Guutip illuanik pingaartitsigit
1 Qanga Jehovap innuttani peqqusimavai akuttunngitsumik illumini katisimasarnissaannik. (3 Mos. 23:2) Qujanartumik taamatut katisimasarnertik iluaqutigalugit Guutip oqaasia sammilluarsinnaavaat isumaliuutigeqqissaarsinnaallugu, Jehovap inatsisaanik oqaluuserinnittarlutik aammalu nuannaarutigisinnaallugu katisimaqatigiinnertik. Isumaat Guutip oqaasiinik immerneqartarput, aammalu anersaakkut pilluaqqusaanertik pisuunnguallaatigisarlugu. Katisimasarneri nuannisarfiusarput. Katisimaqatigiittarnerit ataasiussuseqalersitsisarsimapput aammalu minguitsumik pallorfiginninnerullutik. Ullumikkut Guutip illuani katisimasarnerit pingaannginnerulersimanngillat.
2 Qanoq ataatsimiinnernut pingaartitsilersinnaavugut? Ilagiit ilaanni ataatsimiittarnernik nalunaarusiani erserpoq najuuttartukittartoq. Ataatsimiittunut najuutinngitsoornissatsinnut pissutsinik assigiinngitsunik akornutissarsisoorsinnaasarpugut, kisianni ajornartorsiutit annikitsualuit pissutigalugit ataatsimiittunut peqataanngitsoortarpit? Ilaasa immaqa niaqorlulaarunik imaluunnit ulloq ulapaarfioreersimangaagat aaliangertarput angerlarsimaannarniarlutik. Ilaallu ilaquttatik uppinngitsut takkuttussaanertik nalunaarutigimmassuk isumagisariaqarlugit misigisarlutik. Ilaallumi allaat TV-mi isiginnaartagannaartik imaluunnit timersorneq aallakaatinneqartussaammat ataatsimiigianngitsoortarput. Pissutsini tamakkunani pingaartitsissuseq qamuuna kissaateqarnermut Korap ernerisa oqaatigisaannut malunnartumik assingunngilaq: „Tarniga tumanngusimagaluarpoq kiperiffigalugit Naalakkap silarliutai,“ - Tus.84:3.
3 Anersaakkut nerisassanik naammattorsuarnik ataatsimiittuni sassaallerfigineqartarpuvut, kisianni taamaakkaluartoq ilaasa malinnaanissartik ajornakusoortittarpaat. Ilaat immaqa issiallutik takorluuerusaartarput, ullormut isumakuluutigisatik eqqarsaatigalugit, allaallumi ilaat immaqa aanngaasarlutik. Misilittakkat takutippaat naatsunnguanik allattuineq ikiuutaalluarsinnaasoq eqqumaniarnissamut aammalu oqaaserineqartunut malinnaaniarnissamut. Paasissutissat aamma allattuisarnitsigut ajunnginnerusumik isumatsinnut ikkulluarnerussapput. Taamattaaq aamma piareersarluartarneq ataatsimiinnerni pissarsiaqaatigilluarsinnaavarput. Piareersarluarsimagutta takutissavarput tusakkavut ʹpingaarnerusumik aaliangiukkusukkivutʹ. — Epr.2:1
4 Meeqqat inersimasullu tamarmik ataatsimiittuni unnersuussutigineqartut ilikkarsimasatik pigiliunniartariaqarpaat. Meeqqat ilikkagaqarsinnaanerat killilerujussuussaaq angajoqqaat meeqqatik pinngussanik titartaaffinnilluunniit sammisassaqartinniaannarunikkit eqqissisimaniassammata. Meeqqat perorsarsimarpaluttuussanngillat unitsiinnarlugit pinnguartikkaanni, oqalutsiinnarlugit, nilliallutilluunnit eqqaminniittut akornusersorlugit. Meeqqat pisariaqanngitsumik akulikitsumillu perusuersartarfinnukarniartanngillat nalunngikkaagamikku tamatigut angajoqqaamik arlaannit ilagineqartussaallutik.
5 Pigaaruteqarpoq takkutiaarnissaq: Ilaannikkut pissutsit ingalanneqarsinnaanngitsut pissutigalugit allatut ajornartumik ataatsimiittunut piffissaq eqqorlugu takkutinngitsoortoqarsinnaasarpoq, kisiaanni inortuisarneq aallarniillunilu erinarsuummut qinunermullu peqataanngitsoorneq ileqquliutiinnarsimagaanni ataatsimiinnerup illernassusianik ataqqinninnginnermut ersiutaavoq. Aamma ersissaaq allanik akornusersuinnginnissamik akisussaaffik paasisimanngikkipput. Eqqaamajuk erinarsoqatigiinneq qinoqatigiinnerlu pallorfiginninnitsinnut ilaammata. Inortuikulaarnermut pissutaagajuttarpoq iluamik piffissamik pilersaarusiorluarsimannginneq imaluunnit siumut isigisinnaalluarsimannginneq. Piffissamik eqquilluarniarnitta takutippaa ataatsimiittarnerit ataqqigivut pingaartillugillu.
6 Ullussaq qanilliartortillugu suli katisimasarnissavut pisariaqartinnerulissavavut. (Epr. 10:24,25) Tamatta Guutip illuanik pingaartitsinerput ersersitsigu ataatsimiinnernut piareersartarnitsigut, aggikulasarnitsigut, takkutiaartarnitsigut, tusarnaarluaqqissaartarnitsigut ilikkakkattalu maleruartarnerisigut. (kmD 94/12 Vis værdsættelse.. . .)