Pioneritut kiffartorneq — asanninnermut ersiut
1 Jehovamik inoqatitsinnillu asanninnitta oqaluussinermut peqataanitta annertusisinnissaanut kajumissisittarpaatigut. Jehovamik tullermillu asanninnitta alliartornera qanoq ililluta oqaluusseqataanerulernissatsinnut pilersaarusiornissatsinnut kaammattuutigissavarput. Jehovamik asanninnitsinnik annerulersitsisartoq tassaavoq Guutip oqaasianik ’eqqorluartumik ilisimasaqarneq’. (Fil. 1:9, 10 NV) Guutip piumasaa ilikkarnerujartortillugu piffissap inuuffigisatta pingaaruteqassusia paasiartuinnartarparput. Inunnik allanik isumassuinerulersarpugut, ilarpassuattalu pionerinngornermikkut asannittumik isumassuinertik ersersittarpaat.
2 Illit allannguutissat ikiorti-pionerinngornissamut imaluunniit nalinginnaasumik pionerinngornissamut pisariaqartut naammassisinnaavigit? Soorunami tamakkerluta pioneriusinnaanngilagut, tamattali immikkut periarfissavut qinunikkut misissoqqissaartariaqarpavut.
3 Kristumiut ikittuinnaat pioneriunissaminnut piffissaqarluarput; taamaattumik maannakkorpiaq piffissaajaatigisatsinnit pisariaqanngitsunit ’piffissamik pisinnaaffiusumik pisisariaqarpugut’. (Evf. 5:15-17, NV) Guutimik tullitsinnillu asanninnitta kajumissisittariaqarpaatigut nammineq inuttut kissaatigisatsinnik ilorrisimaarnissaraluatsinnillu pilliuteqarnissatsinnut, taamaalilluta asanninnerput suliatsigut ersersinnerujartuinnarsinnaaqqullugu. (Mák. 12:33) Pisiarisartakkatta ilarpassui, immaqa nalinginnaasutut pisariaqartutullu isigisavut, nunarsuup ilarujussuani pigissaarutitut isigineqarput.
4 Angajoqqaat qanoq ilillutik meeqqatik ikiorsinnaavaat anersaamut tunngasunik pingaartitsilersinniarlugit? Mikineranniilli teokratiimut tunngasunik assigiinngitsunik anguniagassittassavaat. Inussuttuaqqat atuarnertik naammassilerunikku silamiorpaluttumik imaluunniit anersaamut tunngasunik anguniagaqassappat? Inuusuttuarartavut ikiorlugit paasiterusuppavut inuusuttunnguullunili pioneritut kiffartulerneq pilluaqqussutissarpassuarnik nassataqartartoq. Taamaalilluni nalilinnik qilammi katersuisoqartartoq. (Mat. 6:19-21) Taamaaliorunik Guutimit iluarisaassapput ersersissallugulu asagitsik ilumoorfigigitsillu. Aammalu inuit allat inuunerannik annaassinissaminnut periarfissaqassapput.
5 Guutip piumasaraa ’inuit tamarmik annassasut’. (1 Tim. 2:4) Aamma illit tamanna piumasarigit annertunerujartuinnartumik ersersissinnaaviuk? Taamaaliorsinnaavutit Naalagaaffiup soqutigisaanik salliutitsinissannut piumassuseqarnikkut. Aammalu tamanna ersersissinnaavat Jehovap inuuninni pisariaqartunik isumassuinissaanik tunaartarinninnikkut. (Mat. 6:31-33) Aningaasaqarniarneq immaqa ajorsiartuinnassaaq, Jehovalli isumassussalluta neriorsuutaa aalajaattuassaaq. — Tuss. 37:25.
6 Oqaluussinermi sapinngisaq tamaat iliuuseqarneq asanninnermut ersiutaavoq. Taamaalillutik ilavut pioneriusinnaasarput. Illimmi, septemberip aallaqqaataani 1992-imi aallartinniarlutit sapinngisat tamaat iliuuseqarsinnaanngilatit? (km 6/92 Pionertjenesten — et udtr. for kærlighed)