Tamakkiisumik uummateqarlutit oqaluussisarit
Immikkoortoq 1: Jehovamut qujamasunnerup nalinga
1 Oqaluussinermi tamakkiisumik uummateqarneq pilluta iliuuserisimasai tamaasa pillugit Jehovamut qujamasunnermik aallaaveqarpoq. (2 Sam. 22:2, 3) Inuit Guutimik nalusut naakkinnassusiat eqqarsaatigalugu oqaluussinermi tamaviaarluinnartariaqarpugut. (Mat. 9:36; 2 Kor. 5:14, 15) Jehovamut tunniusimanerugutta inoqativullu soqutiginerugutsigik, oqaluussinermi qiimalluta peqataanissatsinnut kajuminnerussaagut. (Mat. 22:37-39) Kiffartuussinerput tassaalissaaq erlinnartuut pingaangaagarput. (2 Kor. 4:7) Qanorli ililluta oqaluussinermik qujamasunneq taama ittoq ineriartortissinnaavarput?
QUJAMASUNNEQ QANOQ INERIARTORTINNEQARTOQ
2 Nammineq ilagiinnilu Guutip oqaasianik atuaqqissaartarnerup taavalu qinunikkut atuariikkatsinnik eqqarsaatiginneqqissaarnerup, ikiussavaatigut Jehovamut qaninnerusumik attaveqalernissatsinnik. Taamaaliorutta pissusii kinaassusialu kajungernartut ilisarinerulissavavut. Sapaatip akunneranut Bibelimi atuagassannik imminut pisassittarpit? Peqatigiiffiup atuagassiaataanik atuaqqissaarnissannut piffissalertarpit? Ilagiinni ataatsimiittarnernut piareersartarpit? Tamaasa najuuffigalugillu peqataaffigisarpigit? (Epr. 10:24, 25) Nammineerluta atuaqqissaarnitsinni tamatumalu kingorna atuariikkavut eqqarsaatigeqqissaartarutsigik Jehova Guuterput asannittoq taassumalu pallorfiginninnermik ilumoortumik aaqqissuussaa pingaartinnerulissavavut. — Tuss. 27:4.
3 Qujamasunnerput allissinnaavarputtaaq tamakkiisumik uummateqarlutik Guutimut kiffaasut allat maligassiaat peqqissaartumik qimerloortarutsigu. Pruffiiti Jeremiasip suliarisassani ilungersuutigisimaqaa. (Jer. 20:9) Jesusip ilungersornermik qujamasunnermillu maligassiuussimavaatigut. (Juá. 4:34) Apustili Paulusip kiffartornermini naalliuuterpassuit naammagittarluni atornerisigut Guutip naakkinninneranik qujamasuutiginninnini ersersissimavaa. (1 Tim. 1:12, 13, 17) Maligassat tamakku, ullumikkullu maligassiat, eqqarsaatigisarutsigik qujamasunneq oqaluussinermi tamakkiisumik uummateqalissutigisinnaasarput ineriartortissinnaavarput.
4 Jehovap ataqqinassusiata alutornangaassusianik ilinniaraangatsigu tupinnartuliaalu eqqarsaatigigaangatsigik, taassuma angingaassusia oqaluussissutigerusulersarparput taannalu unnersiutigalugu nunannaarluta torlularusulersarluta. (Tuss. 145:5-7) Naalagaaffimmik tusagassaq siaruarterniarlugu periarfissarsioraangatta takutittarparput Guutip aqqanik oqaluussissutiginnissinnaanerput pingaartikkipput. — Lúk. 6:45.
5 Allanikkulli tamakkiisumik uummateqarluta oqaluusseqataanissatsinnut kajumississutigisinnaasaqarpugut? Suusinnaappat? Aap, utoqqaanertat, ilagiinni kiffartortut, pioneerit oqaluussisartullu misilittagaqartut allat qanoq ilillutik ikiuisinnaappat? Anguniagaqarneq qiimanitsinnut qanoq sunniuteqassava? Pilluaqqussutissat suut ilimagisinnaavavut? Ilanngutassiani tulleriinni tallimanik immikkoortortalinni, Naalagaaffimmik Kiffartuuteqarneq-up normuani tulliuttuni saqqummiunneqartussani, apeqqutit tamakku allallu akineqassapput. (kmD 7/91 Vær helhjertet i forkyndelsen — 1. del)