Apeqquteqarfik

◼ Atuagassianik tunisinissatsinnut suna aalajangiisuussava?

Inuup soqutiginninnera tamanik pingaarnerpaajussaaq. Ilumoorluni soqutiginninnermik ersersitsippat atuagassianik marlunnik, atuagassiaaqqamik, atuakkamik Biibililersaarutinilluunniit allanik neqeroorutitsinnik tunisinnaavarput. Taamatuttaaq aamma silarsuaq tamakkerlugu suliniarnermut tapersersuinissamut immannguaannaq aningaasaateqarpasippat aningaasaateqarpassinngippalluunniit. (Job 34:19; Saqq 22:17) Illuatungaatigulli atuagassianik pingaartitsinngitsunut atuagassiaatitsinnik naleqangaartunik tunisinavianngilagut. — Matt 7:6.

Pulaagaq soqutiginninnerminik qanoq ersersitsisinnaava? Uagutsinnik oqaloqateqarusunnera ersiutaalluarpoq. Oqalunnitsinni tusarnaarluaqqissaarpat, apeqqutit akisarpagit isummaminillu anitsisarpat takussutissaavoq oqaloqatigiinnermut peqataasoq. Biibilimik atuarnitsinni malinnaappat, takussutissaavoq Guutip oqaasianik ataqqinnittuusoq. Iluaqutaasinnaavoq aperalugu atuagassiat tunniunneqartut atuartarnerai. Ataasiakkaat qanoq soqutiginnitsiginersut oqaluussisartut aalajangiinissamut naliliilluarsinnaasariaqarput. Assersuutigalugu aqqusinermi oqaluussigaangatta tulluartuussanngilaq atuagassiaativut, atuagassiaaraativut atuagaativulluunniit nalaatsornikkut sanioqquttunut tamanut tunniutiinnartassallugit. Inuk soqutiginninnersoq takusinnaanngikkutsigu qaaqqusissummik imaluunniit naqitaaqqamik tuniinnaraanni pitsaanerussaaq.

Taamatuttaaq, oqaluussisartup atuagassiat oqaluussinermi pisariaqartitani agguaassisarfimmiit tigusinnaavai, apeqqutaatinnagu qanoq annertutigisumik nakkaatitsivimmut tunisisinnaanerluni. Tunisineq atuagassianut akiliutaanngilaq, silarsuarli tamakkerlugu oqaluussinernut tamanut tapersersuinerulluni. Qanorluunniit aningaasatigut atugaqaraluarutta, Naalagaaffiup soqutigisai tapersersorniarlugit, pingaartitsinitta pigisavut naapertorlugit tuniserusunnermik killissavaatigut, sinnerussatsinniinngitsoq. (Mark 12:41-44; 2 Kor 9:7) Atuagassiat pisariaqartitaannavut tigusarutsigit aningaasat teokratiimut tunngasunut atugassat atulussinnassanngilagut.

[Qupp. 2-mi issuagaq]

Ataasiakkaat qanoq soqutiginnitsiginersut oqaluussisartut aalajangiinissamut naliliilluarsinnaasariaqarput