Apeqquteqartarfik

◼ Oqaaseq „qatanngut“ qaqugukkut atussallugu eqqornerussava?

Oqaaseq „qatanngut“ naliginnaasumik atorneqaraangami inunnut angajoqqaaqatigiinnut atorneqartarpoq. Ilaqutariittut attaveqarneq tamanna pissusissamisoortoq attaveqarnermik eqqarleriissutsimillu ataqatigiinnermik misiginermik pilersitsigajuttarpoq, inunnilu taakkunani ataasiakkaani qanigisariinneq inuttut atugarisatigut, avatangiisitigut misigissutikkullu ataqatigiinnermit nukittorsarneqaqqittarpoq.

Jesusip ajoqersukkani ilinniartippai Jehova qinunikkut saaffigigaangamikku ’Ataatarput’-mik taasaqqullugu. Oqaatsimik tamatuminnga atuinitsigut ersersipparput tamatta kristumiutut qanimut ilaqutariittugut, anersaakkut ilaqutariinnerput nuannaarutigisinnaallugu. Tamanna Jesusip erseqqissarneruaa ajoqersukkaminut ima oqarami: ’Ilissili tamassi qatanngutigiippusi.’ — Mat. 6:9; 23:8.

Guutip ilagiissaasa iluanni qanimut anersaakkut attaveqarnerput pissutigalugu immitsinnut „qatanngut“-mik taasarpugut, ingammik ilagiit ataatsimiinnerini. Ataatsimiinnerni siulersuisut taamatut anersaakkut ataatsimooqatigiikkaangatta kuisimasut „qatanngut“-mik kinguliaat ilanngullugu taasarneratigut akuerisarpaat.

Taavami kuisimanngitsoq ataatsimiinnermi peqataanissani kissaatigilerpagu? Inuup Jehovap nalunaajaasuinik peqateqartareersimasup tunniulluinnarnermullu piareersalereersup, namminerlu Jehovap nalunaajaasuatut isigilereersup „qatanngut“-mik taaneqarnissaa akerlilerneqarsinnaanngilaq. Oqaluussisartut kuisimanngitsut ingammik tassani pineqarput.

Aappaatigut soqutiginnilerlaat ataatsimiinnernut najuuttaleqqammersut suli Guutip inoqutaasa ilisarnaataannik iliuuseqalersimanngillat. Taakku „qatanngut“-mik taaneqarsinnaanngillat, suli Guutip ilaqutariissortaanut anersaakkut ilaalersimanngimmata. Taamaattumik ataatsimiinnerni naliginnaasumik taasariaqarpavut, tassa atiata kinguliaatalu taasarnerisigut.

Ataatsimiinnerni immitsinnut „qatanngut“-mik taasarnitsigut erseqqissartarparput qanimut naleqaqisumillu immitsinnut attaveqatigiinnerput. Eqqaasittarpaatigut anersaakkut ilaqutariissuarnut ilaasugut Jehova Guuti Ataatagalugu. Aammattaaq eqqaasinneqartarpugut asaqatigiilluinnarnitsinnik immitsinnullu tunniussimalluinnaqatigiinnitsinnik. — Evf. 2:19; 1 Pît. 3:8. (kmD 96/4 Spørgsmålskassen)