Oqaluussisartunut nutaanut misilittagartuunullu piumasaqaatit
1 Tussiaasiortoq David ima aperisimavoq: ʹJehova, kina tupinni najugassarsissava? Kina qaqqanni illernartumi ineqassava?ʹ Oqaatsit tulluarluartut atorlugit David ima akivoq: ʹAssuarnaalluni saqisoq iluartumik iliorluni ilumoortumillu oqalulluni uummammigut.ʹ (tugs. 15:1, 2) Piumasaqaatit taakku allanngorsimanngillat. Ullumikkut ilagiinnut kristumiunut ilannguttut tamarmik iliuutsit kanngunartut killeqanngitsumillu imernersuaq ingalassimasariaqarpaat. Aamma saqitsaakkumatuunut, kamajasoorsuarnut marluinnillu oqalinnut Jehovap innuttaasa akornanni inissaqanngilaq. Sallusuissummi nutaajugaluarutta misilittagartuujugaluaruttaluunniit tamatta aalajaalluta Biibilip najoqqutassiai qutsissut aalajangiusimalluarniartariaqarpavut. — Gal. 5:19-21.
2 Nutaarpassuit Jehovap peqatigiissortaanut ilanngussorput. Inuusuttut utoqqaallu eqqarsariartaasertik allanngortissimavaat inooriaasertik Guutip najoqqutassiaanut naapertuuttunngorsarniarlugu. Nukappiaraq Amerika kujallermiu angajoqqaaminit unnersuunneqassanani alliartorsimavoq annertuunillu ajornartorsiuteqaleriartuaarsimalluni. 18-inik ukioqalerami ikiaroornartunik atornerluisuuvoq parnaarussaareersimallunilu ikiaroornartunut kimittuunut akissaqarumalluni tillinniarsimanini pissutigalugu. Biibilimik atuaqqissaartalerami kammalaatigisimasaraluani attaveqarfigiunnaarpai, Jehovap nalunaajaasuinik ikinngutitaarluni, kingornalu inuunini Guutimut tunniulluinnarlugu.
3 Uaguttaaq aalajangiusimasariaqarparput inooriaatsitsigut tamatigut Guutimut iluarinartuutinnissarput, ’iluartillugu illernartillugulu iluarnikkut’. (Evf. 4:24) Guutip peqatigiissortaani qaqqatut ittuniittuniiginnarumalluta inuttut pissuserput allanngortittariaqarparput. — Kul. 3:9, 10)
4 Guutip oqaasii sakkortuumik sunniuttarput: Jehovap kinaassusiata Biibilimi saqqummersinneqartup eqqarsariartaaserput iliuutsivullu ajunngitsup tungaanut sunnersinnaavai. (Rûm. 12:2) Taassuma oqaasii isumatsinnik nutaanngortitsinissamut uummatitsinnillu misissuinissamut pissaaneqarput. (Epr. 4:12) Allakkani isumassarsiarititaasuni ajoqersorneqarpugut Jehovap piumasarigaa ileqqussatigut iluartumik inuussasugut, sapinngisatsinnik annertuumik tamanut oqaluussinermut peqataassasugut kristumiullu ataatsimiinneri peqataaffigisassagivut.
5 Ulluni makkunani ajornartorsiornartuni kristumiut Guutip inatsisaanik unioqqutitsisitsisinnaasunit tatineqartarput. Nammineq atuaqqissaartarneq, ilaqutariittut atuaqqissaartarneq, ilagiinnut ataatsimiigiartarneq oqaluussisarnerluunniit sumiginnaruniuk kristumiup allaat sallusuissummi nukittuujusimagaluartup uppernini annaasinnaavaa immaqalu eqqunngitsuliorsinnaalluni. Taamaattuminguna Paulus Timoteusimut ima allassimasoq: (Allassimaffiit takukkit.) — 1 Tim. 4:16; 2 Tim. 2:7.
6 Kiffartornermi nutaajugaluarutta misilittagartuujugaluaruttaluunniit Guutip puimasaqaatai eqqaamajuartariaqarpavut, kiffartornitsinni aalajaatsuusariaqarluni, inuuinnarsinnaajumallutalu neriuutitsinni nukittuujujuartariaqarluta. (1 Pet.1:13-16) Guutip piumasaqaataanik ullut tamaasa eqqortitsinissarput pingaaruteqartorujussuuvoq.
7 Ukiup oqaluussiffiusup matuma qaammataani kingullermi oqaluussinermut peqataanissat anguniagariniaruk. Aalajangiusimajuk allat uppernikkut alliartornissaannik oqaluussinermullu pikkorinnerulernissaannik ikiornissaat. (Rûm. 1:12) Nammineq atuaqqissaartarnikkut ilaqutariittullu atuaqqissaartarnissigut aammalu ataatsimiinnernut najuuttarnikkut isummat eqqarsaatinik ineriartornartunik immertaruk. (Fil. 4:8) Guutip piumasaqaataasa eqqortinnerisigut Guutimut iluarinartinniarlutit ilungersuutitit asuliinnarnavianngillat. — Kul. 3:23, 24.