Jiisusip sumik ilinniartikkaatigut

Pallorfiginninneq ilumoortoq pillugu

Pallorfiginneriaatsit tamaasa Guutip akuerai?

▪ Jiisusip inuit upperisarsiornermit eqqunngitsumit tammartinneqarsimasut nalligai. ‘Pruffiitioqqusersunut savatut atisaqartunut, ilumikkulli amaqqutut kiisortutut’ ittunut mianersoqqusivoq. (Matthæusi 7:15) Maluginikuuiuk inuit ilaasa siunertapiloqarnertik isertorniarlugu upperisarsiorneq atortaraat?

Jiisusi Guutimut ima qinuvoq: “Oqaatsitit sallusuissutaapput.” (Johannesi 17:17) Guutip pallorfiginneriaaseq sallusuissummut Biibilimiittumut naapertuutinngitsoq akuerinngilaa. Taamaattumik Jiisusip Guutip oqaasii uku issuarpai upperisarsiornikkullu ilumoortuusaartunut atorlugit: “Asuliinnaq guutisiorfigaannga, inuimmi inassutiliaat ajoqersuutigisaramikkit.” — Matthæusi 15:9.

Upperisarsiorneq ilumoortoq nassaassaava?

▪ Jiisusip arnaq Samariamiu upperisarsiornermit eqqunngitsumit tammartinneqarsimasoq naapikkamiuk ima oqarfigaa: “Ilissi ilisimanngisarsi pallorfigaarsi; . . . ilumoortumik pallorfiginnittut Ataatamik [pallorfiginnissapput] anersaakkut ilumoornikkullu. Ataatarmi taamaattunut pallorfigeqquvoq.” (Johannesi 4:22, 23) Erseqqippoq pallorfiginninneq ilumoortoq nassaassaasoq.

Jiisusi ima oqarpoq: ‘Isumannik iliorneq ajorpunga; Ataatalli uannut ajoqersuutaa malillugu oqaluppunga.’ Jiisusip nalunngilaa upperisarsiorneq allanut ilinniartitsissutigisani kisimi ilumoortuusoq. (Johannesi 8:28) Taamaattumik ima oqarpoq: “Uanga aqqutaavunga sallusuissutaallungalu inuussutaallungalu; uakkuinnaq Ataatamut pisoqarsinnaavoq.” (Johannesi 14:6) Pallorfiginnittut ilumoortut Ataatamut aqqutaat ataasiinnaammat upperisarsiornermi ilumoortumi ataasioqatigiittariaqarput.

Ilumoortumik pallorfiginnittut ilisarnaataat suuppat?

▪ Kristumiu tassaavoq Jiisusimik Kristusimik maligassiaanillu malinnittoq. Jiisusimik malinnittut ilisarnaataat erseqqissut sisamat sammilaariartigit.

1. Jiisusi Kristusi Jehovamut ima qinuvoq: ‘Aqqit ilisimalersippara.’ (Johannesi 17:26) Ullumikkuttaaq Kristumiut ilumoortut Guutip aqqa atortarpaat.

2. Jiisusip Jehovap naalagaaffia oqaluussissutigaa, aamma ajoqersukkani illumit illumut oqaluussiartoqquai. Ima oqarpoq: “Illoqarfimmut illoqarfeeqqamulluunniit pigaangassi, taava paasiniaasassaasi kina ilissinnik najugaqartitsinissamut naleqquttuunersoq.” Kingorna ima peqqusivoq: “Taamaattumik aallarlusi inuiaqatigiit tamaasa uannut ajoqersuganngortissigik.” (Matthæusi 10:7, 11; 28:19) Kristumiut ilumoortut kikkuunersut paasineqariaannaavoq ilisarnaataasussamik tamatuminnga ullumikkut suliaqarmata.

3. Jiisusi politikkimut akuliukkumaneq ajorpoq. Taamaattumik ajoqersukkani pillugit ima oqarpoq: “[Silarsuup] inuisa uumissorpaat ilaginnginnamikkik, soorlu uangattaaq silarsuup inuisa ilaginngikkaannga.” (Johannesi 17:14, 1936) Ilumoortumik pallorfiginnittut politikkimut tunngasunut kalluunnaveersaartuunertik ilisarnaatigisariaqarpaat.

4. Jiisusip inuit allat imminut pilliutigeriaannaalluni asavai. Ima oqarpoq: “Asaqatigiikkussi tamatumuuna tamarmik paasissavaat ajoqersugarigissi.” (Johannesi 13:35) Kristumiut ilumoortut imminnut isumassoqatigiipput, sorsunnermullu peqataaneq ajorput.

Illit pallorfiginninneq ilumoortoq qanoq iluaqutigisinnaaviuk?

▪ Illit Jehova ilumoortumik pallorfiginiarlugu ilisarisimalluaqqaartariaqarpat. Guutimik ilisimanninneq iluaqutigalugu pitsaanerpaamik inooriaaseqarnissamut periarfissaqalissaatit Guutimillu asanningaalissaatit. Jehovalu imminik asannittunut inuunermik naassaanngitsumik neriorsuivoq. Taamaattumik Jiisusi ima oqarpoq: ‘Inuuneq naassaanngitsoq tassaavoq ilinnik, ilumut kisimi Guutiusumik ilisimanninneq.’ — Johannesi 17:3. (wp10 02/01-E)

Paasissutissat amerlanerusut atuakkami matumani kapitali 15-imiipput, Biibilimi sorpiaat ajoqersuutigineqarpat? Jehovap Nalunaajaasuinit saqqummersinneqartoq.

[Qupp. 8-mi assiliartaq]

“Pruffiitioqqusersunut mianersoritsi; taakkua savatut atisaqarlutik ornittarpaasi, ilumikkulli amaruupput kiisortut.” — Matthæusi 7:15.