2 Guutip soqutiginngilaatigut — Ilumoorpa?
Immaqa ima tusagaqarsimavutit: “Guutip ilumut isumagigunitigut silarsuarmi ajussuseq naalliuutillu piissagaluarpai. Inuit ataatsimut isigalugit soqutigigaluarunigilluunniit uanga inuttut soqutiginngilaanga.”
Biibilimi ajoqersuutigineqartoq: Jehovap Guutip ajussuseq pisuussutiginngilaa. (Jaaku 1:13) Ajussuseq ingerlaannaq peersinnaasimagaluarpaa, inuiaqatigiilli ajortissimasut piugallarsinnaanerat akueraa. Taamaaliorpoq inuiaat oqaluttuarisaanerata aallaqqaataani ileqqussanut tunngasut apeqqutaalersut aalajangiiffiginiarlugit. Akuliutingajalerpoq inuit ikiorniarlugit aqutsinerminillu itigartitsisut ajoqusiinerpassuinik aaqqiiniarluni. — 1 Mosesi 3:1-6; Esaja 65:17.a
Guutip inuit ataatsimut isigalugit isumassuinnanngilai, inuttulli ataasiakkaatut soqutigingaarpaatigut. Matthæusi 10:29-31 naapertorlugu uagut pilluta annikitsualuit uagulluunniit ilisimanngisavut nalunngilai. Ima allassimavoq: “Qupaloraarsuit marluk skillingimik akilersillugit tunineqartannginnerpat? Taakkua ilaat ataaserluunniit nunamut nakkarnavianngilaq Ataatarsi najortiginagu. Ilissimi nutsasiluunniit tamarmik kisissimapput. Taamaattumik erseqinasi, ilissi qupaloraarsuppassuarnit pingaarneruvusi.”
Ilumoortup ilisimanera qanoq iluaqutigissagit: Inuk allanik soqutiginninngilluinnartoq amerlanertigut qanillinaveersaartarparput. Tupaallannanngilaq Guutip uagutsinnik soqutiginninnginnerarneqarnerata salluliuutaanera pissutaalluni inuppassuit taanna tunuttaraat allamulluunniit saaffissaarukkaangamik aatsaat saaffigisaraat. Jehovap Guutip ilumut isumassoraatigut ilumoortuusoq paasigaangatsigu taanna ilisarisimanerorusulertarparput ikinngutigerusulerlugulu.
Assersuutigalugu immaqa Guutimut qinuvutit eqqarsaatigalugulu tusarnaarnersoq akissaneraatillu. Biibili naapertorlugu taanna ‘qinnutinik tusartartuuvoq’ ilumoorussillutik imminut saaffiginnittunut tamanut attaveqaatit qaqugukkulluunniit ammatillugit. — Tussiaat 65:3.
Guutip kajumissaarpaatigut ‘isumakuluutigut tamaasa taassumunnga pisissagivut isumassormatigut’. (1 Petrusi 5:7) Allaat ajuuvikkaangatta isumassoraatigut upperisinnaavarput, oqaasianimi ima allassimavoq: “[Jehovap] qanippai sequmissimasumik uummatillit, annaattarpai aserortersimasumik anersaallit.” — Tussiaat 34:19.
[Quppernerup ataani ilanngussaq]
a Sooq Guutip naalliunnartoqarnera akuerineraa paasinerorusukkukku atuaruk kapitali 11, atuakkami Biibilimi sorpiaat ajoqersuutigineqarpat?-mi.
[Issuagaq 5-mi assiliartaq]
Guutip soqutiginngikkunisigut taava sooq imminut qinoqquaatigut?