalunngilluinnaraluarpaa.
Soormiuna katinnissaq tamanna isumakuluutigigaa? Toqup kingorna allami inooqqilertarneq imaluunniit ernioqqittarneq upperigamiuk.a Tassamigooq ernermi sanilimillu paniata inuusuttuaraanerminni asaqatigiinnerat inuunerminni siullermi aappariissimanerannik pissuteqarsimappat maanna katinnissamut naammattumik utoqqaassuseqalerneranni avissaaqqatinnissaat naakkittaatsuliornerussaaq. Mukundbhaip kissaatigiinnarpaa inuunermi matumani niviarsissap allamut katilernera ernermi ilisimassagaa.
Assersuutissaq alla: Niviarsiaraq sisamanik ukiulik Mumbaimi (Bombay-usimasumi) Indiamiittumi napparsimmavimmi anniarnartumik suliaritittarsimavoq uummammigut ajoquteqarnini pillugu. Angajoqqaavisa pigissaartut panitsik anniartoq isigalugu artungajappaat, imali oqartarlutik: „Tamanna naammagiinnartariaqarparput. Inuunermini siullermi arlaannik iliuuseqarsimassaaq maannakkullu pisassani pillugu.“
Inuit millionilikkuutaat hindusiortut, Buddhasiortut, jainistit, sikhit Indiamilu pilerfeqartunik allanik upperisaqartut akornanni toqup kingorna allami inooqqilertarnermik upperisaqarneq siammarsimasorujussuuvoq. Isumaqarput inuunermi nalaatatik tamarmik — asannilernermit anniarujussuarnermut — siornatigut inuunerisimasaminni iliuutsimik kingunerigaat.
Aammattaaq nunani killerni najugallit ilarpassuisa toqup kingorna allami inooqqilertarnermik ajoqersuut nuannaartoreqaat. Filmiliarittartup Amerikamiup Shirley MacLainep tamanna upperinerarpaa. Atuakkiortoq Vancouverimi, British Columbiami, Canadamiittumeersoq, Laurel Phelan, oqarsimavoq 50-eriarluni inuunerisimasaminit eqqaamasaqarluni. TV-kanaalip CNN-ip aviisillu USA Today-p 1994-imi Gallupimik isumasiuisitsinerani inersimasunit 1016-init 270-it toqup kingorna allami inooqqilertarneq upperinerarsimavaat. Aamma New Agemik upperisallit toqup kingorna allami inooqqilertarneq upperaat. Upperisamulli tamatumunnga sunik uppernarsaatissaqarpa?
„Siornatigut inuunerisimasamit eqqaamasat,“ toqup kingorna allami inooqqilertarnermik upperisallit taama akipput. Bangkokimiu pingasunik ukiulik Ratana „arnatut upperisarsiortutut 60-it sinnerlugit ukioqarluni toqusutut inuunerisimasaminik“ eqqaamasinnaasaqalernerarmat oqaluttuaa tusartut amerlanersaasa toqup kingorna allami inooqqilertarnermut uppernarsaatissatut ilumoortutut akuerisimavaat.
Amerlasuulli nalornipput. Inuillu ilaasa inuunerisimasaminnit eqqaamasaqarsinnaanerarnerat assigiinngitsorpassuarnik nassuiaatissaqartinniarneqartarpoq.b Isumaliutersortartoq hindusiortoq Nikhilananda atuakkiamini Hinduism: Its Meaning for the Liberation of the Spirit-imi allassimavoq ’toqup kingorna misigisat tunngavilersuutit silaqassutsimut naapertuuttut ikiortigalugit uppernarsarneqarsinnaanngitsut’. Taamaakkaluartorli isummerpoq ’ernioqqittarnermik ajoqersuut ilimanaateqarnerusoq’.
Ajoqersuut tamanna Biibilimit tapersersorneqarpa? Toqusunut neriuut suna Guutip oqaasiani isumassarsiarititaasumi saqqummiunneqarpa?
[Quppernerup ataani ilanngussat]
a „Reinkarnation“ (toqup kingorna allami inooqqilertarneq) The New Encyclopædia Britannica-mi ima nassuiarneqarpoq: „Tarnip ataasiarluni arlaleriarluniluunniit ernioqqittarneranik eqqarsaat, inuttut, uumasutut imaluunniit, ilaannikkooriarluni, naasutut.“ Eqqarsaammut tamatumunnga atorneqartarportaaq oqaaseq „ernioqqinneq“, oqaaserli „reinkarnation“ ilisimaneqarneruvoq akuerisaallunilu. Indiamiut oqaasiinik qinerlerfissiani arlalinni oqaatsit „ernioqqinneq“ aamma „reinkarnation“ assigiimmik isumalittut atorneqarput.
b Takuuk Vågn op!, 8. juni 1994-imoortoq, qupperneq 5-7.
[Qupp. 4-mi assiliartaq]
Siornatigut inuunerisimasamini ajortuliarisimasani pillugit pillarneqarpa?