Aappat uppinngitsut angukkit
1 Aappariit pallorfiginninnermi ilumoortumi ataasiussuseqaraangata nuannaarutaasaqaaq. Ilaqutariippassuarnili aappariit aappaannata sallusuissut ilassisimavaat. Aappat uppinngitsut qanoq ililluta angusinnaavavut peqatigalutalu Jehovamut pallorfiginninnissaanut kajumissisillugit? — 1 Tim. 2:1-4.
2 Eqqarsartaasiat paasiuk: Aappat uppinngitsut ilaat akerliusuupput, akerliuneralli amerlasuutigut paasisimasakinnermik paatsuuinermilluunniit pissuteqartarpoq. Immaqa ilaat avataaniittutut misigipput immaqaluunniit aapparmik anersaakkut soqutiginnilernerat pillugu sangiallutik ningarlutilluunniit. Uiusup ataatsip eqqaamavaa: „Kisimiillunga uagutsinniikkaangama qimagaasutut misigisarpunga.“ Alla oqarpoq: „Misigisimavunga nuliama qitornamalu qimaqqajaaleraannga.“ Angutit ilaat immaqa isumaqarput ilaquttatik uppeqatigiinnut annaalerlugit. (Takuuk Vagttårnet 15. aggusti 1990-imoortoq qupperit 20-23.) Taamaattumik ajornanngippat aallaqqaataaniilli aappariit marluullutik Biibilimik atuaqqissaaqatigiippata pitsaanerpaassaaq.
3 Suleqatigiigitsi: Aappariit Jehovap nalunaajaasui aappariinnik sallusuissummut ikiuinermi suleqatigiittarnerminni angusaqarluartarsimapput. Qatanngut arnaq arnamik atuaqatitaaraangat qatanngutip angutip arnap uia pulaartarpaa. Amerlasuutigut angut Biibilimik atuaqqissaaqatigisalersinnaasarpaa.
4 Inussiarnersuugit inoroorsaartuullutillu: Ilagiinni ilaqutariit ikiuisinnaapput ilaqutariit pallorfiginninnermi ilumoortumi suli ataasiussuseqalinngitsut soqutiginninnermik nittaavigisarnerisigut. Inussiarnersumik pulaarnerit aappanik uppinngitsunik paasititsisinnaapput Jehovap nalunaajaasui kristumiuusut ilumoorlutik inoqatimik ajunnginnerpaamik pinissaannik isumassuiniartut.
5 Ilaannikkooriarluni utoqqaanertat eqqarsaatigisarsinnaavaat qanittukkut aappat uppinngitsut anguniarlugit qanoq iliuuseqartoqarsimanersoq Jehovamullu saatsinniarlugit qanoq iliortoqaqqissinnaanersoq. — 1 Pît. 3:1.