Pulaaqqiininni soqutiginninnerulersitsiniaagit
1 Oqaluussinermi suliarput tulluartumik assersuunneqarsimavoq narsaammik paaqqutarinninnermut; pulaaqqiinerlu naggorissaanermut imerterinermullu assersuunneqarsimavoq. (Mat. 13:23; Lúk. 10:2; 2 Kor. 9:10) ’Guutip suleqataasut’ pisussaaffigaarput iluminni sallusuissummik ’ikkussiffigineqarsimasut’ tamaasa ikiornissaat, taamaalillutik inerikkiartuaalerniassammata inerititaqartalerlutillu. (1 Kor. 3:6, 9) Pitsaanerpaamik qanoq ililluta taamaaliorsinnaavugut?
2 Soqutiginninnermik ersersitsilaaginnarsimasut tamaasa pulaaqqipallattakkit. Illumiit illumut allattuiffitit misissortakkit paasiniarlugu kikkut pulaaqqissanerlugit sunalu oqaloqatigiissutigissanerlugu. Amerlanertigut kingullermik eqqartorsimasat uterfigeqqittarpat. Eqaatsumilli periaaseqarit, siumullu eqqarsaatigereertaruk eqqarsaatit Biibilimut tunngasut suut eqqartorneqaleriataarsinnaanersut. Biibilip atornissaa tamatigut pitsaasuuvoq. Paasilluaruk Biibili uummatinik killiinissamut pissaaneqarmat. — Epr. 4:12.
3 Pulaakkavit atuagassiaaraq „Guutip ilumut soqutigaatigut?“ pereersimappagu ima oqarsinnaavutit:
◼ „Inuppassuit ilumuuillutik upperaat Guutip nunarsuaq aserorumaaraa, inuilli ilaat isumaqarlutik inuit namminneq aserorumaaraat. Illit qanoq isumaqarpit? [Pulaakkat akili.] Biibilimi oqaatigineqarpoq Guutip nunarsuaq aserornavianngikkaa, minguiarumaaraali naapertuilluanngissuseq piiarlugu eqqissineqarfinngortillugu toqqissisimanartunngortillugulu.“ Qupperneq 22 innersuussutigiuk taavalu Ussatit 2:21, 22 tassani issuarneqarsimasoq atuarlugu. Pulaakkat soqutiginnippasippat nassuiaassinnaavat qanoq ililluni Biibilimik atuaqqissaartoqartartoq, imaluunniit atuagassiat nutaat neqeroorutigisinnaavatit. Silarsuassaq nutaaq Guutip neriorsuutaa oqaloqatigiissutigeqqinniassagassiuk pulaaqinnissannik isumaqatigiissuteqarfigiuk.
4 Atuagassiaaqqamik „Ata! Suut tamaasa nutaanngortippakka“-mik pisimappat ima oqarsinnaavutit:
◼ „Kingullermik maaniikkama Biibilimi atuarparput Guuti neriorsuisimasoq nunarsuaq atuagassiaaqqami uani ilinnut tunniussanni ersersinneqartutut paratiisinngortikkumaarlugu. Pilluaqqussutissat tamakku peqataaffigisinnaavavut Guutip piumasaa ilinniarluarnerugutsigu inuunitsinnilu maleruarutsigu.“ Juánase 17:3 atuaruk, quppernermilu 27-mi immikkoortunut 52-imut 53-imullu ingerlaqqillutit. Naatsumik nassuiaruk Guutip oqaasii pillugit eqqorluartumik ilisimasaqalernissaq sooq taama pingaartigisoq.
5 Atuagassiaaqqamik „Hvad er meningen med livet?“-mik pisimappat ima oqarsinnaavutit:
◼ „Qularnanngitsumik ’Ataatarpooq’ nalunngilat . . . Ilaanik eqqaamasaqarpit? . . . Ilaatigut ima ilaqarpoq: ’Naalagaaffiit tikiulli.’ Qanoq isumaqartoq nalunngiliuk?“ Pulaakkavit qisuariarnera apeqqutaatillugu quppernermi 26-mi immikkoortut 8 aamma 9 innersuussutigisinnaavatit taavalu Daniel 2:44 atuarlugu. Immaqa oqaloqatigiinneq nangissinnaavat Guutip naalagaaffiata tikiunnissaa ajussutsip naalliuutillu atuukkunnaarnissaannik kinguneqarumaartoq nassuiarlugu. Erseqqissaruk Guutip isaani naapertuilluartuugutta nunarsuarmi maani paratiisimi naassaanngitsumik inuulersinnaasugut.
6 Eqqaamajuk inunnut tusarnaarusuttunut tamanut pulaaqqittoqarsinnaammat, atuagassianik pisimagaluarpata pisimanngikkaluarpaluunniit naamik. Sapaatip-akunneri tamaasa piffissamik aalajangersimasumik pulaaqqiinissannut atugassannik immikkoortitsisarit. Soqutiginnittut soqutiginninnerulersinniarlugit ilungersuutitit Jehovap pilluaqqussavai. Qanortoq taassuma ataqqinnaatissaanut inerititaqarilit. — Juá. 15:8. (kmD Opdyrk interessen på genbesøg)