Ataatsimeersuarnermik erseqqissumik kaammattuuteqarpoq! Ullut tamaasa nuannaarlutit Jehova unnersiutigiuk!
1 ’Sulluartaassuarluunniit erseqqinngitsumik nipeqarpat kina taava sorsunnermut upalungaarsassava?’ apustili taama aperivoq. (1 Kor. 14:8) Ataatsimeersuarnermi „Unnersiutiginnittut nuannaartut“-mi erseqqissumik kaammattuuteqannginnerpa nipituumik ersarissumillu sulluartaassuartut nipeqartumik? Aap! ’Ullut tamaasa Jehova nuannaarlutit unnersiutigiuk,’ tusarliussaq kajumissaarut taama nipeqarpoq. Kaammattuummut tamatumunnga misigivit kajumissaarneqarsimallutit? Ataatsimeersuarnermi naassaanngitsumik kunngiusumik Jehovamik unnersiutiginnittuinnarnissatsinnut pissutissarpassuit eqqartorneqarput. — Tuss. 35:27, 28.
2 Ullut tamaasa qilaap mianernangaartup oqaluttuaraa Jehovap naalannagaassusia. (Tuss. 19:2-4) Jehovap pinngortitaasa uumassuseqanngitsut nipeqaratik unnersiutiginnissinnaappata, pinngortitaasugut eqqarsarsinnaassuseqarluta misiginnginnerpugut kaammattorneqarluta niperput atorlugu taassuminnga killisissaanngitsumik pissusiinik suliaanillu unnersiutiginninnissatsinnik? Kia allap Pinngortitsisiginngisatta nuannaarluta unnersiutiginninnissatsinnik piumaffigaatigut? — Tuss. 145:3, 7.
3 Ullut tamaasa: Tussiaasiortoq sunnerneqarluni allappoq: „Annaassinera torlulaatigisiuk ullut tamaasa! Jehova angigaarpoq unnersiutigineqangaassallunilu.“ (Tuss. 96:2, 4) Pioneerinuinnaq tamanna atuuppa? Naagga. Imaappoq tamatta sukkulluunniit qanorlu pisukkulluunnit allat Jehova pillugu oqaluttuuttariaqarpavut, aamma toqqaannartumik illumiit illumut angalaarluta pinngikkaluaruttaluunniit. Ulluinnarni Jehovap annaassissutaa allanut oqaluttuarisarnissaa pingaaruteqarpoq. Inuit paasisariaqarpaat Jehova naassaanngitsumut Kunngiusoq silarsuarmullu naalagaassuseq ernerminut Jesus Kristusimut tunniussimagaa. Jehovamut inoqatitsinnullu asanninnitta sumiikkaluaruttaluunniit taassuma tusarliussaanik annaassissutaanillu nalunaajaatiginnittuaannartissavaatigut. — Tuss. 71:15.
4 Ullut tamarluinnaasa Jesus Kristusip nunarsuarmi kiffartuussinermini maligassaalluarnerpaavoq eqiasuilluni Jehovamik unnersiutiginninnerminik. Ima oqarpoq: ’Kikkut tamarmik takkuanni unnersiutigaakkit, Ataataq, qilaallu nunallu naalagaat.’ (Mat. 11:25, NV) Tamanna peqatigalugu Jesusip kikkut tamarmik takkuanni Jehova unnersiutigiuaannarpaa. Inuit katersuuffigigaanganni, naalagiartarfinni, naalaffimmi Jerusalemimiittumi, qaqqami sinerissamilu Jehovamik unnersiutiginnittarpoq. Jesusip tumai maleqqissaarniassagutsigik ullut tamaasa aalajaalluta kikkut tamarmik takkuanni Jehova naalannartinniassavarput, ajunngitsunik nuannaarutigisinnaasatsinnik kingunerit misigiumaarlugit.
5 Kaammattuutit maleruakkit: Ullut tamaasa Jehovamik unnersiutiginninnissamik kaammattuut malikkumassaviuk? Eqqaamajuk utoqqaassuseq apeqqutaanngimmat. Tussiaat 148:12-imi qaaqquneqarput nukappiaqqat niviarsiaqqallu, utoqqaat inuusuttullu Jehovamik unnersiutiginneqqullugit. Ilissi meeqqat ukiumi atuarfiusussami nutaami atuaqatissinnut ilinniartitsisussinnullu Jehova unnersiutigalugu nalunaajaatigissavisiuk? Ilissi inersimasut periarfissat tamaasa atorluarniarlugit suleqatissinnut Jehova siunertaalu pillugit oqaluttuartarpisi? Soorlu nerisarnerput anersaartortarnerpullu pissusissamisuuinnartut, taamatut aamma Jehova pillugu kikkulluunnit nalunaajaaffigisariaqarpavut. Inuit immaqa soqutigisaqanngissinnaapput oqaaserisavullu tusarumanagit, kisianni nalunngilarput Ataatsip tusarnaaraatigut, taassumallu akilerumaarpaatigut. — Mal. 3:16.
6 Aaqqissuussaanera matuma naggatissaa qanilliartortillugu, nunarsuaq tamakkerlugu kaammattuut imaattoq tusarliunneqarpoq: ’Jah, unnersiutigisiuk!’ (Tuss. 106:1, NV.) Qanortoq ullut tamaasa unnersiutiginninnerput annertusiartorluni nukittorsarneqarli, tamarmik taamaalillutik paasitserlugu Jehovamik atilik tassaasoq qutsinnerussaartoq nunarsuarmi tamarmi. — Tuss. 83:19. (kmD 9/95 Lovpris Jehova med glæde hver dag!)