Jehovap qanoq iliornissarput naatsorsuutigaa?

„Ilisimatinneqareerputit . . . [Jehovap] suut ilinnit piumasarigai: Iluartumik iliussasutit, ilumoortumik asannissasutit, misissuilluarlutillu [anneruniajuillutillu, NV] Guutit inooqatigissagit.“ — MIKA 6:8.

1, 2. Sooq Jehovap kiffaasa ilaat nikallortarpat, sunalu qiimmassaatigisinnaavaat?

VERA kristumiu aalajaatsoq 75-inik ukioqarpoq, peqqiilliorlunilu. Ima oqaluttuarpoq: „Ilaannikkut itsuanisaartillunga takusarpakka qatanngutikka kristumiut illumiit illumut angalaarlutik oqaluussisut. Peqataasinnaannginnama qullilisarpunga. Nappaateqarnera pissutigalugu Jehovamut kiffartornermi kissaatigisattut iliorsinnaanngilanga.“

² Ilaannikkut illit aamma taamaattarpit? Jehovamik asannittut tamarmik soorunami aqqani inoorusupput piumasaqaataalu eqqortikkusullugit. Peqqiillioraannimi, utoqqalisimagaanni ilaquttanulluunniit akisussaaffeqaraanni? Nikallulaarsinnaavugut pissutsit atukkavut pissutigalugit Guutimut kiffartornermi kissaatigisavut tamaasa iliuuserisinnaanngikkutsigik. Taamatut atugaqarutta qularnanngilaq qiimmaallassasugut Mikap allagaani kapitali 6 aamma 7 misissorutsigik, kapitalimmi taakkua takutippaat Jehovap piumasaqaatai inornartuunngitsut eqqortinneqarsinnaasullu.

Guutip innuttani qanoq pisarpai

3. Jehovap Israelikkut pikitsitsiumatuut qanoq pivai?

³ Siullermik Mika 6:3-5 misissortigu malugalugulu Jehovap innuttani qanoq inussiarnisaarfigitigigai. Eqqaamajuk Mikap nalaani Israelikkut pikitsitsiumatuujusut, taamaattoq Jehovap ’innuttaminik’ taavai. Asannittumik ima kajumissaarpai: „Innuttakka, eqqaamaniarsiuk . . . .“ Jehovap sukannerluni unnerluutiginngilai, killinniarsaralugilli ima aperalugit: „Sumik iliuuseqarfigisimanerpassi?“ Allaat ’akeqqulluni’ kajumissaarpai.

4. Guutip misiginneqatiginninnera qanoq sunnerneqaatigisariaqarparput?

⁴ Jehova Guutip maligassiuinera tamatta ilinniarfigisinnaavarput! Jehovap Israelikkut Judakkullu pikitsitsiumatuut asannittumik misiginneqatigippagit, kristumiut ilagiinnut ilaasut asannittuliorfiginerusariaqannginnerpavut misiginneqatiginerusariaqannginnerlugillu. Imaassinnaavoq ilagiinniittut ilaat iluamik peqatigisinnaanngikkivut, ilaallu immaqa anersaakkut sanngiitsuupput. Jehovali asappassuk, ikiussavavut misiginneqatigalugillu.

5. Sallusuissut tunngaviusoq suna Mika 6:6, 7-imiippa?

⁵ Mika 6:6, 7 misissortigu. Pruffiiti arlalinnik apeqquteqarpoq, ima oqarluni: „Qanoq ilillunga [Jehovamut] sassaassaanga Guutilu qutsissumiittoq sikiffigalugu? Sassaassiffigissavara pilliutinik ikikkagassanik, nersuteeqqanik ataatsimik ukiulinnik? [Jehovap] nuannarisassai tassaanerpat savat angutivissat tuusintilippassuit, uulialuunniit kuuttoq kuutsigut tituusintilitsigut? Pilliutigissanerpara angajulliliara toqullugu unioqqutitsinikka pillugit, kinguaara ajortualikka pillugit?“ Naagga, Jehovamut iluarisaalissutigisinnaanngilavut „savat angutivissat tuusintilippassuit, uulialuunniit kuuttoq kuutsigut tituusintilitsigut“. Allamilli iluarisaqarpoq. Suna?

’Iluartumik iliussaagut’

6. Mika 6:8-mi piumasaqaatit pingasut suut eqqaaneqarpat?

⁶ Mika 6:8-mi ilinniarparput Jehovap qanoq piumaffigineraatigut. Mika ima oqarpoq: „Ilisimatinneqareerputit . . . [Jehovap] suut ilinnit piumasarigai: Iluartumik iliussasutit, ilumoortumik asannissasutit, misissuilluarlutillu [anneruniajuillutillu, NV] Guutit inooqatigissagit.“ Piumasaqaatit taakku pingasut misigissutsitsinnut, eqqarsaatitsinnut iliuutsitsinnullu tunngapput. Pissutsit taakku pingasut pissuserinissaannut kajumittariaqarpugut, qanorlu ineriartortissinnaanerlugit eqqarsaatigalugu, iliuutsitsigullu takutillugit. Piumasaqaatilli ataasiakkaarlugit misissoriartigik.

7, 8. (a) ’Iluartumik iliorneq’ qanoq isumaqarpa? (b) Mikap nalaani naapertuilluanngitsuliornerit suut nalinginnaappat?

⁷ ’Iluartumik iliorneq’ isumaqarpoq eqqortuliorneq naapertuilluartuliornerlu. Guutip periaasia naapertuilluartuliornermut najoqqutaavoq. Ajoraluartumik Mikap nalaani inuit eqqortuliorneq naapertuilluartuliornerlu pissuserinngilaat, akerlianilli iliortarput. Qanoq ilillutik? Mika 6:10-mi tamanna erserpoq. Versip naggataani allassimavoq taamanikkut niuertut „uuttuutipalaaviit“ atortaraat, tassa minnaarisartut. Versi 11 naapertorlugu ’oqimaaluttat peqquserluutit’ aamma atortarpaat, nanginneranilu versi 12-imi allassimavoq ’salloqittaagajuttumik oqaluttartut’. Mikap nalaani niuernerup silarsuaata allaatigineqarneranit tamatumannga paasivarput uuttuutit oqimaaluttallu peqquserluutigineqartartut, angutillu oqaasii tatigisassaanngitsut.

⁸ Niueriartortarfiinnarnili eqqunngitsuliortoqarneq ajorpoq, aamma eqqartuussivinni taamaattoqartarpoq. Mika 7:3-mi allassimavoq ’naalagaatitaq tuneqqusaartoq, eqqartuussisorlu akilerneqarumasartoq’. Eqqartuussisut peqquserluummik akilerneqartarput naapertuilluanngitsumik eqqartuussitinniarlugit pisuussuteqanngitsut ajoqutigisaannik. ’Pisooq’, mikinngitsumik oqaasissaqartoq, pinerluttulioqataasarpoq. Aap, Mika allappoq naalagaatitaq, eqqartuussisoq pisoorlu ajortulioqatigiittartut, ’mumisitsillutik’.

9. Inuit ajortut naapertuilluanngitsuliornerannit Judakkut Israelikkullu qanoq eqqorneqarpat?

⁹ Siuttuusut ajortut eqqunngitsuliorneri Judami Israelimilu sumi tamani sunniuteqarput. Mika 7:5-imi allassimavoq taamatut eqqunngitsuliortarnerit kingunerisaraat ikinngutinnaat, aap allaat aappariit, imminnut tatigiunnaartarnerat. Versi 6-imi allaatigineqarpoq qanoq kinguneqarsimasoq: Ilaqutariit soorlu erneriit, angutigiit, panigiit anaanagiillu imminnut nikagingaalersimapput.

10. Silarsuarmi naapertuilluanngitsoqaraluartoq kristumiut pissuseq suna pingaartippaat?

¹⁰ Ullumikkut pissutsit taamaappat? Aap, Mikatulli eqqunngitsuliortunik avatangiiseqarpugut, tatigeqatigiinngiffiusumi inuuvugut, takusarlutigillu innuttaaqatigiit ilaqutariillu avissaartuuttut. Guutilli kiffaasut silarsuarmi naapertuilluanngitsuliornerit tamakku kristumiut ilagiivinut eqquttariaqanngilavut. Naagga, pissuserisat soorlu unneqqarissuseq tatigisassaassuserlu pingaartittariaqarpavut, ulluinnarnilu ersersittarlugit. ’Tamatigut eqqortumik iliorumasarpugut.’ (Hebræerit 13:18) Eqqortuliortarnerup pilluaqqussutaangaarneranut ilaavoq qatanngutigiissuit akornanni tatigeqatigiissinnaanerput.

’Jehovap qaaqqusinera’ inunnit qanoq tusarneqarpa?

11. Mika 7:12 qanoq eqquuppa?

¹¹ Mika nalunaarpoq naapertuilluanngitsoqangaaraluartoq piffissaq nalliukkumaartoq inuit qanorluunniit ittut naapertuilluartuliorfigineqarfissaat. Pruffiitip siulittuutigaa inuit katersorneqarumaartut „immamiit immamut qaqqamiillu qaqqamut“. (Mika 7:12) Nalitsinni, siulittuutip inaarutaasumik eqquuffissaani, Guutip kinaassusersiornani eqqortuliornera inuiaat aalajangersimasuinnaat iluaqutiginngilaat, inuilli ataasiakkaat inuiannit tamaneersut iluaqutigaat. (Esaja 42:1) Tamanna qanoq piva?

12. ’Jehovap qaaqqusinera’ ullumikkut qanoq tusarneqartarpa?

¹² Tamanna akissutissarsiniarlugu Mikap siusinnerulaartukkut, Mika 6:9-mi, oqaasii misissussavavut. Ima allassimavoq: „[Jehovap] illoqarfik qaaqquaa. — Ilisimassuseq tassa aternik mianerinninneq.“ Inuit inuiannit tamaneersut ’Jehovap qaaqqusinera’ qanoq tusarpaat, eqqortuliornitsinnullu qanoq attuumassuteqarpa? Soorunami ullumikkut inuit Guutip nipaa tusaanngilaat. Silarsuarli tamakkerlugu oqaluussinitsigut inuit ataasiakkaat naggueqatigiinnit tamaneersut innuttaaqatigiinnilu qanorluunniit inissisimasut Jehovap qaaqqusinera tusarpaat. Tamatuma kingunerisaanik tusaasut Guutip ’aqqanik mianerinnilertarput’, ataqqinnilertarlutillu. Naapertuilluartuliortarpugut asannittuliortarlutalu Guutip Naalagaaffianik oqaluussisartutut aallussilluartutut kiffartornitsigut, aamma ’iluartumik iliortarpugut’ assigiinngisitsinata inunnut tamanut Guutip aqqanik ilisimannilersitsinitsigut.

Ilumoorfiginnilluni tunniusimaneq nuannarisariaqarparput

13. Ilumoorfiginnilluni tunniusimaneq asanninnerlu qanoq assigiinngissuteqarpat?

¹³ Mika 6:8-mi piumasaqaatit aappaat misissoriartigu. Jehovap naatsorsuutigaa ’ilumoortumik asannissasugut’, imaluunniit ’ilumoorfiginnilluni tunniusimaneq nuannarissagipput’. Oqariartaaseq hebræerisooq uani atorneqartoq kalaallisuumut nutseruminaappoq, oqaatsilli soorlu ’ilumoorfiginninneq’ aamma ’ilumoorfiginnilluni tunniusimaneq’ hebræerit oqaasiata taassuma isumaanut qanittuararsuupput. Pissusiuvoq iliuuseqartitsisartoq, misiginneqataanikkut allanik isumassuilersitsisartoq. Asanninnermut assingusorujussuuvoq, allaassutaali pingaaruteqarluni. Asanninneq oqariartaasiuvoq allanuttaaq tunngatinneqarsinnaasoq, soorlu pigisanut oqariartaatsinullu. Assersuutigalugu Biibilimi allassimavoq ’silarsuaq taassumalu pii asaneqarsinnaasut’. (1 Johannesi 2:15) Oqariartaaserli „ilumoorfiginnilluni tunniusimaneq“ immikkuullarinneruvoq. Inunnut tunngatillugu taamaallaat atorneqartarpoq, ingammik Guutimut kiffartortunut. Assersuutigalugu Ny-verden oversættelsen naapertorlugu Mika 7:20-mi eqqartorneqarpoq Aaperaap, angutip Guutimut kiffartortup, ilumoorfiginnilluni tunniusimaffigineqarnera.

14, 15. Ilumoorfiginnilluni tunniusimaneq qanoq ersertarpa, immikkoortumilu suna assersuutigineqarpa?

¹⁴ Ny-verden oversættelsen naapertorlugu Mika 7:18-imi pruffiiti allappoq Guutip ilumoorfiginnilluni tunniusimaneq nuannarigaa. Mika 6:8-mi ilumoorfiginnilluni tunniusimanermik ersersitsinissaannaq pineqanngilaq, taamatulli pissuseqarneq nuannarineqassasoq. Versit taakku sumik ilinniarfigaavut? Ilumoorfiginnilluni tunniusimaneq ersersittarparput taamaaliorusukkatta; kajumikkatta nangaassuteqanngivikkattalu taamaaliorpugut. Soorlu Jehovap pisariaqartitsisunut ilumoorfiginnilluni tunniusimanermik ersersitsinini nuannaarutigisaraa, taamatulli uagut aamma nuannaarutigisarparput.

¹⁵ Taamatut ilumoorfiginnilluni tunniusimaneq Guutip innuttaasa ilisarnaatigaat. Ataatsimik assersuuteqariarta: 2001-imi juunimi USA-mi naalagaaffik Texas nunat kiattut anorersuannit eqqorneqarmat angerlarsimaffiit tusindilippassuit aserorneqarput, aamma Jehovap Nalunaajaasuisa hundrelikkuutaat angerlarsimaffii. Jehovap Nalunaajaasuisa 10.000-it uppeqatitik pisariaqartitsisut ikiorniarlugit namminneq kajumissutsiminnik piffissartik nukitillu atorpaat. Ukiup affaa sinnerlugu nammineq kajumissutsimit sulisoqarpoq qatanngutimik kristumiut angerlarsimaffiinik 700-t naalagaaffilersaarfiinillu arfineq-pingasunik qasusuillutik sanaqqittunik. Ulloq unnuarlu sapaatip-akunnera naallugu, sapaat ilanngullugu, sulisoqartarpoq. Suleqataasinnaanngitsut aningaasanik, nerisassanik pisariaqartitanillu allanik tunissuteqarput. Sooq Jehovap Nalunaajaasui tusindilippassuit taakku uppeqatiminnik ikiuiartorpat? ’Ilumoorfiginnilluni tunniusimaneq nuannarigamikku.’ Nuannaajallannaqaarlu eqqarsaatigalugu silarsuaq tamakkerlugu qatanngutivut assigiimmik ilumoorfiginnilluni tunniusimanermik ersersitsisartut! Ilumoorfiginnilluni tunniusimaneq piumasaqaataavoq nanertuutaanani nuannaarutaasoq.

Anneruniajuilluta Guuti inooqatigisariaqarparput

16. Assersuut suna ersersitseqataava anneruniajuilluta Guutimik inooqateqartariaqarnitsinnik?

¹⁶ Piumasaqaatit pingajuat Mika 6:8-mi taaneqartoq tassaavoq ’anneruniajuilluta Guuti inooqatigissagipput’. Imaappoq pisinnaasatta killeqarnerat nassuerutigisariaqarparput Guutilu tatigalugu. Eqqarsaatigeriaruk assersuut una: Takorlooruk niviarsiarannguup angunni assaatigut tigulluartitaarsimagaa anorersuarsiortillutik. Niviarsiaqqap nalunngilluinnarpaa angisuujunnginnini nukittuujunnginninilu, ataatanili tatigaa. Niviarsiaqqatut taassumatut pisinnaasatta killeqarnerat nassuerutigisariaqarparput, aammattaarli Ataatarput qilammiusoq tatigisariaqarparput. Taamatut qanoq tatiginnittuarsinnaavugut? Ilaatigut eqqaamallugu Guutimut qanittumik attaveqarneq sooq silatusaartuliornerunersoq. Mikap eqqaasippaatigut pissutaasunik pingasunik: Jehova Aniguisitsisigaarput, Siulersortigaarput, aamma Sernissortigaarput.

17. Itsaq Jehovap innuttani qanoq aniguisillugillu siulersorlugillu sernissorpai?

¹⁷ Mika 6:4, 5 naapertorlugu Guuti ima oqarpoq: „Uangami Egyptenimit majuartippakkit.“ Aap, Jehova Israelikkut Anigusitsisigaat, nangillunilu ima oqarpoq: „Mosesi Aronilu Mirjamilu aallartippakka siulersuisussatit.“ Mosesi Aronilu Israelikkunnut siulersuipput, ajugaanersiorlunilu qitinnermi Mirjami arnartaannut siulersuisuuvoq. (2 Mosesi 7:1, 2; 15:1, 19-21; 5 Mosesi 34:10) Taamaaliorluni Jehovap kiffani aqqutigalugit innuttani siulersorpai. Versi 5-imi Israelikkut eqqaasippai akerlilersortaannut Balakimut Bileamimullu aamma illersorlugit. Angalallutik tikikkiartorneranni, Moabimi „Shittimimit“ nunami neriorsuutigisami ‘Gilgalimukarneranni’, najorpai.

18. Guuti ullumikkut qanoq uagutsinnik Aniguisitsisuullunilu Siulersuisuullunilu Sernissuisuua?

¹⁸ Guuti inooqatigigutsigu Saatanip silarsuaanit aniguisissavaatigut, oqaatsini ilagiinilu atorlugit siulersussavaatigut katersatullu illersortassalluta akerlilersortitsinnit saassunneqaraangatta. Tassa Ataatatta qilammiusup assaata tigulluartitaarnissaanut pissutissaqarluarpugut anorersuarsiorluta tikingajalernitsinni — ornitarpullu tassaavoq itsaq nunamit neriorsuutigisamit pitsaanerungaartoq, tassa Guutip silarsuassaa nutaaq naapertuilluassuseqarfiusoq.

19. Pisinnaasatta killeqarnerannik nassuerutigininnissatsinnut anneruniajuissuseq qanoq iluaqutigissavarput?

¹⁹ Guutimik anneruniajuilluni inooqatiginninneq aamma iluaqutigissavarput pissutsinik atukkatsinnik piviusorsiortumik isiginninnissatsinnut, anneruniajuitsummi piginnaasamik killeqarnerat nalunngilaat. Immaqa utoqqalineq peqqiilliulernerluunniit Jehovamut kiffartornitsinni killiliisarput. Pitsaassaaq tamanna nikallussutiginagu eqqaamagutsigu suliniutivut Guutip nuannaarutigigai pilliutivullu ilassisarai ’pisinnaasatsinnut missiliuullugit pisinnaanngisatsinnut pinnagit’. (2 Korinthimiut 8:12) Aap, Jehovap naatsorsuutigaa tarnikkut iluunngarluta, pissutsit atukkavut naapertorlugit, kiffartorfigissagitsinni. (Kolossemiut 3:23) Ilumoorluta aallussilluarlutalu sapinngisatsinnik pitsaanerpaamik Guuti kiffartorfigigutsigu, pilluaqqungaassavaatigut. — Ussatit 10:22.

Naammagittarluni utaqqinerup pilluaqqussutissartai

20. Mikap iliorneratut naammagittarluta Jehovap utaqqinerani suna iluaqutigisinnaavarput?

²⁰ Jehovap pilluaqqusinera misigigaangatsigu, Mikap isiginnittaasiatut isiginnittaaseqarnissatsinnut kajumilertarpugut. Mika ima oqarpoq: „Uanga [Jehova] alaatsinaassavara.“ (Mika 7:7a) Anneruniajuilluni Guutimik inooqateqarnermut qanoq attuumassuteqarami? Aap, naammagittarluta utaqqerusussuseqaraangatta Jehovap ullussaata suli nalliutinnginnerata pakatsissutiginnginnissaanut iluaqutaasarpoq. (Ussatit 13:12) Silarsuup matuma ajortup naggatissaa tamatta erinigaarput. Nalunngilarputtaarli sapaatip-akunneri tamarluinnaasa inuit tusindilikkuutaat Guutimik inooqateqalertartut. Tamanna naammagittarluni utaqqinissamut pissutissaalluarpoq. Tamatumunnga atatillugu qatanngut angut ukiorpassuarni Jehovamut kiffartorsimasoq ima oqarpoq: „Ukiuni 55-ini oqaluussisartuunera kingumut eqqarsaatigigaangakku, qularutigineq ajorpara Jehova utaqqigakku misiginngitsuugaqarsimananga. Aliasuutissarpassuaraluakkali pinngitsoorpakka.“ Illit aamma taamatut misigivit?

21, 22. Mika 7:14 ullumikkut qanoq eqquuppa?

²¹ Qularutissaanngilaq ullumikkut Jehovamik inooqateqarneq iluaqutigigipput. Mika 7:14-imi Guutip innuttai assersuunneqarput savanut toqqissillutik paarsisuminnit najorneqartunut. Ullumikkut eqquunnerani annermi anersaakkut Israelikkut amiakkui aamma ’savat allat’ Paarsisuminni, Jehovami, tatigilluinnakkaminni toqqissisimapput. ’Orpippassuarni kisimiittuullutik, nunami paarnanik naatitsivimmi’ najugaqarput, ima paasillugu silarsuarmit ajornartorsiorfiugaluttuinnartumit uloriarnartumillu avatangiisiminnit anersaakkut avissaarsimapput. — Johannesi 10:16; 5 Mosesi 33:28; Jeremia 49:31; Galatiamiut 6:16.

²² Guutip anersaakkut savaatai, innuttai, pillugit Mika 7:14-imi ima allassimavoq: „Bashanip Gileadillu ivigaqarfiini mangiassapput.“ Savat Bashanip Gileadillu ivigaqarfiini naggorissuni ivigartortut nerisarissaarput. Aamma ullumikkut Guutip innuttai pitsaasunik naammattunillu anersaakkut inuussutissaqarput — tamannalu anneruniajuilluni Guutimik inooqateqarnerup pilluaqqussutissartaasa ilagaat alla. — 4 Mosesi 32:1; 5 Mosesi 32:14.

23. Mika 7:18, 19 sumik ilinniarfigisinnaavarput?

²³ Mika 7:18, 19-imi pruffiitip erseqqissarpaa Jehovap peqqissimisut isumakkeerfigerusukkai. Versi 18-imi allassimavoq Jehova ’isumakkeerfiginnittartoq’ aamma ’asattuusisartoq ajortuliortunik’. Versi 19-ilu napertorlugu ’ajortuliat tamaasa immap itineranut igissavai’. Tamanna sumik ilinniarfigisinnaavarput? Aap, imminut aperisinnaavugut tamatumuuna Jehova ilaarnerlutigu. Allat kukkugaangata isumakkeerfigisarpavut? Isumakkeerfigeqqugaangata kukkussutitillu iluarsiniaraangatigik, Jehovatut kajumilluta qaqugorsuarmulluunniit isumakkeerfigilluinnartariaqarpavut.

24. Mikap siulittuutaata misissornera qanoq pissarsiffigaajuk?

²⁴ Mikap siulittuutaa sumik ilinniarfigaarput? Eqqaasinneqarpugut Jehovap imminut kajungilersitani tatiginartumik neriuuteqalersittarai. (Mika 2:1-13) Kajumissaarneqarpugut pallorfiginninnermik ilumoortumik sapinngisarput tamaat siuarsaassasugut Guutip aqqani naassaanngitsumik inuusinnaaqqulluta. (Mika 4:1-5) Qularunnaarsinneqarpugullu qanorluunniit atugaqaraluarutta Jehovap piumasaqaataanik tamatta eqqortitsisinnaasugut. Aap, Mikap siulittuutaata ilumut nakussatsippaatigut Jehovap aqqani inuunissatsinnut. (wE 8/15 03)

Qanoq akissavit?

• Mika 6:8 naapertorlugu Jehovap qanoq piumaffigaatigut?

• ’Iluartumik iliussagutta’ suna pisariaqarpa?

• ’Ilumoorfiginnilluni tunniusimaneq nuannaralugu’ qanoq ersersissinnaavarput?

• ’Anneruniajuilluni Guutimik inooqateqarneq’ qanoq isumaqarpa?

[Qupp. 27-mi assiliartat]

Mikap Jehovap piumasaqaatai eqqortippai ajussusermik avatangiiseqaraluarluni. Illit aamma taamaaliorsinnaavutit

[Qupp. 29-mi assiliartaq]

Eqqortuliortariaqarpugut inuit innuttaaqatigiinni qanorluunniit inissisimasut oqaluussiffigalugit

[Qupp. 29-mi assiliartat]

Ilumoorfiginnilluni tunniusimanermik nuannarisaqarneq ersersittariaqarparput pisariaqartitsisut ikiorlugit

[Qupp. 29-mi assiliartaq]

Anneruniajuilluta pisinnaasatta killeqarnerat nassuerutigisariaqarparput sapinngisatsinnik iliuuseqaatigaluta