Sooq Jehovamit misissorneqarnissaq iluaqutaasoq
1 Tamatta peqqissuunissarput kissaatigaarput. Taamaakkutta inuuneq ajunnginnerusumik nuannaarutigisinnaavarput. Amerlasuut peqqikkaluarlutik akuttunngitsumik misissortittariaqartarput. Sooq? Peqqissusertik ajoquteqaleriartuaaratarsinnaammat piareersimaniarput. Anersaakkut peqqissuunerput misissussallugu pingaaruteqarnerusorujussuuvoq. Jehovamit akuerisaasinnaavugut aatsaat ’uppernikkut peqqissuugutta’. — Tít. 1:13.
2 Pitsaassaaq Jehovamit maannakkut misissorneqarutta. Sooq? Tassami Jehova naalaffimminiimmat erlinnartumi inuillu uummataat tamaasa misissuiffigalugit. (Tuss. 11:4, 5; Uss. 17:3) Daviditut Jehova qinnuigaarput peqqissaartumik misissuiffigeqqulluta: „Misilinnga Jehova, misissunnga, misissuiffigikkit uummatiga tartukkalu. — Tuss. 26:2.
3 Uinikkut naammalluinnanngitsuugatta mianersortariaqarpugut anersaakkut peqqissuserput ilutsinniit saassunneqaratarsinnaammat. Ussatit 4:23 ima unnersuussuteqarpoq: „Paarisassanit tamanit annermik uummatit paariuk inuuneq tassannga aallaaveqarmat.“
4 Anersaakkut peqqissuserput aamma silarsuarmik kanngunartuliorfioqisumit aarlerinartorsiortinneqarpoq. Silarsuarmut matumunnga ajortumut qanillivallaarutta, immaqa taassumatut eqqarsartaaseqalersinnaavugut pissutsillu silamiorpaluttut ineriartortinnialissallutigik. Imaluunnit silamiorpaluttumik inooriaaseqalerpugut navianartorsiorlutalu silarsuup anersaavanik ajugaaffigineqarluta. — Evf. 2:2, 3.
5 Satanip malersuinerit toqqaannartumilluunniit akerlilersuinerit atorsinnaavai anersaakkut nakkartinniarluta. Silarsuulli pilerinartuinut nakutinniarnerpaasarpaatigut. Peterip ima kajumissaarpaatigut ’putumatsaalillusilu eqqumagitsi, akerartortersi Diaavulu liivertut uiannisaartutut angalasarmat iisassarsiorluni.’ Imatullu kaammattorneqarpugut ’taanna assortorsiuk uppernikkut aalajaangerlusi’. — 1 Pît. 5:8, 9.
6 Anersaakkut peqqissuserput paarisariaqarparput upperluarnikkut ullullu tamaasa nukittorsartuarlugu. Apustili Paulusip inassutigaa uppernerput misilittartuaqqullugu. Soorlumi uagutsinnut silatusaarnerussasoq tusarnaarutta nakorsap pikkorissup atoriaanaassumik innersuuppatigut, silatusaarnerussaarlu Jehovamut tusaaniarutta anersaakkut misissuiffigereerluta paasippagu arlaannik aaqqitassaqartugut. Taamaaliornikkut ’naammattunngussaagut’. — 2 Kor. 13:5, 11.
7 Aap, Jehova anersaakkut Nakorsaaneruvoq. Nappaatip suussusianik paasinninnera eqqoqqissaartuaannarpoq. Nalunngilluinnarpaa suna atorfissaqartikkipput. Oqaatsimigut ’inussiallu aalajaallunilu silatuup’ anersaakkut peqqissinartunik inuussutissalersortarpaatigut. (Mat. 24:45; 1 Tim. 4:6) Akuttunngitsumik anersaakkut peqqinnartunik nerisarutta, angerlarsimaffimmi naalagaaffilersaartarfimmilu, anersaakkut peqqissuujuaannarsinnaavugut. Kiffartuussinermittaaq kristumiullu suliassaanni allani anersaakkut timigissartuarutta iluaqutigissavarput. Taamaattumik akuttunngitsumik Jehovamik misissorneqartuartariaqarpugut, tatigigatsigu anersaakkut peqqissuujuarnissatsinnik ikiorsinnaagaatigut. (kmD 9/95 Hvorfor det er gavnligt at lade sig ransage af Jehova)