Suliassaqarpugut
1 Jesusip malinnitsini suliassissimavai ’inuiaqatigiit tamaasa ajoqersuganngorteqqullugit’ (Mat. 28:19) Nunarsuaq tamakkerlugu qeqertanilu 232-ini Jehova Guutimik unnersiutiginnittut fem millioninit amerlanerusut Jesusip oqaasiisa maanna eqquunnerannut nalunaajaataapput. Uagummi inuttut ataasiakkaatut? Suliaassiissutigisaq oqaluussisartutut pimoorupparput?
2 Ileqqussatigut pisussaaffik: Suliassiissut ’pisassiissutaavoq naammassisassaq’. Kristusip pisassissimavaatigut nalunaajaaqqulluta. (ap. sul. 10:42) Apustili Paulusip paasisimavaa ileqqussatigut pisussaaffigalugu nutaarsiassamik nuannersumik oqaluussissutiginninneq pisassiissutaasoq pisariaqartoq. (1 Kor. 9:16) Assersuutip matuma erseqqissisissinnaavaa: Takorlooriaruk umiarsuarmi umiulersumi inuttaasutit. Umiarsuup naalagaata peqquaatit ilaasut kalerreqqullugit umiatsiamullu annanniummut siulersoqqullugit. Peqqussut soqutiginagu illit annannissat kisiat eqqarsaatigissaviuk? Soorumi naamik. Allat pinngitsoorsinnaanngilaatsit. Inuunerat navianartorsiorpoq. Taakkua ikiussallugit ileqqussatigut pisussaavutit.
3 Mianersoqqussut tusarliuteqqullugu Guutimik suliassinneqarsimavugut. Jehovap qanittukkut pissutsit aaqqissuussaanerat ajortoq manna piuneerussavaa. Inuit millionilippassuit inuunerat navianartorsiorpoq. Eqqortuliornerussavali allat navianartorsiornerat soqutiginngitsuusaarutsigu, namminerlu annannissarput kisiat eqqarsaatigalugu? Soorunami naamik. Ileqqussatigut pisussaaffeqarpugut allanik annaassiniarnermi peqataanissatsinnik. — 1 Tim. 4:16.
4 Aalajaallutik maligassiuisut: Pruffiiti Ezekiel misigisimavoq mianersoqqussut Israelikkunnut allasiortunut ingerlatissallugu akisussaaffiusoq annertooq. Suliassaq tamanna naammassinngippagu sumik kinguneqassanersoq Jehovap sakkortuumik mianersoqquaa: „Guutiitsumut oqaruma toqussasoq illillu mianersoqqunngikkukku . . . taava guutiitsoq taanna toqussaaq pinerluttuliani pillugu, toquneranulli illit pisuutissavakkit.“ (Hes. 3:18) Ezekielip suliassaq aalajaalluni suliaraa naak sakkortuumik akerlilersorneqaraluarluni. Taamaattumik Jehovap eqqartuussutaa naammassineqarmat nuannaarutigisinnaavaa.
5 Ukiut hundredellit tamatuma kingorna apustili Paulus oqaluussinermut akisussaaffini pillugu allappoq. Ima oqarpoq: ’Tamarmik aavinut pinngitsuuvunga, nipangiussaqannginnama Guutilli siunnersuutaa tamaat ilissinnut oqaatigigakku.’ Paulus inuit tutsaanni illumiillu illumut angalaarluni oqaluussisarpoq nalunnginnamiuk taamaaliunngikkuni Guutimit allat aavinut pisuutitaassalluni. — ap. sul. 20:20, 26, 27.
6 Ezekielitut aallussilluartuuvugut? Paulusitut misigisimavugut oqaluussinissatsinnik sakkortuumik kajumissaarneqarluta? Oqarsinnaavugut ’tamarmik aavinut pinngitsuulluta’? Taakkua suliaata assinganik suliassaqarpugut. Allat mianersoqqunissaannik akisussaaffipput eqqortittuartariaqarparput naak allat ilanguutiinnaraluartut, soqutigisaqanngikkaluartut imaluunniit akerliugaluartut. Naalagaaffiup tusarliussaanut inuit tuusintilikkuutaat suli qisuariarsinnaapput imalu oqarlutik: „Ingerlaqatigissavassi tusaratsigu Guutip najoraasi.“ (Sak. 8:23) Qanortoq Guutimut tullitsinnullu asanninnitta oqaluussiunnaartinngisaannartikkilisigut. Oqaluussineq suliassaraarput.