’Jehovap ajunngingaarutai nalunaarutigikkit’
1 Kristumiut siulliit oqaluussinissamik Guutip suliassiissutaanik ilumoorussisimapput. (Mat. 28:19, 20; 1 Pîtr. 2:9) Taamatuttaaq ullumikkut Jehovap innuttaasa akisussaaffitsik paasillugu Kunngi taassumalu naalagaaffia Matîuse 24:14-ip eqquunneratut nunarsuaq tamakkerlugu oqaluussissutigisimavaat. Aamma Danmarkimi eqiasuitsumik aalajaatsumillu kiffartorneqarsimavoq. Oqaluussisartut qaammammut agguaqatigiissillugit 15.786-iusut ukiumi oqaluussiffiusumi qaammatini tamani peqataasimasut nalunaaquttap akunneri 2.533.270-init ikinnerunngitsut Jehovap pissusiinik nuanningaartunik oqaluussissutiginninnermut atorsimavaat. Kalaallit Nunaanni oqaluussisartut qaammammut agguaqatigiissillugit 127-it peqataasimapput nalunaaquttap akunneri 41.230-it atorsimallugit.
2 Aalajaalluni oqaluussineq tamanna akerlilersorneqarnermik naapitaqartarpoq. Sallusuissut ’assortorneqartarpoq’ salluliuutillu ingasannerpaat tusagassiuutitigut saqqummiunneqartarlutik. (ap. sul. 17:6, 7; 28:22) Paulusili ima oqarmat isumaqatigaarput: ’Kisianni siornagut Filippimi anniartitaallutalu asissugaagatta, soorlumi ilisimasusi, taamaattoq Guutitsigut ersisuerluta Guutip iivangkiiliua ilissinnut assoruungaarluta oqaluutigiartorparput.’ (1 Tás. 2:2) Taamaattumik aalajangersimasumik toqqaannartumillu illumiit illumut oqaluussineq ingerlattuarparput, eqqortumik isumallit naniniarlugit nalunaajaassuteqarumallutalu.
3 Inuit illumiit illumut „pisarnertut“ oqaluussinermi itigartitsigasuarnerusarmata tamatta immikkut isumaliutigisariaqarparput oqaluussineq pisarnitsinnit allaanerusoq atornerusariaqannginnerlugu. Inoqatitsinnik isumassuilluinnarneq Jehovamullu qujamasunneq tamatumunnga kajumississutigissavarput. (Mák. 6:31-34; 1 Tim. 1:12) Periarfissat suulluunniit atorlugit nutaarsiassamik nuannersumik inoqatitta oqaluttuunnissaat piareersimaffigisarutsigu nuannaarutissarsingaassaagut pilluaqqusaangaassallutalu. Periarfissat ilaat sammeriartigik.
4 Eqqarsaatiginikuuiuk naleqquttumik periaaseqarlutit suleqatinnut nalunaajaasinnaannginnerlutit? Qatanngut arnaq suliffimmi ataatsimi sivisuumik sulisimasoq nutaamik sulisortaartoqarnerit tamaasa oqartarsimavoq: „Aluu, tikilluarit. Dinamik ateqarpunga Jehovamullu nalunaajaasuuvunga.“ Oqaluttuarpoq taamaalilluni oqaluussinissaminut apeqqutinillu akisinissaminut periarfissarpassuaqartarsimalluni. Aamma illit suliffinni nalunaajaasutut suliniartutut ilisimaneqarpit? Nalunaajaateqarnissallu eqqumaffigisarpiuk?
5 Aammattaaq amerlasuut assut toqqaannartumik ilungersuuteqarsimapput ilaquttatik Jehovap pissusiinik nuanningaartunik pingaartitsilernissaannik ikiorniarlugit. Allaat qatanngutip angutip qanigisaminut tamanut oqaluussinissani siunertaralugu sulinngiffeqarnissani aaqqissuussimavaa! Illit ukiut kingulliit ingerlaneranni, immaqa naqitikkat nutaanerusut ilaat atorlugit, qanigisatit ikiorniarlugit iliuuseqarniarsimavit?
6 Oqarasuaatikkut oqaluussinneq sumi tamaani oqaluussinissamut periarfissat ilagaat. Illit, kivisit imaluunniit ilagiit atuakkamik atuaqqissaarneranni gruppeqativit ilaannik ilaqarlutit, Naalagaaffimmik kiffartuuteqarnermut ilanngussaq 1993-imi aggustimoortoq-imi siunnersuutit pitsaasut atorsimavigit?
7 Inuit ’naalagiartinneqartutut’ misigitinngikkaluarlugit kajumissinartunik oqaluusseriaaserpassuaqarpoq. (Juán. 4:7-26) Misigigutta nakimanngissutsimik amigaateqarluta Jehovamut ikioqqusinnaavugut, tatigalugu nukissatsinnik tunissagaatigut. Tamannarpiaq kristumiut siulliit misigisimavaat: ’Qinoreermatalu katisimaffiat aalavoq, tamarmillu anersaamik illernartumik ilumoqangaalerput, Guutillu oqaasia siooranatik oqaluutigaat.’ — ap. sul. 4:31.
(km 93:12 ’Forkynd vidt og bredt . . . ’)