Nammineq atuaqqissaartarneq eqqumaffigiuk
1 Inuunitsinni eqqumaffigisassarpassuaqarpugut. Eqqumaffiginerpaasariaqagarpulli tassa Jehovamut attaveqarnitta ineriartortillugulu atatiinnarniarnissaa. Tamatumani nammineq atuaqqissaartarneq pingaartorujussuuvoq. Ikinnerpaartavut kisimik atuaqqissaarnissamut atuaqqissaarsimasanillu eqqarsaatiginneqqissaarnissamut annertuumik piffissaqarput. Guutilli oqaasiani aalajangersimasumik atuarneq ajorutta ima sanngiillitigisinnaavugut silarsuup anersaava timikkullu pilerissutsit akiornissaannut nukissaarutissalluta.
2 Guutip oqaasia kajungeriuk: Guutip siunertai paasileratsigik qularnanngitsumik suli paasisaqarnerorusuttorujussuusimavugut. Immaqali piffissap ingerlanerani anersaakkut inuussutissanut kajungernerput milliartuaarsimavoq. Taamaappat ineriartortinniaqqittariaqarparput. (1 Pîtr. 2:2) Kajungerneq sakkortooq tamanna qanoq ililluta ineriartortissinnaavarput?
3 Nerisassap mamarilluakkatta tikka naagaangatsigu mamassusia eqqarsaatigiinnarlugu nuapput iisarparput. Sivikitsunnguakkuutaarlugu atuaqqissaartarneq anersaakkut eqqarsaatigalugu aamma taama misigineqarsinnaavoq. Immaqa anersaakkut ’mamartunik tamussillattaarnerup’ sallusuissutsinut itinerusunut kajumissuseqalersissinnaavaatigut. Ilikkagaqarnikkut nalerisimaarnerup Jehovap oqaasiisa itisilernerunissaannut kajumissisissinnaavaatigut.
4 Periaaseq iluarinerusat nassaariuk: Ilaasa unnuk tamaat atuaqqissaarnissaminnut immikkoortittarpaat, ilaalli akulikinnerusumik sivikinnerusumilli atuaqqissaarusunnerusarput. Ullaannguakkut eqqarsarluarsinnaanerusaruit immaqa ullaakkorsiunnginninni atuaqqissaartarumassaatit. Unnukkut eqqarsarluarsinnaanerusaruit innannginninni immaqa atuaqqissaarumassaatit. Qaqugukkulluunniit atuaqqissaartaraluaruit pingaaruteqarpoq aalajangersimasumik pilersaarusiornissat piffissamilu illit iluarinerpaasanni atuaqqissaartarnissat.
5 Nammineq atuaqqissaartarnissamut taamatut kajumissaarneqaraangatta immaqa oqapallattarpugut naammattorsuarnik sammisassaqareerluta. Tamattali ilumuuilluta nalilerniartariaqarparput piffissarput sumut atortarnerlugu. Nalunaaquttap-akunnerpassuini tv videolu isiginnaartarpavut? Inuttut soqutigisanik tunullinngortitsinissamut piumassuseqarpugut? Piffissap sumut atortarneranik piviusorsiortumik misissuinitta qularnanngitsumik paasinarsitissavaa ulluinnarni piffissaqartaraluartugut pitsaanerusumut, soorlu nammineq atuaqqissaarnermut, atorsinnaasatsinnik. — Evf. 5:15, 16.
6 Guutip oqaasianik atuaqqissaartarneq tamakkiisumik eqqumaffigisariaqarparput. Allanik sammisaqaatigaluta atuaqqissaartarutta pissarsiaqarpallaarnavianngilagut. Neriitigaluta, radio tusarnaajutigalugu imaluunniit tv qiviallattaajutigalugu atuaqqissaartarutta ilinniarniagarput tamakkiisumik pissarsiaqarfiginavianngilarput. (1 Tim. 4:15) Tassa pisariaqarpoq allamut saasaarisut pinngitsoornissaat. — Takuuk Håndbog for den teokratiske skole, qupperneq 33, 34.
7 Pingaartorujussuuvoq ullut tamaasa Biibilimik atuaqqissaartassalluni siunnersuutaanillu maleruaassalluni, tamannami aqqutigalugu Jehovap unnersuuttarmatigut. Sallusuissutip pappiaqqamiit uummatinnut nuutsinnissaa anguniagariniaruk. Periarfissat qanorluunniit mikitigigaluartut tamaasa anersaamut tunngasunik atuarnermut, uteqqiinermut eqqarsaatiginneqqissaarnermulluunniit atorniartakkit. — 5 Mos. 6:6-8; Kul. 1:9, 10. (kmD 95/1 Vær opmærksom på det personlige studium)