Jehovamit pigineqarneq — tassa pisassarinngisaraluamik ajunngisaarfigineqarneq
‘Jehovap pigaatigut.’ — ROMAMIUT 14:8.
1, 2. (a) Suna immikkut pisinnaatitaaffigaarput? (b) Apeqqutit suut maanna sammissavavut?
ISRAELIKKUT immikkut pisinnaatitaaffimmik angingaartumik neqeroorfigineqarput Jehovap ima oqarfigimmatik: “Inuiaqatigiinnit tamanit immikkoortillusi pigisassarsiariumaarpassi.” (2 Mosesi 19:5) Ullumikkut ilagiinni kristumiuniittut tamarmik aamma Jehovamit pigineqarnertik ataqqinaatigaat. (1 Petrusi 2:9; Saqqummersitat 7:9, 14, 15) Tamanna immikkut pisinnaatitaaffiuvoq naassaanngitsumik iluaqutigisinnaasarput.
2 Jehovamilli pigineqarneq immikkut pisinnaatitaaffiuinnarani aamma akisussaaffittaqarpoq. Ilaat immaqa ima eqqarsarput: ‘Jehovamit piumaffigineqarnittut iliorsinnaassaanga? Ajortuliussagaluaruma taassuma ajattussavaanga? Jehovamit pigineqarnera kiffaanngissuseqarunnaassutigissavara?’ Apeqqutit taakku eqqarsaatigeqqissaartariaqarpavut. Aammali allamik eqqarsaatigeqqissaartariaqakkatsinnik apeqquteqarpoq: Jehovamit pigineqarnerup iluaqutissartai suuppat?
Jehovamit pigineqarneq pilluarnermik kinguneqartarpoq
3. Rahabip Jehovamut kiffartorniarluni aalajangernini qanoq iluaqutigaa?
3 Jehovamit pigineqarneq iluaqutissartaqarpa? Rahabi, atortittartoq itsaq Jerikomi inuusoq, pillugu oqaluttuaq eqqarsaatigeriaruk. Qularnanngitsumik Kana’animiut guutiinik aserorsaataasumik pallorfiginninnissamut perorsagaavoq. Jehovalli Israelikkunnik ajugaatitsisarsimaneri pillugit tusarami paasilerpaa Jehova Guutiusoq ilumoortoq. Taamaattumik Guutip innuttamisut toqqagai sernissorniarlugit nammineq inuunini navianartorsiortippaa taakkunanngalu annaanneqarnissani isumalluutigalugu. Biibilimi ima allassimavoq: “Aammattaaq arnaq atortittartoq Rahabi alapernaarsuiartortitanik ilassinnikkami aqqutikkullu allakkut aniguisikkamigit suliamigut iluartuutitaannginnerpa?” (Jaaku 2:25) Eqqarsaatigeriaruk Guutip innuttaanut minguitsunut, Guutip inatsisai tunngavigalugit asannittuliornissamik naapertuilluartuliornissamillu ilinniartinneqarsimasunut, ilaalernini qanoq iluaqutigitigigaa. Inooriaaserisimasani inooriaaseriunnaaramiuk qanoq pilluartigisimassava! Israelikkuusumut katippoq Boazimullu, Guutimik mianerinnilersumut, anaananngorluni. — Josva 6:25; Ruthi 2:4-12; Matthæusi 1:5, 6.
4. Ruthip Jehovamut kiffartorniarluni aalajangernini qanoq iluaqutigaa?
4 Arnaq alla Jehovamut kiffartorniarluni aalajangertoq tassaavoq Ruthi Moabikkuusoq. Inuusuttuulluni Kemoshimik Moabikkullu guutiinik allanik pallorfiginnittarsimagunarpoq, Guutili ilumoortoq, Jehova, ilisarisimalerpaa Israelikkuusumullu nunamini qimarngusimasumut katilluni. (Atuakkit Ruthi 1:1-6). Ruthip ukuaqataatalu, Orpap, sakertik No’omi kingusinnerusukkut Betlehemiliaqatigigamikku, No’omip arnat inuusuttut taakku marluk kajumissaarpai nunaminnut angerlaqqullugit. Israelimi nunassinnissaq taakkununnga imaannaanavianngilaq. Orpa ‘inuiaqatiminut guutiminullu uterpoq’, Ruthili utinngilaq. Uppernerminut naapertuuttumik iliuuseqarpoq, aamma qularutiginngilaa kimit pigineqarusunnerluni. No’omi ima oqarfigaa: “Ilinnit qimagunnissannut angerlarnissannullu kimigiiserfigeqinanga. Ornikkat uangattaaq ornissavara, najugariligassannilu najugaqassaanga. Inuiaqatitit uangattaaq inuiaqatigissavakka, illillu Guutit uangattaaq Guutigissavara.” (Ruthi 1:15, 16) Ruthi Jehovamut kiffartorniarluni aalajangerami Guutip inatsisai, uillarnernut piitsunullu nunaateqanngitsunullu immikkut aaqqissuussanik ilallit, iluaqutigisinnaavai. Jehovamit sernissugaagami pilluarlunilu toqqissisimavoq.
5. Aalajaallutik Jehovamut kiffartortunut tunngatillugu illit sunik maluginiagaqarsimavit?
5 Immaqa ilisarisimasaqarputit Jehovamut tunniulluinnareerlutik ukiuni qulikkuutaani taassumunnga kiffartorsimasunik. Aperikkit taassumunnga kiffartornertik namminneq qanoq iluaqutigisimaneraat. Ajornartorsiuteqarnani inuusoqartanngikkaluartoq tussiaasiortup oqaasiisa ukua ilumoornerannut uppernarsaaterpassuaqarpoq: “Pilluarput inuiaat [Jehovamik] Guuteqartut!” — Tussiaat 144:15.
Jehova ingasattumik piumaffiginninneq ajorpoq
6. Sooq Jehovap piumasaqaataanik eqqortitsisinnaassanngissasoraluta annilaangasariaqanngilagut?
6 Immaqa illit isumaliorsimavutit Jehovamit piumaffigineqarnittut iliorsinnaassanerlutit. Guutimut kiffaanissaq, inatsisaanik maleruaanissaq aqqanilu oqalunnissaq eqqarsaatigalugu sapilersutut misigisoqariaannaavoq. Assersuutigalugu Mosesi imminut ajukkuppoq Israelikkunnut Egyptenimilu kunngimut oqaloqquneqarami. Jehovalli Mosesi ingasattumik piumaffiginngilaa. ‘Qanoq iliornissaanik ajoqersorpaa’. (Atuakkit 2 Mosesi 3:11; 4:1, 10, 13-15). Mosesi ikiorumaneqarnerminut akuersigami Guutip piumasaatut iliornerup nuannersua misigaa. Taamatuttaaq Jehovap uagut ingasattumik piumaffigineq ajorpaatigut. Naammalluinnanngitsuunerput pillugu paasinnippoq, aamma ikiorusuppaatigut. (Tussiaat 103:14) Jiisusi ilaarlugu Guutimut kiffartorneq artornarnani nukissaqaleqqinnarpoq, taamatummi inuuneq allanut iluaqutaasarpoq Jehovallu uummataanik nuannaartitsisarluni. Jiisusi ima oqarpoq: “Ornissinga . . ., nukissaqalerseqqissavassi. Nammaatara ilissinnut pisissiuk, ilinniarfigisingalu saamagama uummatikkullu makitajuikkama.” — Matthæusi 11:28, 29, NV.
7. Sooq Jehovap iliuusereqqusaminik iliornissannut ilinnik ikiuinissaa qularutiginngilluinnarsinnaaviuk?
7 Jehovamik nakussatsitsisitsitut tatiginnittuartilluta taassuma pisariaqartitatsinnik kajumissaartuassavaatigut. Jeremia, nakimaatsuusimannginnguatsiartoq, assersuutigeriartigu. Jehovap pruffiitiusussanngortimmani ima oqarpoq: “Ila Guuti, [Jehova], inuusuttuuvunga; oqalunneq naluvunga!” Kingusinnerusukkut allaat ima oqarpoq: “Aqqani oqaloqqinnianngilanga.” (Jeremia 1:6; 20:9) Jeremialli tusarliussaq tusarnaarumaneqanngitsoq Jehovamit kajumissaarneqarluni ukiuni 40-ni oqaluussissutigisinnaavaa. Jehovap taanna arlaleriarluni ima uppernarsaavigaa: ‘Najussavakkit annaatissallutillu.’ — Jeremia 1:8, 19; 15:20.
8. Jehovamik tatiginninnerput qanoq ililluta ersersissinnaavarput?
8 Jehovap, Mosesimik Jeremiamillu nakussatsitsisimanermisut, uagut ullumikkut kristumiunut piumasaqaataasut malillugit iliornissatsinnut ikiorsinnaavaatigut. Guutimik tatiginninnersugut apeqqutaaginnarpoq. Biibilimi ima allassimavoq: “[Jehova] tatigiuk uummatikkut iluunngarlutit, namminerlu paasisimasaqassutsit tatigeqinagu! Eqqarsaatigiuartaruk sumiikkaluaraangavilluunniit, taava ingerlavissatit nalimmatsissavai.” (Ussatit 3:5, 6) Jehovamik tatiginninnerput ersersittarparput taassuma oqaatsini ilagiissinilu aqqutigalugit ikiuinera iluaqutiginiaraangatsigu. Jehova inuunitsinni siulersuisikkutsigu taassumunnga aalajaannerput akornuserneqarnavianngilaq.
Jehovap kiffani tamaasa immikkut isumassortarpai
9, 10. Tussiaat 91 qanoq sernissorneqarnissatsinnik neriorsuutitaqarpa?
9 Jehovamut tunniulluinnarniarlutik eqqarsartut ilaat immaqa isumakulupput ullut ilaanni ingasattumik ajortuliussasoralutik, aamma Jehovamit iluarisaajunnaarlutillu ajattorneqassasoralutik. Qujanartumik Jehovap erlinnartumik imminut attaveqartuarnissatsinnut pisariaqartitatsinnik sernissortarpaatigut. Tamanna Tussiaat 91-imi qanoq ersersinneqarnersoq misissoriartigu.
10 Tussiaat taanna ima aallartippoq: “Qutsinnerussaartup toqqorsimaffiani issiasoq, ineqarpoq Ajugaqanngitsup alanngigaani, [Jehova] pillugu ima oqarsinnaavoq: ‘Qimarnguffiga pallittaalisaralu, Guutiga tatigisara.’ Taassumami annaatissavaatit timmiarniap nigaanit.” (Tussiaat 91:1-3) Malugiuk Guuti neriorsuisoq imminik asannillutillu tatiginnittut sernissorumaarlugit. (Atuakkit Tussiaat 91:9, 14). Qanoq sernissorumaaramigit? Jehovap itsaq kiffami ilaat — ilaatigut kinguaariit Missiarsimut neriorsuutigisamut siuaasaasussat atatiinnarniarlugit — timikkut sernissorsimavai. Angutilli aalajaatsut allarpassuit naakkittaaqisumik Guutimik tunussitinniarneqarlutik parnaarussaasimapput naalliutsitaasimallutilluunniit toqutaasimallutilluunniit. (Hebræerit 11:34-39) Taakku assuarnaakkunnaannginnissaminnut Jehovamit anersaakkut sernissorneqaramik pinertusaarnissamut pisariaqartitaminnik sapiissuseqalerput. Taamaattumik Tussiaat 91 Guutip kiffaminik anersaakkut sernissuiumaarnerminik neriorsuutaatut isigineqarsinnaavoq.
11. ‘Qutsinnerussaartup toqqorsimaffia’ suua, tassanilu kikkut Guutip sernissorpai?
11 Tassa ‘Qutsinnerussaartup toqqorsimaffia’ tussiaasiortup eqqartugaa sumiiffiuvoq assersuutaasoq anersaakkut sernissorneqarfiusoq. Tikeraartuullutik Guutimi ineqartut uppernerminnik Guutimillu asanninnerminnik navianartorsiortitsisinnaasunut tamanut sernissorneqarput. (Tussiaat 15:1, 2; 121:5) Toqqorsimaffiuvoq ima paasillugu uppinngitsunit ilisimaneqanngitsoq. Tamaani Jehovap innuttani ima oqartullusooq sernissortarpai: ‘Illit Guutigaakkit tatigisara.’ Qimarnguffimmi tassaniittuarutta “timmiarniap”, Saatanip, nigaanit pisaritissasoraluta taamaalillutalu Guutimit iluarisaajunnaassasoraluta isumakuluttariaqanngilagut.
12. Suut Guutimut attaveqarnitsinnik navianartorsiortitsippat?
12 Suut Guutimut attaveqarnitsinnik erlinnartumik navianartorsiortitsippat? Tussiaasiortoq arlalinnik eqqaasaqarpoq, ilaatigut “nappaat toqoraataasoq taartumi qanilliartortoq”, aamma ‘nappaat [perluk, 1900] ullup qaammaruttornerani sakkortuumik atugaasoq’. (Tussiaat 91:5, 6) Namminissarsiorlutik siulersorneqarusunngitsorpassuit “timmiarniap” pisarisimavai. (2 Korinthimiut 11:3) Allat piumatunermik, makitassusermik pigisaleritunermillu siuarsaanermigut pisarisarpai. Suli allat nunagisamik asanninneq, pinngoriartuaarsimaneraaneq upperisarsiornerlu eqqunngitsoq atorlugit tammartittarpai. (Kolossemiut 2:8) Aamma allarpassuit kinguaassiuutitigut inuunerlunnerup nigaanit nakutitaasimapput. Perluit anersaakkut ajoqutaasut taakku pissutigalugit inuit millionillit Guutimik asannikkunnaarsimapput. — Atuakkit Tussiaat 91:7-10; Matthæusi 24:12.
Guutimik asanninnerit qanoq ilillutit illersorsinnaagit
13. Jehovap anersaakkut peqqissutsitsinnik navianartorsiortitsisunut qanoq sernissortarpaatigut?
13 Jehovap innuttani anersaakkut navianartunut taakkununnga qanoq sernissortarpai? Tussiaat imaappoq: “Inngilini [peqqussavai] paareqqullutit ingerlavigisassanni tamani.” (Tussiaat 91:11) Inngilit qilammiittut siulersorlutalu illersortarpaatigut nutaarsiassaq nuannersoq oqaluussissutigisinnaaniassagatsigu. (Saqqummersitat 14:6) Inngilit saniatigut, utoqqaanertat kristumiut ajoqersuutinit eqqunngitsunit tammartitaaqqunata illersortarpaatigut Biibili tunngavigilluinnarlugu ilinniartitsinermikkut. Silamiorpaluttumik isiginnittaaseqarunnaarniarlutik ilungersortut ikiorsinnaavaat. (Titusi 1:9; 1 Petrusi 5:2) Aammattaaq ‘inussiap aalajaallunilu silatuup’ (NV) anersaakkut inuussutissaqartittarpaatigut pinngoriartuaarsimaneraanermut, kinguaassiuutitigut inuunerluttuliornissamut ussernartunut, pisuunngorusussusermut tusaamaneqarusussusermullu kissaatinullu ajoqutaasunut sunniiniutinullu allarpassuarnut nakkaannaqqunata. (Matthæusi 24:45) Illit navianartut tamakku akiornissaannut suut iluaqutigisimavigit?
14. Guutip sernissuinera qanoq iluaqutigisinnaavarput?
14 Guutip ‘toqqorsimaffiutaani’ illersuutaasumiittuarumalluta susariaqarpugut? Soorlu ajunaarnernut, pinerluttunut arlaannillu tunillatsinnissamut imminut illersortuartariaqartugut, taamatuttaaq anersaakkut navianartunut imminut illersortuartariaqarpugut. Taamaattumik Jehovap atuagaatitsinni atuagassiaatitsinnilu aamma ataatsimiinnerni ataatsimeersuarnernilu uagutsinnut siunnersuutigisartagai tamakkiisumik iluaqutiginiartuartariaqarpavut. Aammattaaq utoqqaanertanut siunnersortissarsiorsinnaavugut. Aamma qatanngutitta kristumiut pissusii assigiinngitsorpassuit iluaqutigingaartarpavut, ilaa? Aap, uppeqatitsinnik ilagiinniittunik peqateqartarnerput ilisimassuseqalernissamut iluaqutigaarput. — Ussatit 13:20; atuaruk 1 Petrusi 4:10.
15. Sooq qularutiginngilluinnarsinnaaviuk Jehovamit iluarisaajunnaassutigisinnaasannut tamanut taassuma nammineq illersorumaaraatit?
15 Jehovamit iluarisaajunnaassutigisinnaasatsinnut tamanut taassumannga illersorneqarnissatta qularutiginissaanut pissutissaqanngilagut. (Romamiut 8:38, 39) Taassuma ilagiit upperisarsiornikkut politikkikkullu akeraasunut pissaaneqangaartunut uagutsinnik toqutsinissamiunngitsoq uagutsinnilli Guutitsinnit illernartumit avissaartitsinissamik amerlanertigut anguniagaqartartunut illersorsimavai. Jehovap neriorsuutaa una eqquuppoq: “Sakkut ilinnut sakkuaatissatut saffiukkat atorsinnaassuseqassanngillat.” — Esaja 54:17.
Kia kiffaanngissuseqalersissinnaavaatigut?
16. Sooq silarsuarmi kiffaanngissuseqalersinnaanngilagut?
16 Jehovamit pigineqarutta kiffaanngissuseqarunnaassaagut? Naamik, silarsuarmulli ilaasuugutta kiffaanngissuseqarunnaassagaluarpugut. Silarsuaq manna Jehovamit ungasillisimavoq guutimillu naakkittaatsumit inunnik inussiaatiginnittumit aqunneqarluni. (Johannesi 14:30) Assersuutigalugu Saatanip pissutsinik aaqqissuussinerata inuit kiffaanngissuseqarunnaarsinniarlugit aningaasatigut artukkiineq atortarpaa. (Naleqqiuguk Saqqummersitat 13:16, 17). Aamma ajorti inunnik inussiaatinngortitsinissamut nakutitsisinnaassuseqarpoq. (Johannesi 8:34; Hebræerit 3:13) Uppinngitsut immaqa inooriaaseq Jehovap najoqqutassiaanut akerliusoq siuarsaraangamikku kiffaanngissuseqarnissaq neriorsuutigisarpaat, uppinngitsunilli taakkuninnga malinnittut tamarmik inuunerlunnermut nikanarsaataasumut inussiaatinngupallassapput. — Romamiut 1:24-32.
17. Jehovap sumit kiffaanngissuseqalersikkumavaatigut?
17 Jehovalli uagutsinnut ajoqutaasinnaasunit tamanit aniguisissavaatigut uagut imminut paarisassanngortikkutta. Pissutsit atukkavut pissutsinut inuup nakorsamit pilattaallaqqissumit, inuunerminik navianartorsiorunnaartitsisinnaasumit, annaanneqarnissaminik isumalluutiginnittup atugaanut ilaatigut assingupput. Tamatta navianartorsiorpugut ajorti kingornussimagatsigu. Aatsaat Kristusip pilliutaa tunngavigalugu Jehovamut imminut tunniukkutta ajortip sunniutaasa pinngitsoornissaat naassaanngitsumillu inuulernissarput neriuutigisinnaavarput. (Johannesi 3:36) Soorluttaaq nakorsaq pilattaasartoq pillugu paasisaqarnerujartortilluta taanna tatiginerulersinnaagipput, Jehova ilisarisimanerujartortillugu tatiginerulersinnaavarput. Taamaattumik Guutip oqaasia peqqissaartumik atuaqqissaartuartarparput taassumannga pigineqarnissamik annilaangaginninnani taassuminnga asanninnissamut iluaqutigisaratsigu. — 1 Johannesi 4:18.
18. Jehovamit pigineqarneq qanoq kinguneqassava?
18 Jehovap inuit tamaasa nammineq aalajangersinnaanermik kiffaanngissusilerpai. Oqaasiani ima allassimavoq: “Inuuneq qinerniaruk illit kinguaassatillu inuuginnaqqullusi! [Jehova] Guutit asassavat!” (5 Mosesi 30:19, 20) Kissaatigaa asanninnitsinnik ersersitsivigissagitsinni imminut kiffartorniarluta nammineq piumassutsitsinnit aalajangernitsigut. Guutimit asasatsinnit pigineqarnerput kiffaanngissuseqarunnaassutiginagu pilluaatigissavarput.
19. Sooq Jehovamit pigineqarneq pisassarinngisaraluamik ajunngisaarfigineqarnertut isigissavarput?
19 Ajortiliugatta Guutimit naammalluinnartumit pigineqartariaqanngikkaluarpugut. Guutimit pigineqarsinnaavugut taamaallaat taassuma pisassarinngisaraluatsinnik ajunngisaarnera pissutigalugu. (2 Timotheusi 1:9) Taamaattumik Paulusi ima allappoq: ‘Inuugutta Jehovamut inuuvugut, toquguttalu Jehovamut toquvugut. Tassa inuugutta toquguttaluunniit Jehovap pigaatigut.’ (Romamiut 14:8) Qularnanngilluinnarpoq Jehovamit pigineqarniarluta aalajangernerput peqqissimissutiginngisaannassagipput.
Qanoq akissavit?
• Jehovamit pigineqarnerput qanoq iluaqutigaarput?
• Sooq Guutimit piumaffigineqarnitsitut iliorsinnaavugut?
• Jehovap kiffani qanoq illersortarpai?
[Qupp. 14-mi assiliartat]
Allat aperikkit Jehovamit pigineqarnertik qanoq iluaqutigisimaneraat
[Qupp. 16-mi assiliartaq]
Jehova sutigut sernissuisarpa?