Nutaarsiassaq nuannersoq oqaatsinut 500-nut

RWANDAMIUT imminnut sorsunnerata nalaanni nutserisut ikittunnguit pigisatik qimaannarlugit qimaapput. Kisiannili qarasaasiatik angallattakkat tigupallappaat qimaasunullu inissiamut nassarlugit. Sooq? Biibililersaarutit Rwandamiusuunngortinneqartuarsinnaaqqullugit.

Asiap kujataata kangisissuani arnaq inuusuttoq kiassuarmi unnuarornera tikillugu qasungaaraluarluni sarfaaruttoortaqattaarnermillu akornusersorneqaraluarluni nutserivoq. Sooq taama ilungersortigiva? Nutsikkani piffissaliussaq eqqorlugu naqiterneqarsinnaaniassammata.

Nutserisut taakku kajumissutsiminnit sulisorpassuit 2300-t missaanniittut, nunarsuarmi tamarmi sumiiffinni 190-nit amerlanerusuni sulisartut, ilagaat. Assigiinngitsunik ukioqarput, 20-niit 90-ingajaat tikillugit, qasusuillutillu suleruloortarput inuit tusarliussaq Biibilimiittoq oqaatsit assigiinngitsut 500-it atorlugit tuppallersaatiginiassammassuk. — Saqqummersitat 7:9.

Inunnut assigiinngitsorpassuarnik oqaasilinnut tusarliunneqartoq

Ukiuni kingulliunerusuni Jehovap Nalunaajaasuisa nutserinerat aatsaat taama annertutigilersimavoq. Assersuutigalugu, 1985-mi Napasuliaq Alapernaarsuiffik oqaatsini 23-ni ataatsikkut saqqummersarpoq — taamani suliarujussuuvoq maluginiarnartoq. Ullumikkut Napasuliaq Alapernaarsuiffik oqaatsini 181-ini pineqarsinnaavoq, naqitikkallu tamarmik ataatsikkut saqqummersinneqartarput nunarsuaq tamakkerlugu atuartartut paasissutissanik assigiinnik ataatsikkut atuaqqissaarsinnaaqqullugit.

Oqaatsini 50-it missaanni Napasuliaq Alapernaarsuiffik atuagassiatuaavoq aalajangersimasumik saqqummersartoq. Taamaappoq atuakkanik naqiterisitsisarfiit niuernermut atasut atuagassianik atuakkanillu oqaatsinut ikittuinnarnit atorneqartunut saqqummersitsinissaq soqutiginngimmassuk. Nunarsuarli tamakkerlugu Jehovap Nalunaajaasui aningaasanik namminneq kajumissutsiminnit tunissuteqartarput ‘assigiimmik atugaqalerniassagamik’ Guutillu oqaasia Biibililersaarutillu pisariaqartitsiffiusumi sumiluunniit pigineqarsinnaaqqullugit. — 2 Korinthimiut 8:14.

Inuit tusarliussap Biibilimiittup namminneq oqaatsitik atorlugit saqqumiunneqartarnera pingaartingaartarpaat. Assersuutigalugu, qanittukkut Biibililersaarutit miskitotut, Nicaraguami inunnit 200.000-it missaanniittunit oqaaserineqartut, saqqummersinneqarput. Arnap atuagaq Biibilimik oqaluttuaatikkaa miskito-toortoq piumavaa, atuagarlu arnamut tunniunneqarmat palasi tamaani najugalik najuuppoq. Palasip atuagaq kusanartoq takugamiuk pilerigaa. Arnalli atuagaq tunniukkusunngilaa naak palasip kaffit 20 kiilut neqeroorutigigaluarai!

Ukiut qulit kingulliit ingerlaneranni Biibililersaarutit Mexicop inoqqaaviisa oqaasiisa ilaannut 15-it missaanniittunut nutserneqarsimapput, ilaatigut oqaatsinut ukununnga: maya, nahuatl aamma tzotzil. Ukiut quliunngitsulluunniit ingerlaneranni Mexicomi ilagiit nunap inoqqaaviisa oqaasiinik oqaasillit aamma ilagiit ussersorlutik oqaluttut 72-niit 1200 sinnilinngorlutik amerleriarsimapput. Immaqa Jehovap Nalunaajaasuisa tusarliussaq Biibilimiittoq inuit uummataannut ‘ikkussinnaavaat’, aatsaalli Guutip ikiuineratigut sallusuissutip naatsiiassartai naajartorsinnaapput inerititaqarsinnaallutillu. — 1 Korinthimiut 3:5-7.

Biibili nutsigaq nutaanerusoq oqaatsini 80-ini

Ukiuni kingulliunerusuni Jehovap Nalunaajaasui immikkut suliniuteqarsimapput Biibilimik nutsigaq Ny Verden-Oversættelsen af De Hellige Skrifter saqqummersinniarlugu, maannalu tamarmi ilaannaaluunniit oqaatsini 80-ni pineqarsinnaavoq. Qanoq igineqarpa? Jehovap Nalunaajaasuisa ilaat Afrikami kujallermioq Biibili tswanatut nutsigaq pillugu ima oqarpoq: “Atortussatsialak! Nutsigaq taanna pissutigalugu Guutip oqaasianik pingaartitsinerulissaanga. Oqaatsit atorneqartut paasiuminarput atuaruminarlutillu.” Angut Mocambique-imioq Biibilimik tsongatut atuartartoq ima allappoq: “Biibililersaaruterpassuarnik peqaraluarluta Biibiliuteqannginnerput soorlulusooq sila kallersoq sialuttaqanngitsoq! Biibilili nutsigaq Ny Verden-Oversættelsen tsongatut saqqummermat kiisami ‘siallilerpoq’.”

Nutaarsiassamik nuannersumik Biibilimeersumik nutserisut siaruarterisullu itsaq Jiisusip siulittuutaanik maluginiarnartumik eqquutitsipput. Jiisusi ima oqarpoq: ‘Naalagaaffimmik iivangkiiliu [nutaarsiassaq nuannersoq, NV] taanna silarsuarmi tamarmi oqaluussissutigineqassaaq inuiannut tamanut nalujunnaarsillugu, taavalu naggatissaq nalliutissaaq.’ — Matthæusi 24:14. (wp09 11/01-E)

[Quppernerup ataani ilanngussaq]

[Qupp. 31-mi takussutissaq]

(Allassimasut qanoq inissisimanersut naqitami takuneqarsinnaavoq)

NY VERDEN-OVERSÆTTELSEN

Tamarmi ilaannaaluunniit pineqarsinnaasoq

1950 1*

1970 7*

1990 13*

2000 36*

2010 80*

BIIBILILERSAARUTIT ALLAT

1950 88*

1960 125*

1970 165*

1980 190*

1990 200*

2010 500*

*OQAATSIT AMERLASSUSII

[Qupp. 31-mi assiliartat]

Kajumissutsiminnit sulisut 2300-t missaanniittut Biibililersaarutit oqaatsinut 500-nut nutsertarpaat

BENIN

SLOVENIA

ETHIOPIA

TULUIT NUNAAT