Guutimik suli upperinnittoqarsinnaava?
„Upperisaq uumavoq, Guutip saammaassineranik sapiilluni tatiginninneq, ima qulakkeersimatigalugu tusindileriarluni toqusinnaalluni.“ — MARTIN LUTHER-imiit, 1522.
„Eqqortumik oqaatigalugu inuiaqatigiinngorsimavugut upperisaqanngitsut, kristumiutut upperisaq inooriaaserlu tammalerput.“ — LUDOVIC KENNEDY-mit, 1999.
INUIT upperisamik paasinnittaasii assigiinngitsorpassuusinnaapput. Qanga Guutimik upperinninneq naliginnaaneruvoq. Ullutsinnili silarsuarmi qularfiusumi Guutimut oqaasianillu upperinninneq tammariartupallapput.
Upperneq ilumoortoq
Inuppassuarnut „upperneq“ upperisamik aalajangiussisimanerinnaavoq imaluunniit oqaluffimmut aalajangersimasumut ilaasortaaneq. Biibilimili oqaaseq „upperneq“ pineqaraangat, isumaqavippoq Guutimut neriorsuutaanullu tatiginnilluinnarneq upperinnilluinnarnerlu. Upperneq taamaattoq Jiisusip Kristusip ajoqersugaasa ilisarnaatigaat.
Ilaanni qinunerup „tunniutiinnaannginnissallu“ pisariaqavinneri Jiisusip eqqartorpai. Aperaaq: „Inuulli Ernera tikiukkuni uppernermik nunarsuarmi nassaarumaarnerpa?“ Sooq taama aperiva? — Lukasi 18:1, 8.
Amerlasuut upperunnaarput
Upperunnaarsitsisinnaasut amerlaqaat, soorlu inuunermi misilitsinnerit pakatsinerillu. Professori Michael Goulder Manchesterimi England-imiittumi, 1958-mi Manchester United-ip arsaattartorpassui timmisartumik ajunaarmata palasiusimavoq. BBC-p aallakkaatitaani oqaluttuusoq Joan Bakewell oqaluttuarpoq, Michael Goulderi „inuit aliasungaarnerat takullugu sapilivissimasoq“. Taamaalilluni „inuit inuunerannut akuliuttartumik Guuteqarnera upperiunnaarpaa“. Allatut oqaatigalugu oqarpoq „Biibili . . . Guutip oqaaserinngikkaa kukkuneqanngitsoq“ „inuilli oqaaserigaat kukkunilik, immaqa sukkut tamaana Guutimik isumassarsiarititaasoq“.
Upperneq sanngiilliartuaartarpoq. Tusagassiortumut atuakkiortumullu Lodovic Kennedy-mut taamaassimavoq. Oqaluttuarpoq meeraalluni „[Guuti upperisinnaanerlugu] qularlunilu nalornisimaqaluni, qularaluttuinnarsimallunilu“. Arlaannaataluunniit apeqqutai naammaginartumik akisinnaasimanngilai. ataataa imaani toqummat uppernera sanngeereersoq aserorneqarpoq. Sakkutuut imarsiortut Guutimut, „imaani navianartunut akeqqanullu illersoqqullutik“ qinnutaat akineqanngillat, umiarsuarmi ataataata ilaaffigisaa, sorsunnersuup aappaani tyskit umiarsuaannik saassunneqarlunilu aserorneqarpoq. — All in the Mind — A Farewell to God.
Misigisat taamaattut qaqutigoortuunngillat. ‘Imaanngilarmi tamarmik upperneq pigigaat,’ apustili Paulusi oqarpoq. (2 Thessalonikamiut 3:2) Illit qanoq isumaqarpit? Silarsuarmi qularfiusumi suli Guuti oqaasialu upperineqarsinnaappat? Allaaserisami tulliuttumi tamanna qanoq allaaserineqarnersoq misissoruk.