’Isertarfik ulapinnartoq’ ammavoq
1 Oqaluussisartutut aallussilluartutut Paulusip oqaluussisarfiit pisariaqartitsiffiusut ornittarsimavai, soorlu illoqarfik Efesus. Tassani angusaqarluangaarami kristumioqatiminut ima allassimavoq: ’Isertarfik uannut matuigaavoq angisooq ulapinnartoq.’ (1 Kor. 16:9) Paulus sivisungaatsiartumik tassani kiffartorpoq Efesusimiullu amerlasuut uppertunngornissaannik ikiorlugit. — ap. sul. 19:1-20, 26.
2 Ullumikkuttaaq ’isertarfik ulapinnartoq’ uagutsinnut ammarneqarsimavoq. Ilagiit oqaluussisarfimminnik ukiumut ataasiarlutik sukumiisumik angalaarfiginnissinnaanngitsut ikiornissaannut periarfissaqarpugut. Tassa ilungersornerput pisariaqartitsiviusut ilaanni iluaqutaasinnaavoq. — Naleqqiuguk Korintumiunut agdlagkat áipait 8:13-15.
3 Pisariaqartitsiffiunerusumi kiffartorsinnaavit? Qinunikkut eqqarsaatigisimaviuk allami kiffartorsinnaanerlutit? Immaqa illoqarfigisanni ilagiit ilaat ikiorsinnaavatit. Angalalluni nakkutilliisoq oqaloqatigeriaruk qanorlu siunnersuisinnaanersoq tusarlugu. Immaqaluunniit maanna ilagiit ilaaffigisatit oqaluussisarfeqarput tusilartorpassualinnik allamiutulluunniit oqaasilippassualinnik oqaluussiffigineqarpiarsimanngitsunik. Pisariaqartitsineq tamanna eqqarsaatigalugu oqaatsit allat ilinniarsinnaavigit? Immaqa eqimattat ilagiilluunniit allamiutut oqaasillit qanittumiittut ’katersugassat inuat’ Naalagaaffimmik oqaluussisartunik amerlanerusunik qinnuigisimavaat. (Mat. 9:37, 38) Qinnut tamanna qisuariarfigissallugu piareersimavit?
4 Ukiuni qulikkuutaani kingullerni amerlasuut nunanut allanut nuussimapput katersuinermi annertunerusumik peqataaniarlutik. Aappariit taamaaliorsimasut oqarput: „Kissaatigisimavarput iluaqutaaffiginerpaasinnaasatsinni Jehovap kiffartorfiginissaa.“ Taamatut kissaateqaruit ilagiinnullu allanut nuunnissannut periarfissaqaruit nunamiluunniit allami kiffartornissannut piukkunnaateqaruit ilagiinni utoqqaanertat pilersaarutitit pillugit oqaloqatigisariaqarpatit.
5 Sumi pisariaqartitsisoqarnersoq Peqatigiiffik paasiniaaffiginiarukku allakkat kissaatigisannik apeqqutissaqaruillu apeqqutinik imallit ilagiit kiffartornermut ataatsimiititaliaannut tunniussinnaavatit. Taakkua oqaaseqaatiminnik ilanngussissapput Peqatigiiffimmullu nassiullugit. ’Isertarfik angisooq ulapinnartoq’ ammatillugu qanortoq tamatta Jehovamut kiffartornitsinni ulapittuarta. — 1 Kor. 15:58.