Kalaallit nunaanni Jehovap Nalunaajaasuinut tamanut
Asasavut qatanngutivut!
Decemberip qaammataani nalunaarusiasi maanna ataatsimut kisereersimalerpavut, nuannaarutigaarpullu inernerit angusimasasi nalunaarutigissagatsigik. Imaapput:
Oqal. Atuakk. Broch. Nal.ak. Pisart. Atuag. Pulaaqq. Atuaqq.
Dec. 119 95 36 2925 8 1911 1121 118
Agg. 11,6 8,1 5,0 0,7
Siorna Decemberimut naleqqiullugu atuaqqissaaqatigiinnerpassuit ingerlassimasasi ingammik nuannaarutissaapput, tamannalu 10 procentimik siuariarneruvoq.
Tamanit takuneqarsinnaavoq Kalaallit Nunaanni sallusuissummut soqutiginnittoqaqisoq, tamannalu tamatsinnut kajumissinartuullunilu qiimmannartuuvoq. Soqutiginninnerli siuariartorlunilu annertusiartussappat ajoqersuigaangassi tunngaveqartumik eqqarsalersitsiniartariaqarpusi, ajoqersukkassi Bibeli qaaginnaatigut pinnagu aalajaatsumilli namminnerlu qularunnaarlutik ilikkarniassammassuk.
Jesusip ajoqersuigaangami inuit tunngaveqartumik eqqarsalersinniartarpai taamaalillunilu ajoqersukkani misigilersittarlugit saqqummiussaminut namminneq attuumassuteqarlutik. Tamatuma kingunerisaanik ilinniakkatik malillugit iliuuseqartarput. Assersuutigalugu, malugeriaruk qanoq akisoq inatsisinik ilisimasup ima aperimmani: ’Ajoqersuisoq, qanoq iliussaanga inuuneq naassaanngitsoq kingornussariumallugu?’ (Lúk. 10:25) Jesus toqqaannartumik akisinnaasimagaluarpoq, malugisinnaavaali angut apeqqumminut tunngasumik aalajangersimasumik isumaqareersoq, taamaattumik aperaa: ’Inatsisini qanoq allassimava? Qanoq ittut [illit] atuarpigit?’ (Versi 26) Angut akimmat Jesusip eqqortumik akinerarpaa, oqaatsinilu ilallugit: ’Taamaalior[tuarit], taava inuussaatit.’ (Versi 28) Angut inatsisinik ilisimasuuvoq, taamaattumillu Jesusimit akineqarnissani pisariaqartinngikkaluarlugu. Angut nammineq akitinneratigut nalerisimaarnermik misigisaqartippaa. Angutilli allassimaffiit issuarsinnaagaluarlugit isumavii paasisimanngilai (versi 29 takuuk), taamaattumillu Jesusip pikkoreqaluni assersuut ikiortigalugu ajoqersorpaa. Oqaatsimik „tulleq“-mik nassuiaatiinnanngilaa, nassuiaatiinnaraluaruniummi angut ajuallassammat, angummulli naleqqulluartumik assersuusiorpoq, tamannalu iluaqutigalugu angutip Allakkat oqaasii tunngaveqartumik eqqarsaatigisinnaavai. Inatsisinik ilisimasup eqqarsaatigisimanngisaannakkaminik oqaaseq „tulleq“ assersuutikkut nassuiaatissarsivaa. Naggataatigut Jesusip angut apeqquteqarfigaa qulakkeerumallugu pingaarnersaa paasisimaneraa, paasisimavaalumi. — Lúk. 10:30-37.
Uaguttaaq taamatorpiaq oqaluussillutalu inuit qularunnaarsinniartassavavut. Bibelili aallaavigalugu tunngaveqartumik eqqarsalersitsiniaaneq ilinniagassaavoq imaannaanngitsoq. Ilikkarneqarsinnaavorli. Naak immaqa ilinniarnerani immikkut ilungersorsinnaasaraluarluta, taamaattoq ilungersulussinnarnavianngilagut. Taamaalillunimi oqaluussisarnerput pissanganarnerulerlunilu pissarsiaqarnarnerulissaaq, soqutiginartumik Bibelimik atuaqqissaaqateqarnissaq ajornannginnerulissalluni, malunnassaarlu immikkut ilungersornerput qanoq ililluni Jehovap pilluaqqugaa. Tamanna ilikkassagaanni oqaluussinermi ’Ræsonnerebogi’ atorluarneqarsinnaavoq, tamatumalu saniatigut nammineq atuaqqissaarnermi atuarneqarsinnaalluni. Ingammik immikkoortut „Hvis nogen siger . . .“ oqaloqatigisannik qularunnaarsitsisumik eqqarsartaaseqalersillutillu tunngaveqartumik eqqarsalersitsiniaallaqqinnerulersissavaatit. — Takuuk apustilit suliáinik agdlagkat 17:2-4.
Bibeli aallaavigalugu tunngaveqartumik eqqarsartinneqarusuttut taamaattumillu inuunerup ernganik imeriartoqqusissummut akuersisut iluaqutissaannut kiffartornissinnik Jehovap pilluaqqusinissaanik qinnutiitigalusi, asanningaartumik inuulluaqquatsigit. — sarĸ. 22:17.
Qatanngutisi
Vagttårnets Bibel- og Traktatselskab
Oqaluussinermut tunngasumik ataatsimiinnermi tulliuttumi saqqummiunneqassaaq.