Nakimaallutit oqaqataaniarit „Aggerna!“
1 Silarsuarmi tamarmi pissutsit allanngoriartupallannerata takutippaa maanna ’ulluni kingullerni’ inuusugut. (2 Tim. 3:1-5) Pinerluttuliorneq alliartortoq, aningaasatigut allanngujassuseq nappaatillu toqussutaasinnaasut pissutigalugit ulluinnarni tatineqarneq alliartorpoq. Eqqanaarnartut tamakku eqqarsaatigalugit inuit naassaanngitsumik siunissaminnut pingaarutilimmik qaaqquneqarnerat iluaqaaq. Anersaaq nuliassarlu oqartuarput: „Aggerna!“ ’Amerlangaartullu’ taakkununnga ilanngussimapput inuit tamaginniittut aggeqquniarlugit imeq inuunartoq akeqanngitsumik pisinnaaqqullugu. — sar. 7:9; 22:17.
2 Naapertuilluarnermik maqaasisut amerlangaarlutik maannakkut qaaqqusissut tamanna ilassivaat. Siorna nunarsuarmi tamarmi aasakkut ataatsimeersuarnernut inuit millionilikkuutaat najuussimapput, eqqaaniaanermilu inuit 10 millioningajaat najuussimallutik. Millionillit allat Naalagaaffimmik tusagassamut tusarnaarnermikkut Jehovap aaqqissuussaanik pingaartitsinerminnik ersersitsipput. Taamaattumik piffissaq silatuumik atorlugu kikkut tamarmik tusagassaannik aamma illumiit illumut qaaqqusissutip tamatuma tusarliuttarnissaa pingaartorujussuuvoq. — ap. sul. 5:42; Evf. 5:15, 16.
NAKIMAALLUTIT PEQATAANIARIT
3 Kristumiut siulliit ilungersortumik oqaluussisarnertik pissutigalugu malersorneqartarput. (ap. sul. 16:19-21; 17:2-8) Nakimaallutilli tusagassaq nuannersoq oqaluussissutigiuaannarpaat. Uaguttaaq taamatut nakimaatsuusariaqarpugut sapinngisatsinnillu tusagassap nuannersup oqaluussissutiginissaa aalajangiusimasariaqarlugu.
4 Allaat nunani sulinitsinnik inerteqquteqarfiusuni qatanngutit uummatikkut iluunngarlutik oqaluussinermut peqataasarput naak malersorneqaraluaqalutik, assersuutigalugu suliffitsik, angerlarsimaffitsik imaluunniit allaat kiffaanngissusertik annaasinnaallugit. Taakkua maligassaalluarnerata kajumissisippaatigut inunnik allanik ’aggeqqusiuarnissatsinnut!’ — 2 Tás. 3:9.
5 Ukiut 35-nit amerlanerusut siornatigut sallusuissut ilikkaramiulli qatanngutip arnap pionerinngornissani kissaatigiuarsimavaa. Aatsaat 70-inik ukioqarluni inuttut atugai allanngorput, pionerinngorporlu. Ikittuinnaat taama utoqqaatigilernerminni inuunermi suliassamik nutaamik aallartitsisarpaat, taannalu taamaaliorpoq. Maanna ukiuni arlaqalersuni piffissaq annertooq atorlugu kiffartuussineq nuannaarutigisimavaa, oqarlunilu: „Ullut tamaasa iluarsiartuinnarpoq.“ Qatanngut arnaq Jyllandimeersoq 73-inik ukiulik kuisinnerminit ukioq ataaseq suli qaangiutinngitsoq pionerinngorpoq. Oqarpoq: „Ajunnginnerusumik iliorsimanngisaannarpunga.“ Maannakkut qatanngutit 38-t allat 70-inik ukioqalereersimasut ilagalugit pionerisut kiffartuussivoq. Qatanngutit taakku aalajaatsut katillugit ukiuni 781-ni piffissaq annertooq atorlugu kiffartuussisimapput, sulilu allat anersaakkut nakussatsittarpaat nakimaallutik Naalagaaffimmik oqaluussinermi annertunerusumik peqataanissaminnik Jehovap qaaqqusinera ilassisimagamikku.
6 Soorlu ukiuni hundrelinni siullerni issimasoq ullumikkuttaaq ilaasa qaaqqussineq tamanna ilassivaat, isumakkut nutaanngortillutik ileqqullu Guutimut ataqqinaataajaasut soraarullugit. Silarsuarmi tamarmi oqaluussisartunik qatanngutigiinnut ilungersortunut ilanngupput, anersaarlu nuliassarlu ilagalugit inuit allat eqqortuliorusuttut oqarfigalugit: „Aggerna!“
7 Naalagaaffimmut atatillugu suliap annertussiartuinnarnera nunanilu amerlasuuni immikkoortortaqarfiit allilerneqarneri Jehovap pilluaqqussineranut ersiutaapput. Pissutsit aaqqissuussaanerat pisoqaq maanna atuuttoq piffissaarutilerpoq. Maannakkut nakimaalluta ilungersorlutalu oqarnissatsinnut: „Aggerna!“ piffissaavoq, allat qaaqqusineq ilassisinnaaniassammassuk ilikkakkatillu naapertorlugit iliuuseqarsinnaaniassammata. — ap. sul. 20:26, 27; Rûm. 12:11.