Sooq aserortarpat?

“Farisiiarinik Jiisusimut tikiuttoqarpoq, misilinniarlugulu aperipput: ‘Angut suugaluartumilluunniit patsiseqarluni nuliaminit avissinnaatitaava?’” — Matthæusi 19:3.

JIISUSIP nalaani inuusut ilaasa aappariinnerup ataavartuusinnaanera ataavartuusariaqarneraluunniit apeqqusersimavaat. Taakkununnga Jiisusi ima oqarpoq: “Atuarsimanngilisiuk pileqqaarneranniit Pinngortitsisup angut arnarlu pinngortikkai oqarlunilu: ‘Tamanna pillugu angutip ataatani anaananilu qimassavai nulianilu attavigalugu, taakkulu marluk uininngussapput ataaseq’? Taamaattumik marluujunnaarlutik uiniulissapput ataaseq. Guutimmi ataqatigiilersitai inuup avissaartissanngilai.”a (Matthæusi 19:4-6) Erseqqippoq Guutip siunertarigaa aappariinneq ataavartuussasoq.

Ullumikkut nunarpassuarni aappariit tamarmik 40 procentiisa missaat ‘avissaartarput’ avinnermik kinguneqartumik. Aappariinneq pillugu siunnersuutit Biibilimeersut qangarnisaavallaarpat? Imaassinnaava aappariinnerliortoqartartoq aappariinnermik aaqqissuussineq immini ajoquteqarmat?

Assersuut una eqqarsaatigiuk: Aappariit marluk assigiinnik biilisipput. Aappariit aappaasa biilertik aserfallatsaaliorpaat mianersortumillu biilertarlutik. Biiliat aserunngilaq. Aappariit aappaasa biilimik aserfallatsaaliornissaannut piffissartik nukitilluunniit atorneq ajorpaat, biileraangamillu mianersorneq ajorput. Biiliat aserorpoq, qimaannarpaallu. Aserornerannut sunaana pissutaasoq — biilit imaluunniit piginnittui? Soorunami piginnittui akisussaanerpaajupput.

Taamatuttaaq aappariippassuit aappariinnerat aserortutullusooq ittaraluartut imaanngilaq aappariinnermik aaqqissuussineq immini ajoquteqartoq. Aappariit millionillit aappariilluarnerat tamatumunnga uppernarsaataavoq. Aappariit taakkua inunnik ataasiakkaanik, ilaqutariinnik innuttaaqatigiinnillu nuannaarnerulersitsisarput nukittunerulersitsisarlutillu. Aappariinnerli aserussanngippat, biilitulli, paarineqarluartariaqarpoq aserfallatsaaliorneqartariaqarlunilu.

Ukiorpassuarni ullualuinnarniluunniit aappariissimagaluarussi qanoq ililluni aappariittuartoqarsinnaanersoq aappariinnermillu nakussatsitsisoqarsinnaanersoq pillugu siunnersuutit Biibilimeersut ilumut atorsinnaapput. Quppernerni tulliuttuni tamatumunnga assersuutit takukkit.

[Quppernerup ataani ilanngussaq]