5 Guutip ilumoorussilluni pallorfiginninnerit tamaasa akuerai — Ilumoorpa?

Immaqa ima tusagaqarsimavutit: “Sumiiffimmut ataatsimut aqquterpassuupput, taamatulli Guutimut aqquterpassuupput. Inuit ataasiakkaat Guutimut aqqutissatik nassaariinnassavaat.”

Biibilimi ajoqersuutigineqartoq: Guuti kiffartorfigissagutsigu ilumoorussisariaqarpugut, ilumoortuusaarnata. Jiisusip taamanikkut upperisarsiornikkut siuttut oqarfigai sooq taakku Guutimit ajattugaanersut: “Ilissi ilumoortuusaartusi pillusi Esaja eqqortumik siulittuivoq, soorlumi allassimasoq: ‘Inuiaat ukua qarluinnarminnik ataqqivaannga, uummataalli uannit ungaseqaat.’” (Markusi 7:6) Guutilli pallorfiginninnerput akuerissappagu ilumoorussineq kisimi qulakkeerutaanngilaq.

Jiisusip tamanna erseqqissarpaa upperisarsiornikkut siuttut taakkuninngalu tapersersuisut Guutimik pallorfiginneriaasianni amigaataanerpaajusoq qulaaramiuk. Guutip oqaasii uku taakkununnga tunngatippai: “Asuliinnaq guutisiorfigaannga inuit inassutiliaat ajoqersuussutigisaramikkit.” (Markusi 7:7) Aap, guutisiornerat ‘asuliinnaavoq’ namminermi ileqqutoqqatik inassutiliatillu pingaartinneruaat Guutip piumasaqaataanit.

Guutimut iluarisaasumik qaninnerulissutaasinnaasut amerlasuujusut Biibilimi ajoqersuutigineqarnatik, aqqut ataasiinnaasoq ajoqersuutigineqarpoq. Matthæusi 7:13, 14-imi ima allassimavoq: “Isaaffikkut nerukitsukkut iseritsi; nerutoqaarmi tammarfimmut isaaffik tassungalu aqqutaa sileqaluni; amerlaqaallu tassuuna isaasut. Nerukeqaarli inuussummut isaaffik tassungalu aqqutaa ameqaluni; ikittuinnaappullu taassuminnga nanisisut!”

Ilumoortup ilisimanera qanoq iluaqutigissagit: Takorlooruk qaammatini arlalinni maratonimi arpaqataanissannut sungiusareerlutit apuuteqqaartuusutit, maleruagassialli nalusavit unioqqutinnera pissutigalugu apuuteqqaarnerit atorsinnaannginnerarneqarpat qanoq misigisimassasutit. Misigissagunarputit asuliinnaq nukippassuit atorsimallugit. Guutimut attaveqarnitsinnut tunngatillugu tamatumunnga assingusumik pisoqarsinnaava?

Apustilip Paulusip Guutimut kiffartornerput timersornikkut unamminermut assersuullugu ima allappoq: “Timersortartup ajugaasumut niaqorusiussassaq pisinnaanngilaa maleruagassat maleruanngikkunigit.” (2 Timotheusi 2:5) “Maleruagassat” malillugit, tassa Guutip akuerisaa naapertorlugu, Guuti pallorfigigutsigu taassumannga iluarisaassaagut. Guutimut aqqutissarput nammineq aalajangersinnaanngilarput, soorlu arpattartup arpaffissani nammineq aalajangeruniuk naatsorsuutigisinnaanngikkaa ajugaasutut suaarutigineqarnissani.

Guutimit iluarisaassagutta pallorfiginninnerput taanna pillugu salluliuutinik ilaqassanngilaq. Jiisusi ima oqarpoq: ‘Ilumoortumik pallorfiginnittut Ataatamik pallorfiginnissapput anersaakkut ilumoornikkullu.’ (Johannesi 4:23) Guutimut aqqut Biibilimi nanisinnaavarput. — Johannesi 17:17.a

[Quppernerup ataani ilanngussaq]

[Issuagaq 8-mi assiliartaq]

Upperisarsiortut tamarmik Guutip akuerisaanik taassuminnga pallorfiginninneq ilinniartitsissutigaat?