Tuppallersarneqarlutillu allanik tuppallersaagit

Napparsimanerup naammagalugu atornissaanut iluaqutaangaartut ilaat tassa ilaquttatsinnit, ikinngutitsinnit uppeqatitsinnillu tuppallersarneqarneq.

Ikinngutip inussiarnersuullunilu asannittup oqaasii tarnummut nipaallisaammut uagutsinnut ilorraallaataasumut assersuunneqarsinnaavoq. (Uss 16:24; 18:24; 25:11) Kristumiulli ilumoortut namminneq tuppallersarneqarnissartik eqqarsaatigiinnanngilaat. Iliuuseqartarput ‘annikilliuuteqartut tamaasa tuppallersarumallugit Guutip imminnut tuppallersaatigisaanik’. (2 Kor 1:4; Luk 6:31) Antoniop Mexicomi nakkutilliisup angalasartup tamanna misigisimavaa.

Paasileramiuk aakkut kræfteqarluni lymfomimik taaneqartumik Antonio annilaangaqaaq. Nikallorpallaarumanani iliuuseqarpoq. Qanoq iliorami? Erinarsuutit Naalagaaffilersaarutit alanngaarniartarpai, taallaallu tusarumallugit eqqarsaatigeqqissaarumallugillu erinarsortarpoq. Aamma nipituumik qinusarnini Biibilimillu atuartarnini tuppallersaatigingaarpai.

Maannali Antoniop paasivaa iluaqutigisami pingaarnerpaartaasa ilaat tassaasoq uppeqatiminit ikiorneqartarnini. Ima oqaluttuarpoq: “Nuliaralu nikallungagaangatta ilaqutarput ilagiinni utoqqaanertaasoq pulaaqqusarparput qinoqatigiinniassagatta. Tamanna tuppallersaatigisarlugulu eqqissiallaatigisarparput. Aap, ilaquttatta anersaakkullu qatanngutitta ikiuinerat iluaqutigalugu misigissutsivut nikallornartut piffissap ingerlanerani qaangerpavut.” Antoniop taamatut asannittunik isumassuisunillu ikinnguteqarnini qujamasuutigeqaa!

Annikilliuuteqaraangatta anersaaq illernartoq neriorsuutigisaq aamma iluaqutigisinnaavarput. Apustili Petrusi oqarpoq Guutip anersaava illernartoq tunissutaasoq. (ApS 2:38) Tamanna erseqqippoq ukiumi 33-mi piinsip ulluani inuppassuit tanitanngormata. Anersaarli illernartoq tamatsinnut — tanitaannaanngitsunut — tunissutaavoq. Tunissut tamanna nunguttussaanngimmat qinnutigiuarusupparput, ilaa? — Es 40:28-31.

NAALLIUTTUT SOQUTIGINGAAKKIT

Apustili Paulusi misilinneqarnerpassuarmini allaat toqungajattaraluarluni pinertusaarpoq. (2 Kor 1:8-10) Taassuma toqunissani annilaangatigivallaanngilaa Guutimit annertoqqusersorneqarnini tuppallersaatigigamiuk. Ima allappoq: “Unnersiutigineqarli Guuti Naalakkatta Jiisusi-Kristusip Ataataa, Ataataq nallittuisoq Guutilu tuppallersaajuartoq, annikilliuuteqarnitsinni tamani uatsinnik tuppallersaasartoq.” (2 Kor 1:3, 4) Paulusi imminut ingasattumik nalligilinngilaq. Aap, misilinneqarnini naammagalugit atoramigit misiginneqataanerulersarpoq, taamaalillunilu allat annikilliuuteqarneranni tuppallersarniarlugit iliuuseqarnerusinnaasarpoq.

Antonio aaqqikkami nakkutilliisutut angalasartutut kiffartoqqilerpoq. Uppeqatiminik soqutiginnittuujuarpoq, napparsimasulli pulaarniarlugit tuppallersarniarlugillu maannakkut nulianilu iliuuseqarnerupput. Assersuutigalugu Antoniop kristumiu perululluni napparsimasoq pulaareerlugu paasivaa qatanngut angut taanna ataatsimiigiarusunngitsoq. Antonio ima oqaluttuarpoq: “Imaanngilaq Jehovamik qatanngutinillu asanninngitsoq, nappaatinili pissutigalugu misigissutsimigut ima sunnerneqarsimatigaaq atorfissaqanngitsutut misigaluni.”

Antoniop qatanngut napparsimasoq taanna nuannaarnerulersinniarlugu iliuuseqarpoq. Assersuutigalugu taanna katerisimaarnermi qinorusunnersoq aperaa. Qatanngut ajukkukkaluarluni qinuvoq. Antonio ima oqaluttuarpoq: “Qinnutaa nuannersupilussuuvoq, qinoreernermilu kingorna soorlu inuk alla. Atorfissaqartinneqarluni misigeqqilerpoq.”

Aap, tamatta annerusumik minnerusumilluunniit assigiinngitsunik naalliuuteqartarpugut. Paulusip allassimaneratut naalliuutit naammagalugit atorutsigit allat annikilliuuteqarneranni tuppallersaasarsinnaavugut. Taamaattumik kristumioqativut naalliuuteqaraangata soqutigalugillu Guuterput Jehova ilaartigu allanik tuppallersaasarnitsigut.