Guutip ilumut soqutigaatigut?
1 „Sakkussaq asseqanngitsoq. Pisariaqartitavipput!“ Oqaluussisartoq taama oqarsimavoq atuagassiaaraq Guutip ilumut soqutigaatigut? aasaq manna ataatsimeersuarnermi „Qaammaqqusersuisut“-mi saqqummermat. Ukiuni arlalinni oqaluussisartut misilittagallit, pionerit nakkutilliisullu angalasartut atuagassiaaqqamik taama ittumik kissaateqartarsimapput. Maannalu saqqummerpoq. — Tussiaat 145:16.
2 Atuagassiaaraq tamaat atuaruk. 32-nik qupperneqarpoq, unnuillu tamaasa immikkoortoq ataaseq imaluunniit immikkoortut marluk atuartarukkit sapaatip akunnerata ataatsip ingerlanerani atuareersimassavat. Atuagassiaaraq oktoberimi suliniuteqarnitsinni atorneqassammat pingaartorujussuuvoq tamatta nalunngilluarnissaa.
3 Oqaluussinermi qanoq atorneqarsinnaanersoq eqqarsaatigiuk. Atuagassiaaraq atuartillugu pissutiginiakkat immikkoortullu pitsaasut illumiit illumut oqaluussitillutit, pulaaqqiitillutit imaluunniit sukkulluunniit nalunaajaatillutit innersuussinnaasatit allattorsinnaavatit.
4 Siunnersuutit pitsaasut Naalagaaffimmik Kiffartuuteqarneq-mi eqqartorneqartartut atornissaannik sungiusarit. Oqaluussinermut tunngasumik ataatsimiinnerni siunnersuutit piviusorpalaartut tulliuttut takutitsissutigineqartassapput, katersuunnernilu atuaqqissaaqatigiinnermik aqutsisut sungiusartitsisassapput tamatta saqqummiusseriaatsit nalunngilluarniassagatta. Ilaqutariillu tamarmik, mikisut angisuullu, atuaqqissaarnerminni siunnersuutit sungiusarsinnaavaat.
5 Atuagassiaaraq kikkunnulluunniit agguaanneqarnissaa eqqarsaatigineqanngilaq. Apeqqutit sammineqartut akissutissaannik soqutiginnittunut tunniuguk eqqaamallugulu ingammik inuit ajunngitsumik isumallit ujarlersullu atuaqqissaaqatigineqarnissaat siunertarinerullugu saqqummersinneqarmat. Siunnersuut tulliuttut siulliat najoqqutassaavoq assigiinngitsutigut atorneqarsinnaasoq. Tassa siunnersuut tamatigut atoriannaasoq.
6 Pulaarfigisaq saaffigereerlugu ima oqarsinnaavutit:
◼ „Ulluni makkunani apeqqut eqqarsaatissarsinartoq oqaloqatigiissutigaarput. Qularnanngitsumik illittaaq apeqqutit atuagassiaaqqap matuma saqqaani eqqaaneqartut apeqqutigisimavatit. [Apeqqutit pingasut taakkit.] Ilumoorpunga? [Pulaarfigisaq oqaaseqartiguk. Atuagassiaaraq qupperuk.] Kapitalimi siullermi eqqartorneqarput suut pissutigalugit inuit taama aperisartut. [Oqaatsit oqaaseqatigiillu ilaat takutikkit immikkoortorlu 4 atuaruk.] Tamarmilli taama isumaqarpat? Malugeriaruk immikkoortuni tulliuttuni qanoq allassimasoqartoq. [Kapitali 2-mi immikkoortoq 1, 2-lu atuakkit.] Uangattaaq allamik isumaqarpunga. Isumaqarpit neriulluarpallaartunga? [Pulaarfigisaq oqaaseqartiguk.] Neriulluarpunga Guutimut Biibilimullu tunngaveqarluartumik upperisaqarama. Guuteqarnera upperiuminaatsippiuk? [Pulaarfigisaq isumaminik oqaaseqartiguk.] Atuagassiaaqqami pissutigisat pitsaalluartut allassimapput. Piffissaqalaaruit takutilaarusukkaluarpakka. [Kapitalimi tulliuttumi qulequtat takutikkit.]“
7 Nunat ilaanni illoqarfinni annerusuni matuni telefoneqartarpoq. Oqaluussiffinni taamaattuni naatsumik ima aallarniisinnaavugut: „. . .-mik ateqarpunga inuillu maani najugallit atuagassiaaqqamik neqeroorfigaakka apeqqummut matumunnga akissuteqartumik: ’Sooq Guutip ajuussuseq atuutitippaa?’ Isersinnaavunga takutillugulu?“
8 Oqaluussisartunngorlaat, meeqqat inuusuttullu saqqummiusseriaaseq una naatsoq atorsinnaavaat:
◼ „. . .-mik ateqarpunga. . . . Ikinngutigalu inuit pulaarpavut inuit tamangajammik arlaatigut apeqqutigisartagaat oqaloqatigiissutiginiarlugu. Una: ’Guuteqarpat, sooq naalliuutit atuutitippai?’ [Atuagassiaaqqap saqqaa takutiguk.] Illittaaq tamanna eqqarsaatigisimaviuk? [Pulaarfigisaq oqaaseqartiguk.] Soorlu imarisaani takuneqarsinnaasoq apeqqummut tamatumunnga tunngasut tamarmik akineqarput.“ [Kapitali 3, 5 6-ilu takutikkit.] Taava atuagassiaaraq neqerooruk ulluaaluillu qaangiuppata pulaaqqiinnissat isumaqatigissutigiuk.
9 Atuagassiaaqqamik Guutip ilumut soqutigaatigut?-mik siunertaqarluarluta ilungersorlutalu suliniuteqarutta inuit ajunngitsumik isumallit amerlasuut uummataat qaammasarsinnaavavut — taamaalillutalu qaammaqqusersuisutut suliarput naammassissallugu. — Mat. 5:14-16; 28:19, 20. (km 92/9 Er Gud interesseret i os?)