Apeqquteqartarfik

◼ Ataatsimiinnerni atuffassisarneq qanoq eqqarsaateqarfigisariaqarparput?

Piffissap ilarujussua atorlugu Napasuliaq Alapernaarsuiffik-mik atuaqqissaaraangatta ilagiillu atuakkamik atuaqqissaarneranni immikkoortut atuffassissutigineqartarput. Qatanngut atuffassisussatut pisassaqartoq ilinniartitsisutut annertuumik akisussaaffeqarpoq. Atuffassisarnera imaattariaqarpoq isumalimmik tunniussisuusariaqarluni, taamaalilluni tusarnaartut paasisinnaanissaanut aammalu iliuuseqarnissamut kajumissaarneqarnissaannut. (Neh. 8:8) Taamaattumik atuffassisussaq pisassaminik piareersarluartariaqarpoq. (1 Tim. 4:13; takuuk ’skolehåndbogimi’ ilinniagassaq 6.) Tassani nipituumik atuffassisarneq pillugu pingaaruteqartut ilaat eqqartorneqarput.

Nipimik eqqortumik taalluartaarineq: Siusinnerusukkut oqaatsit eqqarsaatilluunniit taalluarneqartussat tusarnaartunut eqqortumik paasitinneqartussat nassaarikkit.

Eqqormik oqaatsimik taasinissaq: Tusarnaartut oqaasertaata ersersinneqarneratut paasissagunikku eqqorluartumik oqaatsimik taasinissaq paasissaasumillu pitsaasumik taasinissaq pisariaqarpoq. Oqaatsit qaqutiguinnaq atorneqartartut nalusalluunniit oqaatsinik qinerlerfissiani takuneqartariaqarput imaluunniit Peqatigiiffiup kassettebåndiutaanik tusarnaarneqartariaqarlutik.

Nipeqassuseq angorniornerlu: Ersarissumik angorniortumillu atuffassineq soqutiginninnermik pilersitsisarpoq, misigissutit eqeersittarpai tusarnaartullu iliuuseqalersittarlugit.

Oqaloqatigiinnertut pissuseqarneq misigissuseqarnerlu: Pissusissamisoortumik atuffassineq aamma akunnattuuganngitsumik atuffassineruvoq. Piareersarluarnerup sungiusarnerullu atuffassisoq qasukkarsimatittarpaa, taamaattumillu atuffassineq assigiikujuuinnartuunanilu pikkunaannani kajuminnartuusinnaavoq. — Hab. 2:2.

Allassimasut atuakkit: Quppernerup ataani nassuiaasiullugu ilanngussat aammalu paasissutissat ungalusamiittut amerlanertigut aamma atuarneqartassapput. Taamaallaat allakkanut allanut innersuussutit atuarneqartariaqanngillat. Quppernerup ataani nassuiaatit immikkoortumi innersuussutigineqarsimasut atuarneqartariaqarput. Ima oqartoqarsinnaavoq: „Quppernerup ataani nassuiaatitaa ima allassimavoq . . .“ Tamanna atuarneqareerpat immikkoortup sinnera nangillugu atuffassissutigineqarsinnaavoq.

Atuffassillaqqissuugutta allat Ajoqersuisorsuatta ’peqqusai tamaasa maleruaqqullugit’ ajoqersuinissamut peqataasinnaavugut. — Matt. 28:20. (kmD 9/96 Spørgsmålskassen)