Pallorfiginninnerup ilumoortup ilaqutariit ataatsimuulersippai

MARIA 13-inik ukioqarpoq nukkanilu Lucy eqqarliminnit Jehova pillugu tusaramikku. Eqqarliata oqaluttuuppai nunarsuaq paratiisinngorumaartoq. Tamanna niviarsiaqqat pissanganartippaat, Jehovap Nalunaajaasuisalu Naalagaaffilersaarfianni ataatsimiinnermut ilagaat. Mariap ilinniartitsilluarneq tupigusuutigaa. Oqaluffimmit tussiarfiuinnangajattumit allaaneroqaaq. Kingunitsianngua niviarsiaqqat Jehovap Nalunaajaasuanit Biibilimik atuaqqissaaqatigineqartalerput.

Aniata, Hugop, isumaliutersuutit pinngoriartorsimanermillu upperisaqarneq soqutigai. Imminut Guuteqannginneraasutut isigivoq. Kisiannili sakkutuujutilluni atuagaq Livet — hvordan er det kommet her? Ved en udvikling eller en skabelse?a (kalaallisuunngortitaanngitsoq) atuarpaa. Tassani apeqqutai arlallit upperisarsiortut allat akisinnaasimanngisaat akineqarput. Sakkutuujunini naammassigamiuk Biibilimik atuaqqissaartalerpoq, Jehovap Nalunaajaasuisalu ataatsimiinnerinut najani ilagalugit najuuttalerluni, taamaalillunilu Guutimut upperneq upperisartaanilu nakussatsillugu. Maria Lucylu 1992-imi kuisipput sallusuissutsip Guutimeersup tusaqqaarneranit ukiut marluk qaangiuttut, aniallu ukiut marluk qaangiummata kuisippoq.

Angajoqqaavisa katuullit ileqqutoqaannik pingaartitsisorujussuit, Biibilip ajoqersuutaanik soqutigisaqarpallaanngillat. Jehovap Nalunaajaasui nuannarivallaarnagit. Taamaattorli meeqqatik pulaaraangamikkit ikinngutaasa pissuserissuunerat kusanartunillu atisaqarnerat pillugu nersunngitsoorsinnaanngilaat. Aammattaaq neritillutik ataatsimiinnerni ilikkarsimasaminnik meeqqamik oqaluuserisaannit alapernaalersinneqarput.

Angajoqqaavisali ilisiinneq angakkuarnerlu soqutigaat. Aamma angutaat imerajuttuuvoq arnaallu nakuuserfigisarlugu. Ilaqutariit suujunnaarsitaaqqajaapput. Ilaanni sapaatip-akunneri marluk parnaarussaasariaqarsimavoq putumalluni inatsisinik unioqqutitsisimagami. Tassaniitilluni Biibili atuartalersimavaa. Atuartilluni Jiisusip ullussat kingulliit nalunaaqutaat pillugit oqaasii atuarpai. Apeqqutissarpassuaqalersitsivoq, taava ullut ilaanni angajoqqaavi marluullutik naalagaaffilersaarfimmukarput, Biibilimillu atuaqqissaaqatigineqarnissamik neqeroorut akueralugu. Sallusuissullu Biibilimeersoq paasigamikku, angakkuarninnernut tunngasut atuagaatitik tamaasa aserorterpaat. Anersaapilunnit saassunneqaraangamik Jehovap aqqata torlorfiginera iluaqutigisarpaat. Erniinnaq inuunertik annertuumik allanngortikkiartuaalerpaat.

Takorloorsinnaassavat Maria Lucylu qanoq killitsissimatigissasut Boliviami 1999-imi ataatsimeersuarnermi angajoqqaatik Hugomit kuisinneqartut takugamikkit. Maria Lucylu Jehovap taassumalu neriorsuutai pillugu tusaqqaaramikkilli ukiut qulingiluat qaangiupput. Hugo najaalu marluk piffissaq tamaat atorlugu Jehovamut kiffartortuupput. Nuannaarutigeqaat pallorfiginninnerup ilumoortup ilaqutariit ataatsimuulersimmagit. (wE 8/15 03)

[Quppernerup ataani ilanngussaq]