Sooq Biibilimi najoqqutassiat malillugit inuussaagut?
ATOQATIGIINNERMUT tunngasut Biibilimi eqqartorneqartut itsarnisaavallaarpat pisariaqanngitsumillu killilersuippat? Naamerluinnaq. Atoqatigiinnermut atatillugu najoqqutassiat Biibilimiittut iluaqutigalugit makku pinngitsoorsinnaavavut:
▪ Nappaatipalaat
▪ Katissimanani naartunerit
▪ Avinnerup kingunipilui artornartut
▪ Ilerasunneq
▪ Allanit atornerlunneqarneq aamma nikanarsarneqarneq
Pinngortitsisitta, Jehovap Guutip,a kissaatigaa taassumannga tunissutisiatit nuannaarutigissagitit aamma iluaqutigissagitit. Taanna tassaavoq “iluaqutaasunik ilinnik ajoqersuisoq”. (Esaja 48:17) Ileqqussatigut najoqqutassianik Biibilimiittunik maleruaasut:
▪ Guutimit akuerineqalissapput
▪ Qamuuna eqqississapput
▪ Ilaqutariittut ataqatigiilluassapput
▪ Ajunngitsumik tusaamaneqalissapput
▪ Imminut ataqqilissapput
Taavami ileqqussatigut najoqqutassat Biibilimiittut maannakkorpiaq malinngikkukkit? Inuunerpit allanngortinnissaa ajornanngila? Guutip siornatigut iliuuserisimasannut akisussaatissavaatit?
Soqutiginarpoq ukiuni hundredelinni siullerni ilagiinnut kristumiunut ilaasut ilaat siornatigut kinguaassiuutitigut inuunerluttuusimasut, allasiortuusimasut aamma anguteqatiminnik arnaqatiminnillu atoqateqartarsimasut. Taakkua inuunertik allanngortissimavaat, tamannalu taakkununnga ilumut iluaqutaasimaqaaq. (1 Korinthimiut 6:9-11) Ullumikkut nunarsuaq tamakkerlugu inuit tusindilippassuit tamatumunnga assingusumik iliuuseqarsimapput. Inuunerlukkunnaarsimapput misigisimavaallu najoqqutassiat Biibilimiittut malillugit inuuneq qanoq ajunngitsortaqartigisoq. Tamatumunnga assersuutaavoq Sarah, allaaserisami siullermi eqqaaneqartoq.
“Ingerlaannaq oqiliallaqaanga”
Sarah-p paasivaa nammineq iluarisaminik inuunini pilerigisamitut kiffaanngissuseqalersitsinngitsoq aamma nalerisimaalersitsinngitsoq. Ima oqarpoq: “Misigisimavunga ilerasuttuaannavillunga. Kanngusuppunga aamma naartulernissara imaluunniit arlaannik ajortorujussuarmik nappaateqalernissara annilaangagaara. Aammali Guuti suli upperaara nalunngilaralu inooriaasera aliasuutigigaa. Misigisimavunga minguttuujullunga aamma suut tamaasa erloqissutigaakka.”
Kiisami Sarah inuunerminik allanngortitsinissaminut nukissaqalerpoq. Angajoqqaani Jehovamut Nalunaajaasuusut ikiortiserai, tamatumalu saniatigut illoqarfigisamini ilagiinni utoqqaanertat kristumiut ilaannut ikioqquvoq. Sarah ima oqarpoq: “Angajoqqaama utoqqaanertallu qanilaarnermik asanninnermillu uannut takutitsinerat nuannaajallaatigalugulu tupaallaatigaara,” imalu oqarluni, “Ingerlaannaq oqiliallaqaanga.”
Sarah maanna marlunnik qitornaqarpoq. Ima oqaluttuarpoq: “Taakku aalajangikkannik ammasumik oqaluttuuttarpakka. Qitornakka paasitikkusuppakka qanoq Guutip najoqqutassiaanik sumiginnaaneq uannut sunniuteqarsimasoq. Anguniagaraara ikiorlugit paasitissallugit Guutip atoqatigiinnermut najoqqutassiai maleruarlugit inuuneq qanoq timikkut, eqqarsartaatsikkut misigissutsitigullu uatsinnut iluaqutaatigisoq. Qularinngilara Guutip ileqqussatigut najoqqutassianik tunisimagaatigut kissaatigigamiuk ajunngitsumik atugaqassasugut.”
Aamma illit misigisinnaavat Guutip asannittumik ilitsersuineranik maleruaaneq qanoq iluaqutaatigisoq. Biibilimi imaattumik neriorsuuteqarpoq: “[Jehovap] maleruagassiai naapertuilluartuupput, uummammik nuannaartitsisarput. [Jehovap] peqqussutai piviusuupput, isinik qaamaneqalersitsisarput. . . . Maleruaraanni tamanna naammattumik akissarsissutaassaaq.” — Tussiaat 19:9, 12.b
[Quppernerup ataani ilanngussat]
a Biibili naapertorlugu Guutip aqqa tassaavoq Jehova.
b Siunnersuutit Biibilimiittut atoriaannaat pillugit paasisaqarnerorusukkuit illoqarfigisanni Jehovap Nalunaajaasuinik attaveqarfiginninnissannut tikilluaqqusaavutit. Aamma adressinut qupperneq 4-miittunut allassinnaavutit imaluunniit nittartagaq www.watchtower.org iserfigisinnaavat.
[Qupp. 8-mi issuagaq]
Najoqqutassianik Biibilimiittunik sumiginnaasut sumiginnaanertik pissutigalugu naalliuuteqarsinnaapput
[Qupp. 9-mi issuagaq]
Najoqqutassianik Biibilimiittunik maleruaasut ilerasuutissaqanngillat aamma ilaqutariittut qanittumik attaveqarput