Ilagiit atuakkamik atuaqqissaaqatigiittarnerannik aaqqissuussaq
Imm. 2: Piareersartariaqarpugut oqaloqatigiissuteqarnermilu peqataasariaqarluta
1 Jehovap oqaasiani nalunaarutigineqarpoq ilisimassummik nassaartoq siuneqassutsimillu pissarsiaqartoq pilluartoq, akissarsiaq angeqimmat. (Uss. 3:13, 14, 16-18) Anersaakkut ilisimassut naleqangaarpoq annassutaallunilu. Tamanna ikiortigalugu kristumiup Guutip oqaasianit ilikkakkani pitsaasumik atorsinnaavai — oqaluussigaangami, ulluinnarni ajornartorsiutiminik aaqqiiniaraangami inuunerminilu anguniakkani eqqarsaatigalugit aalajangigassaqaraangami.
2 Ilagiit atuakkamik atuaqqissaaqatigiittarnerat aaqqissorneqarpoq Guutip oqaasianik atuaqqissaartarnissatsinnik atuinissatsinnillu ikiorniarluta, taamaalillutalu ilisimassuteqarneruleqqulluta anersaakkullu paasisaqarneruleqqulluta. Taamaattumik ilisimassuteqaleqqulluta ilagiit atuakkamik atuaqqissaaqatigiittarnerinut tamatigut najuuttarnissarput tassaasariaqarpoq pilersaarutitta ilaa aalajangersimasoq. — Uss. 4:7-9.
PIAREERSARLUARTARIAQARPUGUT
3 Ukiuni hundredelinni siullerni kristumiut ilagiissaanniittut ilaasa sallusuissut ilikkarniarlugu qaammarissiartortorlu malinnaaffiginiarlugu tamaviaarsimanngillat. Kristusimi ’merlertuujuarput’ taamaattumillu oqaatsit iluartut nalullugit. (Epr. 5:11-13) Apustili Paulusip ilagiit ’inersimassummut ingerlaniarnissaannik’ kajumissaarpai. (Epr. 6:1) Soorunami allat sallusuissut pillugu oqaloqatigiinnerat tusarnaaginnarlugu taamaaliortoqarsinnaanngilaq. ’Ersarissumik, ilumoortumik isumaqarniaraanni’ eqqarsaatiginneqqissaartarneq atuaqqissaartarnerlu pisariaqarput, tamaviaartariaqarlunilu. — 2 Pîtr. 3:1, 2; Lúk. 13:24.
4 Ilagiit atuakkamik atuaqqissaaqatigiittarnerannut peqqissaartumik piareersaraangatta paasisaqarnerusarpugut ilikkakkavullu pingaartinnerusarlutigik. Piareersarnerli sunniuteqarluassappat immikkoortut atuaannarnissaat akissutissallu ataatigut titaannaarnissaat naammanngilaq. Pisassatta uagutsinnullu pingaaruteqarnerata eqqarsaatigeqqissaarnissaanut piffissaqartariaqarpugut. Allassimaffiit innersuussutigineqartut quppertakkit immikkoortumilu allassimasunut attuumassuteqarnerat eqqarsaatigisaruk. Oqaatsit paasilluanngisatit isumaat paasiniartaruk.
5 Ilatta nammineerluni atuaqqissaartarneq erloqinartippaat, piffissarlu atortariaqarpoq; kisianni iluaqutaaqaaq! Paulusip tamaviaarluni atuaqqissaarnerup kingunissaa uparuarpaa oqarami: ’Inersimasulli nerisassamik mattusuumik pisariaqarput, tassa misigisaqartarnermit sungiusagaasunik sianissutillit ajunngitsorlu ajortorlu immikkoorsusiisigut ilisarisinnaallugit.’ (Epr. 5:14) Tamatuma inersimasunngornissatsinnut ikiussavaatigut, eqqortumik aalajangiisinnaalersilluta.
OQALOQATIGIISSUTEQARNERMI PEQATAASARIT
6 Ataatsimiinnernit tamani sammisanut peqataaniartariaqarpugut. Sooq? Piareersarluarsimalluta akinerput uppernitsinnut ersiutaammat, aammattaarli akissutitta qatanngutivut kajumissisittarlugillu ineriartortittarmagit. (Rûm. 10:10; Epr. 10:23-25) Ilagiit atuakkamik atuaqqissaaqatigiittarneranni peqataalluartarnerput aamma anersaakkut ineriartornissatsinnut pingaaruteqaqaaq. Misilittagaqarnerusut, meeqqat soqutiginnittunngorlaallu akigajuttarpata, akissutit assigiinngitsorpassuit atuaqqissaaqataasunut tamanut ilinniutaallutillu kajumississutaassapput. — km 3/86, qup. 3.
7 Ilagiit atuakkamik atuaqqissaaqatigiittarnerannut piareersarluartarutta, tamatigut najuuttarutta akisaruttalu, ilisimassummik nassaassaagut ’Guutilu ilisarilissallutigu’. — Uss. 2:4, 5. (kmD 8/91 Menighedsbogstudieordningen — 2. del)