’Naammassisaqangaartuinnarneq’
1 Jehovap innuttai inuupput ulapittut. Pisussaaffeqarpugut ilaquttatsinnut, suliffitsinnut atuarfimmullu atatillugu. Pingaarnerpaatullu ’Naalakkap suliaanik naammassisassaqartuaannarpoq’. (1 Kor. 15:58) Sapaatit-akunnerini ilagiit ataatsimiittarnerinut piareersartarpugut najuuttarlutalu. Sapaatit-akunnerini tamani oqaluussinermut peqataasarnissatsinnik kajumissaarneqartarpugut. Aamma nammineq ilaqutariittullu Biibilimik atuaqqissaarnissamut piffissamik naammattumik immikkoortitsisariaqarpoq. Utoqqaanertat ilagiinnilu kiffartortut ilagiinni suliassarpassuaqarput. Aammalu ilaannikkut qinnuigineqartarpugut immikkut pisariaqartitsisumik ikiuinissatsinnik.
2 Immaqa ilaannikkut angumerisassarpassuavut merserilertarpavut. Allaalli inuit ulapinnerpaat pilluarsinnaasarput isumakkut aalajaassusertik piginiaannaraangamikku uungaannarlu isiginngikkaangamik. — Uss. 3:12, 13.
3 Apustili Paulus suliassarpassuaqartarsimavoq. Tupiliortutut sulilluni imminut pilersornermi saniatigut apustilinit allanit ilungersornerpaasimavoq. Qasusuilluni oqaluussiuartarsimavoq, tamanut ammasumik illumiillu illumut, savaatinullu paarsisutut pisussaaffini sumiginnanngisaannarsimavai. (ap. sul. 20:20, 21, 31, 34, 35) Naak ulapikkaluaqaluni Jehovamut kiffartornermi Paulus annerusumik suliassarsiortuaannarsimavoq. — Naleqqiuguk Rûmamiunut agdlagkat 1:13-15.
4 Jehovap nakussatsitsinissaata tatigineratigut Paulusip nuannaarnini isumakkullu aalajaannini attattuaannarsinnaasimavai. Kiffartornini pissarsiaqarfiusutut nalerisimaarnartutullu misigisimavaa. (Fil. 4:13) Nalunngilaalu suliani Guutip puiornavianngikkaa. (Epr. 6:10) Nuannaarneq allanik Jehovamik ilinniartitsinermigut pissarsiarisartakkani nutaamik nukissaqalissutigisarsimavaa. (1 Tás. 2:19, 20) Neriuummi Biibilimik tunngaveqartup piviusunngornissaanik neriorsoqqissaarneqarnini eqiasuilluni sulinissaminut kajumississutigisarsimavaa. — Epr. 6:11.
5 Aamma uagut ilungersuutitta kinguneri pitsaasut eqqarsaatigisariaqarpavut. Ataatsimiinnernut najuuttarnerput peqataasarnerpullu immitsinnut allanullu ineriartuutaallunilu kajumississutaasarpoq. (Epr. 10:24, 25) Nutaarsiassamik nuannersumik nassarluta tamanut anngunniarnerput ilagiinnut allisaataasarpoq soqutiginninnermik pilersitsisarami nutaanillu takkussuutsitsisarluni. (Juá. 15:8) Pisariaqartitsisunik ikiuisarnerput ilagiinnut ilaasut akornanni qaninnerulersitsisarpoq, ilaqutariittut ilersitsisarluni. (Jâk. 1:27) Paulusitullu eqqaamajuaannartariaqarparput eqiasuilluta ajunngitsuliornivut Jehovap iluarigai. Taassumunnga kiffartorsinnaanerput immikkut pisinnaatitaaffittut annertuutut isigaarput. Uagutsinnut allamik pitsaanerusumik inooriaaseqanngilaq.
6 ’Naammassisaqangaartuinnarneq’ aamma allamik iluaqutissartaqarpoq. Anersaakkut sammisassatsinnik peqqinnartunik ulapputeqaraangatta piffissaq sukkanerusutut ittarpoq. Silarsuassap nutaap ullut tamaasa qanilliartuinnarneranik ilisimanninnitta ullumikkut ulapilluta siunertaqarluartumillu inuunitta akuerinissaanut ikiortarpaatigut. Aamma ulapinnerup silatusaarnerussusia paasisimavarput, taamaalillutami silarsuarmi iluaqutaanngitsumik ulapputeqarnissatsinnut piffissaqarneq ajorpugut. — Evf. 5:15, 16.
7 Aap, Naalakkap suliaanik naammassisassarpassuaqarpoq. Nuannaarnerli pigiuaannarsinnaavarput Jehova Guuti Jesus Kristusilu, kiffartornitsinni nutaamik nukissaqalersitsisartut nalerisimaarnermillu tunisisartut, tunaartariuarutsigik. — Mat. 11:28-30; 1 Juá. 5:3. (kmD 95/1 Altid rigeligt at gøre)