Atuagassianik pingaartitsinermik ersersitsigit
1 „Atuakkiat saqqummerartut ingasalluinnarput.“ (Nal. oq. 12:12) Atuakkat ilarpassui pappialanit naqiterneqarfimminnit naleqarneruneq ajorput. Atuagassialli Napasuliaq Alapernaarsuiffiup peqatigiiffianit naqiterneqartartut taamaanngillat. Tamakku naleqaqaat anersaakkut inuussutissanik inuunermik annaassissutissaasunik imaqaramik. Soqutiginnittut Jehovamik ilinniarnissaannik ikiortarpaat Jehovallu kiffai taassumunnga tunniulluinnareersimasut uppernikkut nakussatsittarlugit.
2 Allat atuagassiaatitsinnik atuartalernissaannik periarfissikkusuppavut nalunnginnatsigu iluaqutigissagaat. Naak akeqanngitsumik agguaanneqartaraluartut taamaattoq suliarinerat siammarternerallu aningaasartuutaasarput. Taamaattumik asuliinnaq tun- niussuukkumanngilavut. Pulaagarput soqutiginninnersoq ersarissumik malugisinnaanngikkutsigu Napasuliaq Alapernaarsuiffik-p Iteritsi!-llu normuanik ataasiinnaarmik immaqaluunniit naqitaaqqamik tuniinnarumasarparput. Atuagassianilli pisut tamaasa orneqqittariaqarpavut, tullianilu soqutiginninnermik ersersitsippata atuagassiamik allamik neqeroorfigisinnaavavut, soorlu atuakkamik ’Paratiisilersaarummik’ imaluunniit ’Skabelsesbogimik’.
3 Atuagassianik agguaanerup pisariillisarneqarneratigut tamanut ersarissilluarpoq oqaluussilluta suliarput niuernermut attuumassuteqanngitsuusoq. Malunnaqisumillu nalunaajaataavoq Jehovap kikkut tamaasa anersaakkut paratiisimik nuannaarutiginnilernissaannik neqeroorfigigai. (Jes. 55:1) Suliatta qanoq ililluni aningaasalersorneqarnera oqaluussinitsinni uagut siulliulluta eqqartulernissaa pisariaqanngilaq, aperisoqaraangallu tunissuteqarnissaq kajumissaarutigisariaqanngilarput, tunissuteqarnissaat naatsorsuutigisariaqarnagu imaluunniit tunissuteqartariaqarnerannik misigitittariaqarnagit. Naatsumik nassuiaatiinnarsinnaavavut sulinerput kajumissutsimik tunissutitigut aningaasalersorneqartoq. Pulaagarput amerlanerusunik apeqquteqarpat immaqa nunarsuaq tamakkerlugu ilinniartitsinitsinnut atasorpassuit ilaat eqqaasinnaavavut: Atuarfiit assigiinngitsut (pionerit atuarfii, kiffartortut atuarfii aamma atuarfiit Gileadit), ajoqersuiartortitanik, specialpionerinik angalallutillu nakkutilliisunik aallartitsisarneq, angerlarsimaffinnik Betelinik naqiterivinnillu ingerlatsineq, atuakkanik atuagassianillu naqiterineq, ataatsimeersuartitsisarnerit ilaallu ilanngullugit.
4 Soorlu eqqaaneqareersoq nunarsuaq tamakkerlugu oqaluussinermik suliatsinnut aningaasatigut tapiiffigeqqulluta inuit nalinginnaat qinnuteqarfineq ajorpavut. Sulinitsinnulli ilumoorlutik soqutiginnittut namminneerlutillu tunissuteqarusuttut taamaaliornissaminnut soorunami tikilluaqqusaapput. Jehovalli kiffai tunniulluinnarsimasut aningaasatigut pisariaqartumik tapersersuisuunerpaapput, Guutillu innuttai tunisiumatussiatigut tassuunakkut nersualaassallugit pissutissaqarpoq. Qatanngut angut ima oqarsimavoq: ’Atuagassianik agguaassisarnermik pisariillisaanermik aaqqissuussaq nutaaq tatiginninnermik ersersitsinertut nuannerluinnartutut isigaara.’ Ilumoorpormi! Jehovap peqatigiissortaasalu tatigivaatigut anersaap illernartup kajumissaarineri kajumissutsitsinnik maleruassagivut taamaalilluni Naalagaaffiup sulinerata siuarsarnissaanut pisariaqartunik atortussaqartuaannaqqullugu. — 2 Mos. 35:4, 5, 22, 23; 1 Isr. 29:11, 14; 2 Kor. 9:8, 9. (kmD 93-5 Vis værdsættelse af publ.)